OHALA KOD DIN EI KARACHUONYO
KENDU BAY
Higa 1912 jo-warabu (jo-rabuore) nobiro kaka jogo ohala ei Karachuonyo ne gi gowo edho wadh Kendu. Nying'ni nobiro kaluworegi nying' aora Kindu mantie but chirono. Ne giyudo ka jo-Karachuonyo ne gin jo-pur, cham mane gi puro ne gin kaka; njugu, pamba, ng'or kod oganda.
Kane
gichopo negi birogi lewni kaka; lep japan, khaki, barangede, tigo kod gik
molos gi minyonge minyalo rwak edel kata e ng'ut. Mano ekaka ne gichako
ohala gi jo-Karachuonyo kendo thoth jo-Kindu nomewo ahinya. Din mar Islam
bende ne gikelo ei Luo, kata sani jo-Karachuonyo mokiewo gi Kindu
ng’enygi lemo e din mar Islam.
Chironi
nochako gerore, dho-wath bende nochak ger mondo meli ogowe mayot. Kendu
nobedo kaka kar romo maduong’ ahinya ei Karachuonyo nikech kanyo emane
inyalo idhe meli madhi Kisumo.
GENDIA S.D.A
MISSION
Higa mar 1906 Bwana Khaskal nobiro gi din mar
adwen (seventh day Adventist) ei Karachuonyo kendo nogero kanisa
mokwongo, Gendia Mission. Ji mathoth ahinya nodonjo e dinni nimar endalogo
ne jo-Karachuonyo nepok odonjo e din jarachere ahinya.
Din adwen nobedo gi huma maduong' ahinya kendo ne
gigero sikunde mag tiegruok kod osiptende mag thieth. Jogo mane ong'eyo
somo kod ndiko noketi jo-yalo, jopuonj, jo-lok ohand buge, kod tije mamoko
mane inyalo tim ei kanisa.
Kanyono emane ogerie od goyo buge; The
East African Publishing House
Mane olok nyinge bang'eni; African Herald Publishing House. Kanyo
emane obedo kaka kar goyo buge ei Afrika ma-Ugwe mangima (East Africa)
Ne gitemo goyo buge mag puonj kod mago mag lando
injili. Kane Bwana Khaskal odok thurgi bang'e jorachere mathoth nobiro
kendo puonj mar din nomedo dhi nyime ei Karachuonyo ma ngima.
Pastor Wilson emane ogero Kanisa maduong' masani ochung' Gendia,
kendo nobedo jatend jo-yalo ei Karachuonyo mangima. Mano omiyo thoth
jo-Karachuonyo gin jo-Adwen. Kendo dongruok nomedo dhi nyime ahinya, timbe
mag mibadhi kod bilo nodok chien.
KAJIMO "HOMA
LIME"
Jarachar moro nochopo ei Karachuonyo miluongoni; Bwana Jim, kata kamano jogwengno neluongeni Ajimo. Noyudo kar kunyo kit bala (Lime) ei Kakdhimu machiegni sikul Alara, kendo nondiko jo-gweng'no mathoth ahinya mondo okonye tich, nokelo masinde mag kunyo.
Mig. Alfred Ogwago nobedo kaka jagoro mare
maduong', bang'e nogero wath kamane meli nyalo gowe ka biro omo mwandu.
Bang'e kane Ajimo otho to Mig. Ogwago nokawo telo mar rito kambino. Mano
nomiyo Ogwago obedo jamwandu malich ahinya kata sani ka diponi odhi West
Karachuonyo to pod inyalo winjo humb Mig. Ogwago.
Nying' Kajimo masani iluongo godo jo-gweng'no nowuok
kuom jago mane nyinge JIM. Onge dhoot moro ei Karachuonyo miluongoni
jo-Jimo.
SIMBI NYAIMA
Simbi ne en ruodh
jo-Kakseru mane odak but Kendu Bay, ei Karachuonyo. Adikinyi nochako otuch
e dalano noyudo koth chwe to jodongo bende ne madho kong’o e siwandha
mar wuon dala, ka nochopo to owuoyo gi jodongo kopenjoni, “adonji e
dalani”, to jodongo noriembo mana kaka ing’eyoni bang’ kongo oyugno.
Nochako wuoth kochomo
simba mwalo, nodonjo e od dhako moro mane nigi nyathi matin. Dhakono
norwake to nonyiseni, “dhi mondo iluong’ chuori”. Ka nodhi to chuore
noriembe ka nyiseni, “ koso bin dhako moti ma korka wariembo chande ema
luonga?, nyiseni adagi, kendo owuog odhi kuma odhiye”.
Ka nodok to dhakono ochako oore ka nyiseni, “dog
inyis chuori ni aluonge”. Kuom hawi marach dhako cha nodok kaywak, nimar
chuore nopado lembe kendo oriembe. Ka nodo to Adikinyi nonyiseni, “kaw
nyathini wa wuog oko edalani, dalani oserumo.” Kaka ne gichako wuoth to
bang’ ondamo matin to Adikinyi onyiseni, “ lokri ing’i chien”.
Noneno ka dala chande osepodho kendo ji otho orumo, ma en kod nyathine
kende emane okuo. Mae
chal kod hond Noah (Onam) mane otimore kane ji otamore winjo wach Nyasaye.
Noah kod ogandane kende emane okuo, Kambes ne yie oweyo nimar wiye ne tek,
mana kaka dichuo mane opado chiege chande.
Dalano mangima nopodho molal kendo olokore ataro,
nyaka sani pod en yawo. Kane jo-Kakseru oneno hono mosetimore to ne gi tuk
kendo gichako wuoth ka gi chomo yor milambo, mano ekaka ne gi chopo
Tanzania. Sani jo-Karachuonyo ema odak Simbi kod jodak moko mane lweny
ogolo loka Uyoma Naya.
To Adikinyi nowuok gi dhako chande modhigo nyaka loka
masawa but Lwanda K’Otiato e kind Luo kod Abaluhyia, machiegni gi Maseno.
Ndalogo oyudo ka jo-Kano (joka-Dibo, dhoot matin iluongoni Kamget) emane
pod odak kanyo.
Kane dhakoni odonjo dala jaduong’ moro moti to
norwake kendo nonyiso jaduong’no ni, “anto ok inyal loka chiegi,
dhakoni ema amiyi to nyathini ema biro gero kari.” Nyathino noyudo gweth
kendo noluongeni Nganyi mano e
bilo mar koth ei Luo mangima maka koth otamore chwe to itimone misango.
Kata ka jodongo dwaro baro koth to itimone misango.
Nyaka sani hond Adikinyi koro ose fwenyore kuonde
adek; mokwongo edho wath Gwasi, mar ariyo Simbi Nyaima, mar adek Lwanda
K’Otiato.
Hond Adikinyi ema chalo hond Maria mane obedo min
jawar nimar ei Luo yudore ni en bende emane ochalo kaka min Ondeto
wuod Obimbo.
Omiyo din Legio Maria ema chal kaka din jaluo e ngima
masani nimar honni duto mane otimore waseneno. Ka ji nyalo yie gi mago
duto mane otimore Israel to ang’o madi monwa yie gigo mane otimore ei
Luo?
Sani dinde opong’o piny; kuom ranyisi ei Kenya
kende nitie dinde madirom mia abich gi dire, to duto wachoni gilamo mana
Nyasaye achiel, kata kamano ok giyiere e kindgi giwegi, moro ka moro
dwaroni en ema mondo ji olemie; ei Luo nitie dinde kaka: Oliko Nyamolo
kata din jok-Opere (Katholik), Adwen (SDA), Hera, Apende (pendekosti),
Roho maler, Roho mowar, Roho sulwe, Roho musalaba, Roho Israel, Legio
Maria, apothtolik (apostolic), Duond warruok, Koptik, Pawa (power of Jesus
around the world) kod ma moko. Ka diponi Nyasaye achiel ema walamo to ere
gima omiyo dinde opong’o piny?
Din jarateng’ to kare en mane? Misungu nobiro gi din mondo oyud yo mayot mar loyo jarateng’ nimar kata sani jomoko osieko ni owargi kendo giluongoreni Ndugu gi Dada katika Yesu, kare moko to ndugu katika ang’o?
Dinde man epiny pok otieko guondo, imruok, ich lit,
maundu kod anjawo mag chode; in gi an ma somo wachni kawuono nonri e
chunyi kendo ibed ranyisi maber kuom ogandani kaok idewo din kata wat.
Onge
kama din biro terie kaok iloko pachi iwuon. Uparoni jarateng’ ne Nyasaye ok ochuoyo? Awuoro
kaka misungu oloko pachwa, pien dendwa kende emane otame loko. Jomoko
katinde irimogo to nyisi nyingeni; “an nyinga en Tom James kata Robert
Kennedy kata Peter MacWilliams” mago to koro ang’o? Wan donge wan gi
nying’ kwere ma wanyalo chako nyithindwa? Omiyo sani ochopo kama nyaka
walok pachwa.
Ok adwar loko ng’ato mondo bed ja-Legio to adwaro
mana lero tiend wach mondo adieri oyang’re ne Nyikwa Ramogi.
Hap Adikinyi minwa, mondo omedu muya mar dak aming’a kendo luoro chike kwere. Ngire Nyadenda mondo oritu ndalo duto. Ogonya wang’e ogothole yaw wangwa mondo wane ler. Laktach lakteche mul nyithindi mojony kendo ma midekre oingo. Ler mondo orieny ndalo duto!