NYOMBO
Ichako
nyuomo dhako nade?
Mokwongo winjruok nyaka bedi e kind wuoyi gi nyako,
mano oyudo jogam ariyo oseromo moa korgi nyako gi korgi wuoyi bende. Kendo
ka wuonjruok osebet to ichano kaka chenro mar keny chakore.
Itemo non kadipo ni gin wede to keny nyaka kethre. Ka
en ogogo to ok onego nyuome e ot mane ng’at mokwongo ochieme. Mano en
riwo lemo (gadho dhoch), mano ka otimore to wuon nyako nyaka tho.
Nyuomo mikayi
Mikayi e chuny pacho omiyo en ema ikwongo nyuome,
korka ichako nyuom ma moko kaka; nyachira, rero, nyar od mikayi nyar od
nyachira nyar od rero, odongo her gi ma moko ma nying’gi ok oyudo duong’
e keny mar jaluo.
Onge dhako minyalo nyuom kapok onyuom mikayi mano e
kaka iluwo chenro nyaka dhako mogik. Kaponi onyuom dhako matin motelo ne
mikayi to mano nyiso ni
oriemb mikayi kendo dhako monyuomno okawo kare, mak mana kapo oduogo to
nyalo kelo gajruok e pacho omiyo nyaka rit chike mag keny mak wuondruok
obetie,
Samoro ng’ato nyalo neno ni nyachira ema ohero ema
okwongo nyuomo, mano dhoch mak lok lokre. Kapo oriemb mikayi chuth to onge
dhoch monyalo timo.
Nyuomo nyako matin to maduong’ pok odhi tedo
Ok en gima ber mondo nyako matin kwong’ ne nyako
maduong’ dhi tedo, kapo mano otimore to chieng’ mikelo dhiang’
mokwongo to itero kowadgi wuon mare, kendo kuno ema ilose chiemo, kanyo
ema welo chieme, dalagi nyako ok gidonje nyaka chopi nyuom nyako maduong’.
Jaduong’ (wuon nyako) nyalo dhi moso welo to chiemo
ma gi kelo to ok ocham. Owadgi
wuon mareno ema bedo kar wuon. Nyaka chopi dhoch mar nyako maduong’ loki,
tiendeni yudo kend ma nyuome e dalagi korka oyawone kachuo nyako matin
donjo e par jaduong’ ma wuon nyako matinno.
Nyuomo nyako matin to maduong’ chuore pok onyombo
Nyako matin ok nyal nyuom motelo ne maduong’ ka
gisedhi kariya (tedo) gi duto.
Nyuomo
nyar ji ariyo (nyako ma thurgi ariyo)
Ka nyako odhi gi min por (tiende ni min oyudo kend
manyien), to wuon mane onyuole pod nitie kendo dwaro mondo onyombne,
kosenyuom dhiang’ ne jaduong’ achiel to machielo inyuomone omuom (Rupia)
kende.
Nyuomo
Nyasgogo (dhako mane ng’ato osenyuomo)
Nyako achiel ok nyal nyuom e dala achiel gi chwo
ariyo (tero dhok), ka mano otimore to tiende ni chwore mokwong’o
nosewero. Kapo ni nonywolo nyithindo gi ng’at mokwongo to onge gima
idwokone, kata kamano en winjruok e kind wuon keny gi jaduong’ (wuon
nyako).
Bende
inyalo nyuomo yuori mitero?
Ka
yuorino en nyako ma pod nyalo nyuol to nyaka iter dhiang’ gi diel mar
jalako. Mano miyo jater thuolo mar tieko dhoch mar yuore monyuomono, kapo
ok otimo mano to tiende ni ok onyal tieko dhoch nyithindo monyuolo gi
dhakono.
Bende
inyalo nyuomo yuori mitero mane chwore pok onyuomo?
Kane
pok onyuome to en chik ni nyaka ter dhiang’ kapok oyik chwore, mondo omi
yuore mokawe onyuome. Ka chwore ne pok otero dhiang’ to en dhoch ma loko
tek. Mano chalo dhako mane chwore oriembo omiyo yuore nyalo chako keny
manyien mar nyuome.
Nyako
mane ok onyuom min bende inyalo nyuom?
Nyako
mane ok onyuom min ok nyal nyuom maka
mano otimore to onego min, kendo kelo dak marach e kinde gi chworeno. Gima
itimo en ni nyaka ter dher keny thurgi min mare kapok onyuome korka
oyawone keny.
Wuoyi
mane ok onyuom min bende nyalo nyombo?
Mano
chal man gi mar nyako mane ok onyuom min (som malo kanyo) nyaka kuom ter
dher keny mokwongo korka onyalo rieyo yor keny mare, nono to okelo chira e
kinde gi chiege ma mihoso mare ok nyal yudi.
Nyar
migogo mane odong’ e simba bende inyalo nyuom kanegi?
(som
e chike kuom yawuoyi gi nyiri), Inyuome ka jalibamba moro ma gunde opogore
gund min mare (kanegi). Kata ka nyamin mamane moro ema iteroe dher keny.
Wuod migogo dwaro nyombo
Ok
onyal nyombo kanegi kendo dher keny bende ok wuogi e dala gund min mare
moro amora. Gedo bende ok onyal gedo thurgi min mare.
Nyathi
(nyako kata wuoyi) mane min osetho okendi/okendo to wuon nigi mon moko
itieko dochne nade?
Wuon
nindo e duol (abila) nikech ok onyal tieko dhochne e od dhako moro amora
kuom mondego, mano ema omiyo jodongo bedogi abila kar tieko dhoch. Ka
jaduong’ onge duol to onindo e od dhako mantie kor malo to ok oriw kode
pien kuom ndalo ang’wen.
Kaponi riwo pien gi miyono to oketho kar nyathineno ma ok onyal yudo nyodo nyaka chieng’ jaduong’ gi miyono tho eka onyalo yudo nyodo.