JOKA-JOK
Jok kane oneno ka dala wuon osekethore to nodar odhi
odak ei Kombewa. Nonyombo
monyuolo yawuoyi buora, nochako onyuomo nyasgogo (dhako moweyo chuore).
Nyasgogoni nonyuolo yawuoyi ariyo; Rachuonyo
kod Wanjare. Min yawuoyigi
iluongo ni AWANDO, nyinge dwa chalore gi nying' chi Ramogi Ajwang' (Awando
Nyolal chi Omogi).
Kane
gibedo joma dongo to kaka jodongo nohero chokore kar math, Jok nodhi e
gweng’ loka machielo to kapok owuok to noweyo wach ni mondo yawuote odhi
orit liech ei bel. Kata kamano yawuoyi mamoko nodagi dhi rito liech. Kuom
mano min Rachuonyo nonyisogi ni, “kik upiemgi oweteu mamoko, nimar ka
wuoru wang’ oduogo to gin ok wang’ nodhawnegi, un ema wang’ nodhawnu,
donge uwinjo ka iyanyou ni nyithi nyasgogo. Omiyo dhiuru adhiya urit liech.”
Yawuoyi mamoko to ne madho nyasore kasimba mwalo. Kane Jok oduogo kendo
owinjo ka yawuoyi goyo mana mbaka ei simba nokawo tong’e kendo odhi ei
bel nimar noparoni yawuote notamore dhi rito liech.
Kuom hawi marach noyudo ka Rachuonyo gi Wanjare to nitie ei bel. Kane gi winjo ka gimoro seko biro to giwuok ewi tandalo ka gi paroni liech ema omonjogi, gi kanyono Wanjare noweyo tong’ mochuoyo wuon’gi. Kane oneno ni wuon ema ochuoyo to nonyiso owadgi ni, “Omera anego wuora….” Nikech luoro mane gin’godo ne giparoni owetegi biro negogi omiyo ne ok gidok dala. Wach nek nochopo ne min'gi mi yawuoyi nochako ke ka manyo piny nimar dala koro osewuo, Awando ne piny ochamo modoko ngeroni; Pap ochamo Awando.
Kaka nodoko nyasgogo ne ok nyal rwake, nikech yawuote
ema nosetimo masira mar nek. Ne gikawo yie kendo gi ng’ado nam nyaka
loka machielo. Ne gi gowo e dho-wadh
Pala, kane piny oru to noyudo jaduong’ Ndaya
odhi lupo kanyo kendo nokawogi modhi kodgi dala. Ndalogo noyudo ka hono
osetimore Simbi Nyaima. Jo-kisero kod jo-Kachien emane odak
machiegni kanyo. Bang’ hond Simbi to jo-Kisero koro nochako dar,
jo-Kachien to nodak but God Wire, machiegni Achuna
Ka-Magak (Oyugis).
Rachuonyo noketo kaka misumbane, Wanjare to nomiyo owadgi. Jo-Wanjare ema ogero dhoot moro masani iluongoni Muksero giriwore gi jo-Sidho mane odong' kane jo-Kano dar dok thurgi bang' kethruok ekindgi gi jo-Karachuonyo gidak ekind Kotieno, Kodera kod Kanyango kod dhood gi Dr.(laktar)Onyonka. Sani iluongo gi ni Kitutu Chache. Giwacho dhok ariyo (dho-luo gi dho-kisii).
Mano edalagi; okil Oseko ma wuod japuonj John Oseko,
Daudi Memba wuod Ogeda, Juma Naftali wuod Nyamwala, Paul ‘Ongocho’
mak’Obunga kod mamoko. To jo-Wanjare gitiendgi to nodhi modak kind
Suneka gi Asumbi (nitie chiro moro
kanyo matin miluongoni Nyamira). Moko bende noduogo odak ei Kodera
sani iluongogi ni jo-Matabore gidak but chiro Karogo. Kanyo bende gikikore gi jo-Mikiria mane oa e anyuola mar jo-Kabar. E
dirgi kanyo bende iyudo ka jo-Kowak moko odake. Loka aora machielo bende
jo-Maragol moko odake mokiewo gi sikul Matieko.
Yawuot Ndaya ( jomoko
luongo Ndaya ni Chien, mago duto timore nikech wechegi duto wuok e wich
omiyo pogruok nyalo betie) gin; Rabok,
Ditong’e kod Aluoch. Ndaya
nonyuomo mon ariyo. Chiege matin ne migumba (dhako maok onyuol), niluongeni Omieri
nyar Nyakach, owadgi miluongoni Aluo
to nodong’ Alego. Kane Ndaya chiegni tho to nolamo nika otho to mondo
omi Rachuonyo chiege ma migumbano mondo oriti, nikech no neno kaen ratego,
kendo onyalo rito dhakono, nimar Omieri ne ok onyuol. Kata kamano oganda
ne ok orwako Rachuonyo kendo ne giluonge ni jamwa nimar ne ok onage.
Kane Ndaya otho to min yawuoyi nodagi ni dhako
manyocha onyuomo mana gi dho nyige jakwath akwatha (ja-Kowiny)
ok nyal tero. Kuom mano ne girwako Ditong’e (Ogal
mane wuod Ndaya maduong') e ot, kuom hawi marach kane Ditong’e oriwore gi dhakono to ne gitudore (nomoko). Notem gi yien duto to notamore. Omieri nonyiso Rachuonyo
mondo odhi ir owadgi miluongoni Aluo, mondo omiye manyasi, bang’ kelo
manyasi eka ne gi pogore. Kane jodongo oketo bura to ne gi yalo mondo oket
Rachuonyo e odno.
To notimore ka hono, kane Rachuonyo oriwore
g’Omieri to nomako ich. Nonyuolo wuoyi; kane ochoponi koro odwaro chako
nyathino Ndaya to yawuot Ndaya nodagi, nito ere kaka jamwa amwaya nyalo
chako wuonwa to wan pok wachako. Ne gi ng’ado bura mondo ochak nyathino
guoge mokwayo godo, guogno niluongoni Sipul.
Mano emane obedo kak wuod Rachuonyo maduong’.