LOCH NANGA (SEREKALI)
EI KARACHUONYO
Motelo
ne biro jarachar ei Karachuonyo noyudo gin kod ruodhi gi giwegi kendo ne
gin kod lony mar rito pinygi. Kane ochopo higa mar 1894 Bwana Obilo (Mr.Hobley)
nobiro ei Karachuonyo, noyudo ka ruodhi mane rito piny Karachuonyo thothgi
ne gin jo-bilo mane ji oluoro ahinya.
Ruodhi mane orito piny Karachuonyo chalo kama:
NYAKITI K'OGUTU
Ne en Ruoth ma humbe lich ahinya ei Karachuonyo,
kendo ne en ja-bilo oganda mathoth noluore, onge ng'at mane nyalo pinge
kuom tije. Ji ne thoro luongeni Nyakiti
Rang'ongo. Nopogo Karachuonyo e kidienje matindo tindo mondo omiye
tich mayot mar rito piny. E gweng’ ka ngweng' noyiero Walenge (Osumba miruai) E kindeno mon e mane chulo osuru, omiyo walenge
noyier mondo ochok osuru kuom mon, ma dhako ma ok ochulo to nyaka yud kum
matek nyowuoyo.
Kane Bwana Obilo ochopo to ne ok onyal loko chike
mane oyudo ka oseketi, mak mana ni notemo manyo yore ma onyalo tiyo godo
kanyakla gi Nyakiti. Hawi marach Nyakiti ne ok ong'eyo ndiko, kata
dho-Oswayo bende ne ok onyal wacho koro nochune ni nyaka omany ng'at ma
nyalo bedo jagoro mare. Noyiero Orinda
mane jathum ma ratipo kendo nonyalo wacho dho-Oswayo maler ahinya, ndiko
bende ne ong'eyo.
Nyakiti nogero Kar romo (baraza) Alego
Nyagowa ei Karachuonyo. Kane Nyakiti nigi wach moro ma ok onyal loyo
to omanyo Orinda mane oyudo e kindeno odak Kisumo kumane omoroe joluo gi
nduma. Chieng' moro achiel Nyakiti nodhi Kisumo to kuom hawi marach noyudo
tuo mar Abuba (nyach) kendo koro ne ok onyal wuotho. Kane oweyo tich to Orinda
nobedo Ruoth.
ORINDA
Loch Orinda ne ok obedo maber kata matin, notemo tiyo
ji g'ang'enge kod wich teko, kendo ne en ja-guondo, nodwa hero
jo-Karachuonyo ma yo Ugwe (east) maloyo jo-Imbo (west), kendo noluongogi
ni joma ofuwo kendo winjogi tin. Kata kamano notemo yudo godo gimoro amora
mane onyalo dwaro kuomgi kaka osuru.
Kane
tije mag lwedo owuok kaka; mag gero ndara, olalo, udi kod gero dho-wath ma
Kendu (harbour), thoth jotich ne gin jo West Karachuonyo. Kata kane Bwana
Obilo biro limo jo-Karachuonyo to notemo peyo mwandu jo-West Karachuonyo,
nonyalo mako rwedhi, rombe, gwen kod cham mane ibiro rwak godo welo.
Gimane miyo otimo kama wachore ni noparoni jo-West
Karachuonyo omewo maloyo jo East Karachuonyo, omiyo jo East Karachuonyo ne
ok ong'eyo gimoro amora kuom wach mar chulo osuru. Mano
nokelo sigu ekind oganda mane odak e gwengegi. Kata sani pod ok gin kod winjruok malong'o.
NYANDEGA
Nyandega emane okawo loch bang’ Orinda, noyudo loch
bang' kedo kod Orinda, nimar Orinda ne ok dwar weyo tich eyo mayot kamano.
Nimar jo-piny noyie gi Nyandega nobedo ne Orinda matek kendo nochune ni
nyaka owe loch. Kata oganda nohere kamano nobedo ruoth marachie moloyo
kuom ruodhi duto mane jo-Karachuonyo obedo godo e kindeno.
Nikech jo-Karachuonyo koro noseneno kaka ruodhi
maritogi timbegi ok ochomo yo ne jodongo oparoni ber mondo giyier ng'at
man'gi chuny mar rito oganda e yo makare kendo moriere tir. Noyier Okoth
kaka ruoth mar ang'wen ei Karachuonyo. Nobedo maber maloyo Orinda kod
Nyandega to kata kamano kane yiero ochopo to Bwana Obilo nonyiso
jo-Karachuonyo mondo oyier ng'at machielo, kuom mano noyier Dola
kaka ruoth manyien. Kuom kinde manok ka Dola pok obulo ng'or e tije to
Okoth nomaye tich nomar nobedoe ng'at ma kite rachie maloyo ruodhi duto
mane osebedo ei piny Karachuonyo.
Kane Okoth oduogo e tich ruoth nobedo ng'at maber
ahinya kendo nokelo kwe ei Karachuonyo mangima. Nyaka
nochopo giko tichne kendo noweyo tich eyo ma kare. Ruoth mane oyier bang'e
ne en Mig. Paul Mboya,
ng'at man gi chiya kod rieko mar rito piny. Kaka ne en ng'at mariek nogero
sikunde kendo thothgi nolok intermediate,
sikundego gin kaka; Gendia, Ongalo gi Wi-k'Ondiek.
Mboya noweyo tich ne Mig. Zephania Malit kane
oyudo jo-piny oyiere ekom mar bedo jagoro maduong' mar African District Council ei Nyanza ma Milambo (South Nyanza). Malit nomedo tich maber mane
Mboya ochako, en bende nomedo gero sikunde. Noyudo ni piny Karachuonyo
duong’, kuom mano nokwayo Bwana Obilo ka bende inyalo pog Karachuonyo
mondo obed gi ruodhi ariyo; West gi East. Higa 1960 nopog gwenge ariyo kendo noyier jalup ruoth (assistant
chief) Mig. Benjamin Awino mondo orit West Karachuonyo. Kendo Mig.
Jafeth Owino noyier mondo orit East Karachuonyo.
1962 Mig. Benjamin Awino noyier ruoth (chief)
mar West Karachuonyo. Malit koro nobedo ruodh East Karachuonyo gi jalupne;
Mig. Owino. Ruodhi duto ma asebedo ka aleronu gi duto gin jo-Karachuonyo
man edho nam. Kata kamano jo-Mumbo (Kasipul - Kabondo) bende ne nitie gi
ruodhi mane orito pinyno kendo wachore ni ne gin gi dimbruok kod lony mar
rito piny kata ka jarachar pok obiro ei Kasipul.