JOKA ONYANGO RABALA

Bange Onyango nodar mogero dalane kendo nokendo mon adek, monde gin: dhako maduong’ niluongo ni Tuda Nyamwa, mar ariyo Akumu Nyong’ele, mar adek Nyagone. Nyagone nonyuolo wuoyi miluongo ni Adem. Tuda Nyamwa onyuolo Beo, Akumu Nyong’ele nonyuolo Owiti to bang’ tho Onyango to ochako oyudo nyathi moro kendo ochako Onyango. Kuom mano yawuot Onyango Rabala gin ang’wen; Beo, Adem, Owiti kod Onyango.

Beo nonyuomo mon aboro, nodak kodgi edala mane ogoyo gi min mare miluongo ni Tuda Nyamwa, monde gin; Osire oba Rungu, Nyasa, Yambo, Achieng’, Achuku, Min Ologi, Wandiku kod Dhako mane okwany gi wuoyi miluongo ni Omungu (ok ayango nyinge maler). Mago e mond Beo.

Nopogo mier kaluwore gi wich teko mane chiege maduong’ nigodo kuom yuoche kod mond nyieke. Janeko mane bayo chuo g‘arungu, mond nyieke bende nogoyo mana g’arungu. Min Beo nonyise ni mondo ogol Osire oko e dala nikech oolo mond nyiego gi gero. Kuom mano Beo nogoyo mier ariyo, Osire nowuok gi Nyasa kod Achieng’, Achuku bende nodar kode nimar ne en nyar owadgi Nyasa koro ne ok onyal weyo kuma Nyasa dhiye. Kuom mano ne gidhi mon ang’wen.

 Noluong’ dalano ni ka-Beo bang’e to ne ji wacho mana ni wadhi K’Osire oba Rungu ma nyaka sani iluonge mana ni Karungu. Onge ng’at miluongoni rungu, mano nowuok kaluwore gi neko mane dhako cha obaro godo mond nyieke.

Yambo emane obedo kaka dhako maduong’ e dala mane Beo oweye min mare. Mani e dala monyuolie kwaro mang’ongo miluongoni (Ogalo ma wuon Ogada), Ogada ema onyuolo Gor.

Nyagone onyuolo wuoyi achiel miluongo ni Adem. Adem nonyombo to chiege notho modong’ misumba, bange notero chi wuode, kaka notero chi wuode chalo kama; wuod Owiti mowadgi miluongo ni Nyakuji notho to oweyo dhako miluongo ni Nyarwanda, bange Adem notero Nyarwanda kendo onyuolo godo yawuoyi ariyo; Ogweyo kod Nyadera.

Nyadera onyuolo Anyuol gi Olal. Bang’e Adem nochako onyuomo dhako machielo miluongo ni Akoth, nyathi mane onyuol bang’ tho Adem nochak nying’ dhako maduong’ miluongo ni Nyarwanda. Dhout Adem chalo kama: K’Olal, K’Akoth, K’Anyarwanda kod K’Anyuol

Mano ekaka dhoudi masani iluongo ni Kadem, Karungu kod Kanyamwa nobedo. To Kabuoch to nochakore gi ayany mane Osire yanyo godo yuore miluongo ni Owiti. Nikech Owiti ne muol, koro nosiko koyanye mana ni buojni ma nyaka ninyombi dak inyuol, mano ekaka ne nying’ Kabuoch ochakore. Nyaka sani ji luonge mana ni Kabuoch. Wuoyi mane onyuol bang’ tho Onyango chande to olal ei Kabuoch iluonge manani Kabuoch Konyango to en bende en mana piny yore.

Jagoro kendo jarit od Twak; Mikayi Adhiambo Nyar Kochogo
Copyright © 2004 by [Joluo dot Kom]. All rights reserved.
Revised: 12 Aug 2004 00:32:34 +0200 .