WACH KUOM KEND

Ka wuoyi osepong' jonyuolne gonye e chik mondo omany nyako monyalo kendo, kend en mako bad nyako mondo obed chiegi. Nyombo en ka wuoyi koro tero keny dalagi nyako moseyiero.

Jaduong’ dala pile ne siemo wuode mosegonyo e chik mondo odhi okend konyiseni nyaka otem manyo nyako ma jodalagi oriere kendo humbgi ber nyaka chakre chon.

 Nond nyako kod kido ninyalo yud koa kuom jagam; mani ne nyalo bedo yuore, waygi, kata wat moro maok nyal wuondi korka keny. Jagam onego bed ng'at ma ja ratiro kendo mong'eyo chik keny.

Kamano bende jodala gi nyako bende kosewinjo wach keny to gi manyo jagam moyango anyuola wuoyi malong'o, mana kaka wuoyi bende nosetimo. Nyaka obed ng'at mong'eyo kit wuoyi, min wuoyi, wuon mare kod anyuolane ma moko, jogam ariyogi bedo kaka jo neno kendo ma nyalo yalo kendo pogo bura komoko matek, kata kochopo ni iwero to nyaka gin bende gi bedie kendo gi wach dhogi kaka ne obedo. Ng'ato ka ng'ato kuom jogamgi imiyo lembe kaluwore gi chike Luo.

Wuod mikayi ema ikwongo gony nikech en ema oduong’ e dala, kata otin kuom nyuol to nyaka okuong’ ne yawuoyi ma moko mar tieko kwer. Nikech min'gi ema duong' e dala. Ka mikayi pok onyuolo wuoyi to kuom hawi marach yawuot nyachira osepong' onego gi kichre mondi nikech mikayino nyalo nyuolo wuoyi.

LIMO NYAKO

Jogam koro osetieko weche kuom kend, ochopo seche ma koro wuoyi dhi limo nyako. Wuoyino wuok gi jagam kodhi limo nyako, okawo wuoyi machielo bende ma bedo kaka jaduok weche. Ka gichopo e dala gi nyako to wuon keny kod jago machielono dhi e simba, jagam to dhi odgi nyako mondo owinj pach jonyuol. E thuolono jagam temo loso gi min nyako kod wuon nyako mondo owinj pachgi kaka chalo ka dipo ni pok giloko paro kaka nyocha gisewinjore motelo. Ka weche ber to jagam dok e simba kendo otero wach ne yawuoyi.

Min nyako koro gonyo nyare mondo odhi omos welo, nyako kawo nyiri moko ariyo kata adek kendo gidhigo e simba, yawuoyigo koro temo mulo tiend weche mokelogi, ka nyako oyie kodgi to owachoni; "mano en wach miyo gi wuoro". Jagam kinyne duoko wach ne jonyuol malo kowachoni; " Wasewinjore gi nyako, wach koro odong kuom jonyuol".

Nyako bende wuon mare penjo ka bende oseyie gi wachno, nyako duoko kaluwore gi pache owuon. Wuon nyako penjo jagam ka diponi jodalagi wuoyi gin joma beyo ma ok nyal chande gi nyombo, kendo jagam duoko kowachoni; "Gilong'o ok gini chandi ngang', nyako to oseyie, wach koro odong e lwetu un jonyuol". Bang' mano jagam kod yawuoyi ariyo kande dok thurgi kendo giikore mar dok mako nyako.

MAKO NYAKO

Jodalagi wuoyi koro oro jomeko mondo odhi thurgi nyako, giterone dayo mich moro matin (nalo) kuom duokone godo erokamano nimar en ema nyocha nyako nindo ode. Kawuon nyako kata min onge to ok ginyal kawe ngang'. Nimar en kwero ka nyithindo riwore motelo ne jonyuol.

Gidok nono kendo gichano mar biro kendo. Ka gisewinjo ni jonyuol nyako oseduogo, ginyalo dok mako nyako, mokwongo gimiyo dayo nalo kendo ka yawuot gwengno odagi ni ok gidhi gi nyako to nyaka gimigi nalo bende, korka inyalo wenegi nyako gidhigo

Ka yawuoyigo osemako nyako mokelo dalagi wuon keny, to nyiri luwo bang' nyargi, nyakono ok nyal chiemo nikech kihondko mane ogoye goywak e seche mag meko pok orumo. Chieng' ono gotieno iriembo nyiri kod yawuoyi matindo, kendo iyiero nyiri adek mosekendi kod yawuoyi ariyo mosenyombo mondo obed kaka joneno  mar ringre nyako.

KETO NYAKO E PIEN

Nyirigo pielo wuoyi e pien, nyako bende kamano. Nyiri kod yawuoyi kande osebedo kaka joneno mar ringre nyako, koro giriwore e ringruok achiel. Kuom hawi marach ka wuoyi otho maok nyal loyo tich ringruok to wuon ywaye oko kendo yweye gi nyapong’ kolamone mondo obed dichwo. Ka mano pok otimore to nyiri kod yawuoyi ka ok wuogi.

Ka mano osetimore to ikawo ringre nyako iketo e balategni ang'wen kendo iluongo yuore moro mondo obed janeno mar nyiri kande. Bang' yieruok e kind yuoro kod yawuoyi to nyiri wuok ka goyo sigalagala ka gipako nikare nyargi yande okano ringre maber. Kinyne giwuok ka giwer, kendo giting’o balatago achiel ma gidhi nyiso monde owetegi nyako kod deyene.

E seche ma gichopo dala to mond owete gi nyako romone nyirigo gi sigalagala kendo giwirogi gi mo ka gikiro nyim e ng'utgi nimar nyargi oseloyo, jonyuol nyako romone nyirigo kendo gibukogi gi buru mano nyiso loch ma nyargi osekelo. Kuom hawi marach ka nyako ne ok orito ringre maber to onge nyasi mitimo en wichkuot ne jonyuol kod jodalagi duto.

Kendo bang’e wuon nyako nego rwath; gisango lemo mopogore opogore,  Ka gisechopo to nyiri adek man gi kuon nyako dong' oko, to nyiri ariyo dhi omo nyako e simba mondo odhi ochiem. Lemo ma moko mane okel to itero odgi wuoyi malo. Yawuoyi mane oting'o ringono ok chame gin giboto thuon gweno garungu mano ema ilosonegi kaka migago, mond dalano to dhi chiemo gi nyako e tiend yath moro oko. Yawuoyi kande dok thurgi.

Nyako riyo dichiel, bang'e nyakono wuok gi waymare kod chuore kendo gidhi ir wuon odgi, kendo ipedhonegi pien gichung' e pienno, kanyo ema gi goloe chiwo margi korka chiena. Gichung’ kama; nyako chung’ e bad wuoyi koracham, to way nyako chung’ e bad nyako koracham, nyako bedo diere.

Bang'e yuor wuoyi wirogi gi mo kendo kiewogi gi nyim. Bang'e otweyonigi buombwe kato en bende otweyo mare, min wuoyi bende otweyone. Bang'e nyasino gi wuok gi diel, ok onego gi raw kamoro kata koth chwe kata mudho olil nyaka gichopi thurgi nyako.

Kadok chien matin daher mar lero wach kuom kend miaha gi kit chiemo ma itedone. Ka nyako odonjo onindo achiel kato kiny itwene onyimbo kendo chi yuore moro chweyone chieno, kitweyo chieno to nyaka chiw diel sibini kata nyuok, yuore moro ema chiwore golo diend chieno.

Diendno nyar wuon ema kawo. En wach matek ahinya mako nyako nimar seche moko en gi kihondko kaluwore gi ywak mane oywak ka jomeko kele. Onindo kech mak ochiemo kinyne seche mag onyango to inudone nyuka. Godhiambo to itedone kamongo kata ring'o, kata a lot dek, sewu, a lot boo mago kende e chiemb miaha mochamo nyaka chopi odogi. Kendo chiemb miaha ok ted gi mo.

Ka miaha dwaro dhi riere to rawera ma nyako ema wuok kode kotelone kendo koduogo bende kamano, nyaka chopi odog thurgi. Nyathi ma nyakoni ema chiemo kode ok onyal chiemo kende. Yawuoyi mathoth ahinya biro budho miaha mondo gi ng'eye en bende ong'egi kendo ok oyiene ji mondo owach weche maricho machalo ayany, nimar mano nyiso kido marach ne jodalano. Ji duto chanore kendo gi bidhore gi lewni mabeyo.

RWAKO NYAKO DALAGI

Ochopo thuolo ma koro itero nyako thurgi, wuodhni chwo ok dhiye. Mon gi nyiri ema terogi nyaka gichopi dalagi nyako. Ka gichopo dala to irimonegi e dhorangach irimonegi gi mondgi gi nyiri mane oterogi wuoth ka giwer kendo gipamo lwetgi. Ka nyako osekalo dhorangach to ochung' e dir rangach koracham mondo ong'olne gweno; wuod wuon moro ema ng'olone gwenono. Wuoyi ma dhi ng'olo gwenono ok wuog e dhorangach, ituchone rot moro ema odonjogo e dala.

Nyako chung’gi waymare ma ne aogo kaka chuore, gikanyono ikelone kong'o modhing' e agwata kendo obilo matin. Waymare bende bilo kong'o bang'e omiyo jatwe buombwe, bang' mano ikelo nyim gi mo mondo owirgigo kendo kir nyim e ng'ute. Chi owadgi ema timo mago duto. Bnag' mano chi owadgi toyo sigalagala matek kendo oumo wiye gi okumba, koro gike kendo gidhi pacho ka mon nyono gi wer malich ahinya.

Gi kanyono gidhi dwaro dhako ma ja yath mondo omiye yadh chira, itwang'one yadhno kod min mare bende, kendo gimadho manyasi kanyakla. Mano eka oyiene riwo lwete gi min mare kochiemo kode e tawo achiel. Kochakore odiechieng'no ok ochak odonj e kachiend min nimar koro en migogo mosekendi. Kuom hawi marach ka dipo ni odonjo e kachiend min to ka oyudoni min mare pod nyuol to koro nyote ng'adore gi kanyo. Dech min mare bende koro ok odonje.

Mon gi nyiri manyocha okelo nyako nindo ariyo bang'e imiyogi kong'o kendo bang' chiemo (inyalo neg dhok ariyo kata adek luwore gi kar kwan welo) kendo gi madho kong'o koro gi dok gi onyimbo mane nyako obirogo.

Gidok gi nyako nikech nokele gi diel, kendo onindo adek kato bang'e ochako oduogo kendo. Kane ok okele gi diel to ok odog kodgi.

Bang' ndalo ang'wen jonyombo dhi gi dhok ariyo rwath gi roya, wuon keny (chwor nyako) turo negi powo kendo gisembogo roya, royani iluongo ni dher kede, ok nyal gole e dalano nyaka onyuol. Magi dhok mohango keny. Jo nyombo chiembgi maduong' en gweno kata chiemo manyocha odong' e nyasi mar rwako nyako bende inyalo ted nigi, mak mana chiembgi maduong' en gweno. Ket powo mane wuon keny omiyogi gidhi gichwoyo e  wi tado tielo odgi nyako  Jonyombo ema dokgi onyimbo mane nyako obirigo.

Bang' mano chuor nyako koro nyalo mana nyombo. Ka dhok oseromo to nyako onego dog limbe thurgi. Mago duto timore nyaka chopi thuolo ma koro irisoe nyako, riso ema chalo kaka arus mar jaluo. Mano nyalo mana timore ka wuon kisera osedhi okwayo joodgi nyako koyie mondo orise. Ubiro somo wach kuom riso e migawo maluwo ma. Nyako nyalo wendo didek kata di ng'wen kapok owuoyo gi wuon odgi.

Ka nyako osedok limbe bang' nyombo to odhi gi gweno; ranyisi mar duoko gweno mane ong'ol e dhorangach wuon mare kane odhi thurgi e limbe mokwongo chande. Bang' limbeno chuore nyalo ikore mar dhi molo e dalagi nyako mar kisera; otero roya gi rwath.Wuodhno onyalo choko ji buora nyaka yawuot dalagi gi jo libamba bende; kar rombgi nyalo romo ji piero ariyo kata piero adek gi wiye moko, gi jathum (janduma) nikech puch oting'o chuor nyako.

Donjo e dalagi gi nyako; nyako moso welo duto to oweyo chuore mak omoso; chieng’no ji mor e dala mangima, rwath oyang', nduma obagi, ji mor ahinya mar rwako wuon kisera. Kinyne itero welo e puodho, to chuor nyako to dong' gi ng'ato achiel. Jagam bende nyaka bedi e budhono mar ng'eyo kit jamni monegi ne welo.

Bang' ndalo ariyo kata adek to budho orumo kendo gidok thurgi; chieng' nego rwath nyako pando ne chuore chiemb ngege, ochiemo kode kendo mano e thuolo ma onyalo wuoyo gi chuore. Kinyne min nyako tedo tap siwina (min abiera), kata tawo maduong', ma rom gi nyalaro (oswaro maduong'), gi mo mool e tawo malando.

 Kanyo ema wuon kisera chieme gi yawuot libamba manyocha ochoko wuoth, mondo one lwet min nyako; kar rombgi nyalo bedo yawuoyi ang'wen gi en timogi ji abich; bang' mano korka oluongo yawuoyi ma moko mondo obi ochiem.

Kachiemo oserumo to jathum koro sewo pacho gi nduma maiye odich, nyako huwo chi owadgi diel sano. Oting'o diendno e agoge korka ochiwone. Mano nyalo bedo limbe mar adek, kendo kanyono wuon kisera kwayo riso kuom joodgi nyako. Bang' mano ka giyie to enorise e wuodhni.

RISO NYAKO

Ochopo thuolo ma koro wuoyi osetieko wuodh kisera, kendo oseduogo thurgi. Otemo keto wach e nyim jonyuolne; min gi wuon kuom wach mar riso, nimar joodgi nyako noseyie mondo oris nyargi. Ka jonyuol oyie to koro gimanyo rwath maduong' ma nyako nyalo yie. Onego obed rwath ma buoch.

Koseyang'e to igolo ring' agoko, dho-remo, gibulo e mach man kachiena, kosechiek to kwar nyako kawo bolo tielo, gi dhoot, ei odgi wuoyi. Modong' to kwaro chamo gi wuon odgi nyako. Modong' to gibolo ne juogi (jomotho). Kayeng'o oserumo gigolo nyambich kor chak , chino, chuny gi ring'o moro matin kendo igoyo ohiwu ne nyako, mano e chiemo mokwong'o. Chiemono ochamo gi mogo mane oserego owuon.

Bang'e isang'o ring'o madhi thurgi nyako, kamano oserumo to itoko ring'o mane osetedi mar ohiwu itero e simba, nyako luong'o mon ariyo gi nyako achiel mondo gi konye chiemo. Ka gisechiemo to ji ting'o ring'o tero dalagi nyako kendo ka gichopo to inego ne gi gweno.

Ka joter ring'o duogo to gi duogogi nyiri manyalo romo piero ariyo gi wiye. Kinyne nyirigo rego gi duto. Nyar kirisa ema kuong'o rego mar tieko kwer eka nyiri ma moko rego. Kar tekre mon (seche mag odhiambo) yudo ka chiemo osechiek, nyiri koro dhi odgi wuoyi ka gi rwakore malong'o chuth.

Nyako biro kotweyo onyimbo gi chieno madit. Ka ji osebedo piny to chuor nyako donjo gi diek ang'wen; achiel mar madho nyuka (en odong' dala kanyo), adek modong' nyirigo tero thurgi nyako.

Yawuoyi koro biro e nyim nyirigo kabolo odeche, minyonge gi bonje, kar rombgi, ng'at mosebolo to ng'wenyo kuon, mano itimo mondo nyiri ochiem, nimar kaok gi golo chiwo moro amora to nyiri ok chiem. Nyiri nyaka tang' nimar yawuoyi nyalo tieko chiemo. Kinyne nyiri dok thurgi kendo nyako dong' mondo mond nyieke orise.

Odiechieng' riso, itedo chiemo kosechiek to nyieke dhi ome e simba eka ipike e od wuon odgi. Obedo e pien katung' eka nyieke kwaye mondo ochiem, to oduoko, ni odwaro gir ng'iyo tado eka ochiemo, nikech yande pok ong'iyo tat wuon odgi.  Wuon odgi biro kendo kelo kwer mar nyaimbo,

Kweno otero ne min, koro onyalo  chiemo. Bang'e koro ipogo chiemo ne mond nyieke koro gichiemo. Ka chiemo oserumo koro nyako tamore wuok dhi e simba nyaka miye dhiang', Kwar mare chiwo dhiang' eka owuok odok e simba.

Ka ring'o osetuo to otero tawo thurgi gi ring'o ma nobambo gi kabaka. Koduogo to obiro gi mogo, jokel nindo ariyo bang'e gidok. Bang' mano wuoyi luong'o nyiri onegone gi rwath miluongo ni awuoro, ipogogi ring'o gi dhigo thurgi, min nyako iterone ywer gi agoko.

Mano e kaka wach kend chalo e piny Luo ndalogi tinde bet opogore matin kaluwore gi kit dak masani ji odake, jomoko odak e bombe madongo kaka buore Kapango (Nyorobi), Nam Chumbi (Mombasa) kata e pinje mag Ulaya gi Amerka. Omiyo ok wanyal luwo chikegi duto. Mak mana nyombo (tero dhok thurgi nyako) to pod itimo kaka pile ma ong'e lokruok moro amora.

Jekonia Orodi, wuod Kochogo Apondo.

Luor chakore gi e dala, mihiani yande aromogo ndalo mane atemo choko weche kuom kit dak Luo ei piny Kano.

KIT DAK MA JOLUO ODAKGO BANG' MAKO PINY NYANZA

Kaka asetemo leronu tuk mar joluo nyaka gi chopo piny masani gintie, Nyanza kod gwenge mokiewo kode kaka dir Tanzania ma nyanduat, Transmara distrikt. Lokruok e kit dak osebedo e piny Luo kaluwore gi biro mar jarachar (wasungu) higni mia achiel mokalo; 1899.

Kane Bwana Obilo (Holby) ochopo e piny Uyoma lweny nochakore kendo jorachere nonego yawuotwa mathoth ahinya. Kata kamano jo Sakwa nokonyo jo Uyoma lweny kendo mano nomiyo jorachere tich matek ahinya mar kawo piny Luo.

Jarachar nodonjo gi din mar Kristo to jowarabu bende okelo din mar Islam, kata kamano din mar Kristo emane okuongo ei Nyanza. Kane din ochopo oganda mathoth nodonje kar rombgi. Sikunde mar praimari (primary kod intermediate) noger e gwenge mane din okwongo chope  kendo nyithindo noyudo tiegruok mar rieko e yo mayot ahinya.

Weche mabeyo mane jorachere okelo gin sikund rieko, osiptende, masinde mag rego cham, matoka kod ma moko. Kata kamano jaluo ne ok orwako pach jorachere duto moko ne gi dagi kendo thothji mane odonjo e din notamore weyo ngimagi machon mar tiyo gi bilo (buru) eyore mag tieko ngima jowetegi. Kata nyaka sani jokristo manok ahinya ema ok dhi ajuoga.

Nyasach jaluo maduong' en yath ma ajuoga nyalo chiwo. En e tich, en e bedo jaduong' kanisa, en gik moko duto ma ng'ato nyalo dwaro e ngimane, mano miyo dongruok osedok chien ahinya ei Luo nyaka sani. Kata jopuonjre, johala, jolendo, ruodhi, karande, japuonj kod ma moko pod ogeno tich ajuoga. Mano thiro dongruok ei piny Luo.

Yadh dongruok en tich matek gi ratiro kendo chuny moyangore maonge akwede kata guondo kata ich lit kata imruok gi nawi. Kama ng'ato onego konyre gi obuongo mondo olo chandruok to odhi ka ajuoga. Timbegi osemiyo dok chien osebedo ei gwengewa. Kendo mano ema osemiyo dongo e yor jogo ma welo osebedonwa matek putu.

Wakweduru jachien gi richone duto mag nawi, nyawo, achaya, akwede, guondo, gombo, mibadhi, imruok kod ma moko mosekelo dok chien e piny Luo ma ngima. Onego wakaw nyak mar olemo mane jorachere okelonwa e yor tiegruok kendo yudo paro mar dak e piny masani.

Mano ok monwa rito chike kwerewa, mak mana kweche moko ma nono ema onego wawe chuth ma ok nyal konyowa kata matin. Din to hero ng'ato kiyie kuom Kristo kata iyie kuom ng'at ma nade to tek mana ni irito kit ngima maok itimo ne jowadu marach moro amora. Din konyo yore mang'eny kendo oketho mathoth bende.

Din okelo pogruok e gwengewa; kiwinjo ni mano din joka ng'ane kata mano din jowuoro, kata mano din jo mwandu; ooyo, en chuny ok en ot, ok en pesa, ok en rwakruok, ok en nyadhi! Yie madieri en chuny dhano, Nyakalaga ema ong'eyo kaka in ja ratiro ka luwore gi ranyisi mimiyo ogandani.

Chamo nyadhi kod owuora bende oseduoko joluo chien higni mathoth ahinya; kuom ranyisi wuod Luo ka oyudo tich mar karan kata maneja maduong' e kambi moro buore Kapango to nyaka otem nyisore matin e kind yagi; moloyo kar math.

Gitemo ting'ore malo ahinya kendo gi rundo thing' kar rombe, mago duoko dongruok chien; beduru kaka jodhoudi ma moko ma ka ng'ato odhi e kar math to otingo minyonge moko matin mar leso buoyo moro matin, to ok mar rundo otia ne joma obiro metho mana mar nyisruok ni an ng'ane wuod ng'ane ma tinde omako kama kama….!

Mar ariyo jaluo ka nigi pesa matin e kirowo to wang'e koro liekore ma koneno nyako moro mane obiro e od math to osening'one wang'e mago gin yore ma sani onego wawe, piny osebiro matek. Weuru owuora gi nyadhi mag ketho mwandu. Tuoche bende tinde opongo piny. Ayaki Matieka ok oyiero koda in jachan kata jamoko!

Weche mang'eny manyien osebiro e pinywa kaka; puonjruok, tich kod bedo e buche mopogore opogore bende. Ka idwaro yudo konyruok kuom gigi duto jakony en achiel kende; tiyo matek; ok en nawi, imruok, ajuoga, guondo kata mibadhi. Ok en sungo mwandu e od math kata e kama obage nduma kifuwo wuon thum pesa ma galamoro mana mar dwaro nying'!

Ok en dhumo dho-wasungu; en kit jaluo kosemadho kong'o matin to kata ng'at mane ok onyono sikul to korka dhum otuchne; iwinjo manani fwot-fwot….! Yani by the way, anyway, actually….! ema koro pong'o ot. Mago duto ok kony, gima duong' en dimbruok.

Ka wang'eyo ni yot mar ngima en tich, onego wang'e bende ni adier dwarore. Tiyo matek kod kuo ok kel dongruok kata matin. Bende onego wang'e ni tich ma watiyo en mar piny duto; ok en mari kata mara kende en mar oganda, omiyo kik wiwa wil gi adiera kod tich matek.

Kaka thoth yawa sani oseng'eyo ber minyonge omiyo ji mang'eny nigi gombo mar bedo gi mwandu eyo ma ok ni kare. Jogi ema oseduoko dongruok chien gi yore mag kuo kod yako gir oganda. Gitemo sombo weche moko ma nono kendo gi berore e nyim jotendgi mondo ohergi. Ka ionge ratiro to dongruok bende ionge godo, tich ok sikie tem paro ma kiny kik isik wiyi aming'a. Kawuono en mara kiny en mari; pon alawa; obiro ka kodh yamo.

Kido moko bende nitie mosemono joluo dongo nyaka sani, en wach akwede kata obedo ni jorachere mane okelonwa ngima manyien kod riekni mabeyo to ohero timni ahinya, nimar tije mabeyo gin emane gidwaro mondo gi ti, to jarateng' to mondo osik kaka misumbane ndalo duto.

Koro sani mano oserumo; loch jarateng' koro chal ka nono nimar pod wan'gi akwede mag anyuola nika thuolo oyudore kama intie kaka jatelo to itemo mana keto anyuolani kende; kar manyo joma nyalo tiyo tich maber to idwaro mana wuod gweng'u kata watni moro ma ok olony gi tijno. En gima ber konyo anyuoloni mak mana ka gin gi tiegruok kod lony e tijno. Kaka jatelo matiyo ne oganda kik onego iluw tim marachno; okelo achaya gi sigu e kind oganda.

Chutho joluo mang'eny ogalore agala kata wengegi pok oyepo mar neno rach gi ber, duto othonegi mudho; thoth jopiny ma bedo e kombe mag buch gwenge iyudo ni gin joma yoregi ok oriere tir; moko jomibadhi moko bende nigi achaya mar chuny; nito ng'ane to nigi ang'o ma ditong' duoka; mago e joma iwinjoni ka yiero ochopo to oganda miyo ombulu bang'e to rito tijno tame.

Kata ng'ato ong'ere kaka jahaw mond ji, kidek winjo ka ji pake to en bende onyiero, omor, kendo oneno mana maber. Kata ng'ato en jakuo bende kamano. Kidek yudo ni en giluor kamoro ma ok di chopie. Kamoro e thum ji mathoth nenore gi jothum ka gisiemone ni jalo (jakuono) ok dhano adhana.

Tich Moro kobiro midwaroe ng'at moriere to ineno mana ka ji weyo wuodgi mariek to ng'atno (ja mibadhino) ma kite rach to ineno mana ka ji gone ombulu. Koro mano ere dongruok ma jaluo nigo? Kar yiero ng'at moromo tich to giyiero ng'atno nikech hudhruok ma onyisorego e kind ji!

Joluo onego ne tiend chandruok ma gin godo korka ginyalo geng'o chandruok nogo. Ka laktar ok ong'eyo tuoni to onge kaka onyalo thiedhi kata ka ok inyise to ere kaka onyalo ng'eyo gima chami? Kamano bende pile ok wang'eyo gino ma wadwaro chutho. Kuom mano kata ka tich moro nitie ma dwaro  ng'at mojing' to ji giwegi ok ne. Ng'ato ka ng'ato umo mana iye piny ni owadgi kata wuodgi  e ma mondo oyud tijno: Kata oonge rieko mar tijno to iredhe  ni en e wuod oganda maa!

Ndalo mokadho nyocha aneno ka yiero mar ruoth e dhoot mar Kanyango ei Kasipul nyocha obedo matek ahinya nimar ji ariyo ne laro kom ruoth; wuoyi moro yande oyier nikech owetege gin joma otimo not, to mikayi mane larore kode to nodong' nikech oonge gi joma nyalo dhi goyo dho jotelo bor!

Kar yiero ng'at moromo to iyiero ng'at morem nikech en wuodgi ng'ane! Mano dok chien miwuoro. Wuoyino nyaka ne yiere pok okelo dongruok moro amora e gweng' ji bende ok dware iye kwar ok ong'eyo kata wuoyo gi oganda. Ng'at ma kamano ketho kinde mare, kendo mar ji duto man'gi tich kode, to maduong' oketho piny ma ngima. Nokete e tich nikech dwaro mar oganda ma muofu kendo ma ok ong'eyo tiend tich mane onego oti.

Ndalogi pinje Luo dongruok dok chien nikech jotelo motelo e gwenge neno mahuyuhuyu; ok gi yawo pachgi mar kelo dongruok. Samoro iwinjo ka gi wachoni ok gi dwar ruodhgi moro to ka ipenjo ni ang'o momiyo ok dware to kidek winjoni en jachan, kata ni osetiyo aming'a, to kinono malong'o nito dhierneno to timo ang'o marach to ginyisi ni ok onyal tedo chiemo ne jopiny kata rwako welo malong'o; kata ni ok onyal nyuowo kong'o ma jopiny nyalo madho nono!

Koro mano to dongruok mane? Kar dwaro jatelo to gidwaro jatedo! Kar dwaro jabura to gidwaro ng'atno ma koro oyie nyuowo kong'o mimadho mak rum. Kata e sikunde bende gik ma kamano timore; jogweng' nyalo dhawo gi jotend sikul nikech gidwaro mondo wuodgi ema obi opuonj e sikundno.

Kar dwaro japuonj to gidwaro mana wuodgi. Ka wang'iyo mago duto to onge kaka wanyalo gerore e gwenge ma wadakie. Kata e ofise mag sirikal kidhi penjo wach moro to inyisi nito dak igol gimoro matin mar neno jatelo; koro apenjoni kare jatelo oyier to ka idwaro nene kendo ichako ichulo mana pesa? Nyikwa Ramogi yawuru pachu kik ubed jogo mohero pesa, guondo, akwede, asoya kod ich lit.

Jopiny onego ng'e maler gima gidwaro kendo mar yiero ng'at molony ma nyalo tiyo ne oganda maonge akwede kata ich lit. Ok yot yudo ng'at mojing' ma nyalo rito tich oganda, samoro bende iyiero jomoko kata ka gikia tich ni dipo ka otegno mos mos e tijno. Wach monego ji ng'e en nika iketo ng'at makia ndiko nyinge mondo obedi jagoro mar bura ere kaka inyalo keto ng'at mane pok oneno mipira mondo odhi obedi jadiere e mipich laro okombe mar gwenge. Kaok waloko pachwa kuom wechego to pod wabiro mana dok chien.

Gik moko duto ok bed mabeyo, kata kamano ji onego tem mondo oyaw wengegi mar neno gigo maricho kendo mar bedo gi chuny mar losogi. Puonjruok osebiro e piny kendo en gima ber ahinya; kata kamano puonjruok kitgi ng'eny; nitie ng'ato nyalo puonjore mondo oyak gi ji kata mondo obedi abele wafuye; jalo ma ok ne gir ng'ato mak ogombo ketho.

Nitie ng'ato bende nyalo puonjore tiyo ni Were, ni ji kendo ni en owuon Kuom mano puonjruok ma onego wayud e ndalogi ok en mana mar ng'eyo kwano, ndiko kod dhumo dho wagunda, kata bedo gi digri (degree) ma malo kende. Mano chal ka nono; gima duong’ en ni nyaka wang'e ni "dhingo iro ok en tedo."  Penjri e chunyi nito sombi konyo joluo nade, kata dhumo dho wagunda ma sani ji dhumo nyaka raura konyo jopiny e yo mane? Tem mondo sombi okel lokruok ei pinywa nimar welo ok nyal kelo dongruok e pinyu ka in to ing'anyo gi oko.

Rieko ma kare en mar luoro jachwech; Nyakalaga, luoro gir oganda kendo mar tiyo gi chuny achiel mondo wager pinywa. Kain ruoth to ti ka ruoth, japuonj oti ka japuonj, karan oti kaka karan kod ma moko, samoro inyalo neno ka ng'ato en japuonj to kar puonjo rawere to en oloko nyithindo ma nyiri monde ema onindogo, moko bende miyogi ich kato somb nyithindwa kethore kamano.

Sani to koro ok en gima lich mako ich. Tuo moro koro osebiro mayweyowa pep; ayaki matieka, ok oweyo ng'ato omiyo tang'uru joka nyanam. Jotelo mondo obed ka jotelo ma rawere matindo nyalo kawo ranyisi kuomgi, to ok ma ja ajiendeke ma timbege en mar yako kendo ketho gir oganda.

Weche moko bende nitie mosekelo dok chien ei Luo ma ngima; kuom wach mar chike kod kweche; ka idwaro timo gimoro to iwinjo mana ni mano kwero, gini ok tim, mano pok otimore ei Luo nyaka nene, ma pok waneno wang'ni wananeye kod ma moko…! gigi duto duoko dongruok chien. Chike ma nonogi luwo Luo ka moro amora ma gintie obed; Kisumo, Nyorobi, Uganda, Tanzania kod pinje ma moko.

Kwechegi osemiyo ji otimo timbe ma dongo miwuoro; inyalo neno ka ng'ato muko ode motero pesa mathoth ahinya nikech owinjoni kweche moko omake ma ka onindo e odno to wang'ni ok ocham opon kata ma higa. Adieri nitie moko manyalo moni dak e ot to kata kamano onego ikwang' inon malong'o kapok imuko odno nimar gedo ok en gima yot.

Ndalo moko nyocha adhi e dala moro ei Kokal but Oyugis ayudo ka dala udi oteng'ore to ka apenjo gima omiyo ok nyal umgi to wach kwer ema inyisa, ni nyaka nyocha wuon pacho tho pok otiek kweche mag liel. Koro miyo moro e dalano to neni gi nyathi matin; koth korka ochako chwe nyithindo ywak malich to kar buok onge, tuoche koro nyalo mako nyithindogi nikech wach mar kwer maok nyal konyo kata matin.

An awuon ma andikonu wechegi ok anyal nindo e dala wuora nikech kweche moko maok nyal kelo dongruok kata matin, koro ere kaka wanyalo yudo lokruok e ngima masani? Chike Luo moko beyo to moko to gin mana mag dok chien. Temuru weyo kweche ma nonogo. Nimar chon gi lala jaluo ne ok rwak nanga sani waruako lewni mabeyo ahinya, sani wanindo e kitanda chon ne wanindo e pien, lewni ma warwako sani beyo kendo  nengogi tek, koro ang'o ma miyo ok wanyal loko chikewa mana kaka ne wayie weyo rwako omethe, chieno, abola kata asemba kod chip, Nyikwa Omogi onge dongruok ma biro bedo ei Luo ka ok waloko pachwa kuom chikewa machon.

Kuom wach mar tho onge ng'at ma nyalo geng'o mondo ji kik tho. To duogo e liel, tero buru, tero mon, nywowo kong' yawo dhoot, yang'o dhok e liel kod nyuomo mon mathoth to wanyalo geng'o. Pile jogo man'gi liel ema dong' gi ting' mapek nikech pidho welo mobiro e liel. Tedo chiemo ne welo ok rach mak mana ka owinjore to inyalo los gimoro matin ne welo moa mabor.

To jogweng' to nyalo dok chiemo e miechgi. Gima ber monego watim en mar konyo chi liel gi nyithindo modong' kiye kod jamni, chiemo, lewni kod gik ma moko, moloyo yako kendo ketho gi ng'at mosetho; kawuono iyako gir owadu motho kiny to en mari in ema nyithindi biro chandore kendo lepi gi mwanduni ema ibiro yaki. Chiegi biro dong’ jachan kendo kata ot modake inyalo riembe nimar oweteni koro yako mwanduni.

Oyieyo machielo mabiro ng'ado nyabondo mar mwanduwa en ma. Adier ji nyalo ketho giwa ka watho to wan wa wegi to? Watiyo mondo wachiem kende koso mondo walos piny ne nyithindwa ? Duoko mar penjni en in gi an ema nyalo duoke; onego walos ngima mar pinyni obed mayot ne nyithindwa e ndalo mabiro. En ng'wech to kuma ochomo ok wang'eyo kinda ema biro miyo waloyo.

Tim gima iparo ni diher mondo otimni, ka in e chandruok kata e dhier. Katieko to daher mondo weche duto masewacho malo go omedwa mijing'o mar tiyo gi kinda kendo bedo gi chuny moyangore ka wasumo timbe mabeyo ma oganda ma moko lowago, kik wapar ni marwa kende ema ber, loch ochwere. Nyakalaga mondo otau ndalo duto.

THO TIENDE ANG'O?

Tho en wach ma lero tiende tek gi dholuo ahinya, wachni osebedo ka chanda ahinya koro nyoroni to nochopo ka wuod omera mokew Sigoti, Otieno Ong'ele wuo'Aluoch ema opowore gi wach ni wuoyi moro mayande bende asebedo ka wabayogo ndalo mane pod wan rawere magoro omo, mano yudo ka juma mokadho bende aseiko nyathi nyamera; Anna Achieng' nyar Asembo Kokise. Koro tinde kisomo gaset to en mana wach tho ema opong'o iye. Kare tho en ang'o? Kipenjo ji dala nito ng'ane mothono ang'o ma onege? Duoko en ni: Nyocha otuore marach rach. Ato mano bende doko wach? Marach rach to tuo mane?

Nitie tho adek ma ang'eyo gi dholuo, gin; THO en gino madong' bang' koth komoko e it lum kod oboke mag yiende, en donge moro matin mar pi. Mar ariyo THO en wuoro gimoro ka omako dhok ma kaka pim onge iwinjo ka ji wachoni; “Tho….! Mano doko tim”. Mar adek ma koro adwaro lero tiende en Tho ma ka chuny ng'ato ochot ma ok ochak oyue kendo nyaka chieng' to ji wachoni ng'ane chunye odhi, tiende ni otho! Giko mar ngima dhano e pinyka en tho mar adek ma koro adwa lose adimba.

E pinyka nitie migepe adek mag kit ngima dhano en; nyuol, kend kod tho. Konyuol nyathi matin to ilamone ngima ma kare kendo itemo pidhe maber mondo obed ng'at modimbore. Kend en rang'iny mar ariyo e kit ngima dhano nimar en e migawo ma kelo nya mar olemb ngima ka dhako oriworegi dichuo kendo gi loso kodhi mar nyathi.

Ka nyathini osedongo to obedo ng'at ma ng'ongo kendo koro ochako yore mar dak owuon. Migawo mogik kendo ma ji oluoro ahinya en mar tho, nimar nyuol ginyalo neno kaka ng'ato dongo kendo ng'ato nyalo yiero nyako modwaro, nyuol bende jomoko nyuol kohero moko bende konyore gi yiend rieko mar sayans mi okom nyuol eyo modwaro, mar tho to onge dok chien kata yiero gima idwaro, obiro samoro amora koda inindo koda ichiemo koda iwuotho.

Jaluo goyo ngech tho kaka ne dwe ooro wach ni mondo omiye bor marachar dher! Richo mane dhano otimo momiyo tho obiro e piny en ma: dhano noor ongong'ruok mondo oter bor e polo. Kuom hawi marach ongong'ruok nodwanyo bor e buru kane ochopo e polo to dwe notamore kawo borno mano ema omiyo ongong'ruok wuoth ka luro nomiye kum ma nyaka chieng', dhano bende nowachni biro tho to ok nochier kendo Dwe to podho bang' ndalo adek to ochako otuch manyien. Kata kamano ngech tho ng'eny ahinya. Kapok adhi mabor daher mar lero matut migepe mag tho madongo ma onego wang'e.

Mokuongo: Ka ng'ato tuo ma chunye gudo to iwinjo ka ji wachoni chunye chot to chako duogo. Mano ok tho, en mana kit yweyo mar dhano ema lokore. Ka adundo ochung' maok nyal tero remo e fuonde mag del to pod inyalo miye muya mochak ogwechi. Ka mano otamre ma chuny ng'atno ochot to dhano mboro ywak matek ka gi wachoni oweyo wa malit! Tiende ni otho!

Mar ariyo: Masira mar nyamburko nyalo miyo chuny ng'ato chodi apoya nono kaluwore gi buok mar masirano; samoro ji nyalo ng'ado ni osetho to kare pod chunye gwecho matin tin. Kiondko nyalo miyo adundo chung' kuom thuolo manok.

Mar adek: jodongo moko moseti ahinya thoro tho eyo ma ok ji ong'eyo onyalo biro e yor nindo kata eyor ayula wang' to mano e kaka chunye dhi. Ng'eny jodong'o ong'eyo chieng' thogi; mana kaka tho Mig. Okullo wuod Abong'o ma wuora ne ochalo tugo; kane ochopo chieng’ thone nokwayo mondo otere oko odhi obedi e laro kane waparoni samoro tuone omedore to ne watemo yore mag tere osipta Gendia kane wachopo e kor yo, mano oyudo wadhire gi gach othiwi miluongo gi dho-ngere ni wheelbarrow, owadwa mane wakonyore godo; moselal Tom Aloo, jaduong’ nokwayo mondo oywe matin kare mano emane obedo kaka yweyone mogik. Nowacho ni; Nyasayeni dak kaw chunya piyo? Nochalo kaka tugo ka pod waling' matin to kadiemo wang' jaduong' notetni dichiel matek kendo e kaka chunye nodhi ka pod wamake mondo kik opodhi. Mano nomiyo aneno kit tho gi wang'a ni kare ok en gima kawo thuolo kata matin. Kaka dhano ywayo muyo kendo golo oko e kaka tho bende biro, inyalo ywayo muya iye to ka igolo oko to e kaka chunyi odhi chuth.

Gima duong’ ma pok alero en nito tho kare en ango? Tho en Ka ringruok pogore gi chuny maler (tipo) miluong'o gi dho-ngere ni "soul", en kit ngimawa e yor chuny nono ma onge ringruok en ema oyudo puoth mar nema kendo odhi e chwech mar kido bang'e ka ringruok oseweyo chuny maler, tipo. Tiponi fuyo e kor lwasi kendo okonyo chuny ma pod ngima e pinyka yudo nema mar dak gi kwe. Bang' tho tiponi riwore gi Nyasach kwere e kom duong’ne kendo gi poro weche kanyakla. Timni maber e pinyka ema nyalo miyo tiponi obed gi nema ma kare. Ng'ato ka ng'ato ma pod ngima e pinyka nitie gi tipo mar nema maler ma rite.

Tiponi Konyore gi muya moro miluongo ni nyakoyi. Kata jo-katholik gi dinde mane jo-rachere okelo luonge ni ROHO MALER. Muyani konyore gi tipo ma jokristo luongoni Malaika. Koro kuom adieri tho mar pinyni ok en tho mar chuny en mana mar del kende, nimar del osejony nikech tuoche, kata masira mar ndara, negruok gi bidhi gi ligangla mager manyalo miyo remo cher, kata tiyo nyalo miyo ringruok pogre gi chuny maler, tipo. Tiponi pod medo dak e ranyisi machielo en mana ni lero tiende tek nimar ochal kaka ngima manyien ma koro ok nyal pim gi machon. Dho-ngere luongeni "reincarnation".

Jokristo wachoni ka itho to ibiro dhi e polo kata idhi e mach luwore gi timni ma kare, anto awachoni; bang' tho dhano en mana timni ema biro miyo iyud kwe kata sand. Mach kata polo to onge. Mano en paro mar din jarachar. Ang'eyoni jopingo to biro pinga ndi, anto mano e kaka ang'eye kod dwar ma wasebedo ka wagoyo koni gi kocha gi jodong' abila. Mach ma jokristo wacho en sand ma tiponi yudo bang' thoni ka koro picha mar ngimani kaka nibedo biro kochakore kane pod irawera nyaka chop saa thoni dho-ngere dendoni "panoramic picture" or "flashback".

Jomoko to chako nenogi ka gituore kata chunygi chiegni chot, iwinjo ka ji wachoni ng'ane neno jochiende, Ooyo, ok gin jochiende kit ngimane e pinyka ema koro birone, kendo ong'ado buche kende owuon, tiendeni oneno kit ngimane kaka nobedo. Omiyo kitimo gimoro ne nyawadu to ng'eni buchi ibiro ng'ado iwuon, chieng'no iniyud sand kata hawi mar kit ngimani e pinyka. Masiche ma timore e piny gin tipo mag joma osebdedo ka timo maundu ema kuong'o piny! Kendo gitemo mako pinyni gi tekogi duto. Ang'eyo ni jolemo ma lamo din jarachar biro kuong'o weche ma awachogi anto mano ok adewo nimar awacho gima adieri. Obong'o Nyakalaga ma wuon ji duto biro siro adiera mantie e wechegi duto. Nyasach Kwere mondo odag higni gi higni.

Tho ma biro kuom tuo rach nimar okawo ringre dhano ka pok ochopo ndalone mag weyo pinyni. Moloyo tho mar AYAKI ma tinde obiro e pinyka. Kaka yande ase yalo e jaluo dot kom ndalo mokalo thoni jarachar emane okele kato odire ei Afrika mondo otiek joratenge nimar yath bende beche oingowa ng'iewo. Ka diponi tuoni nowuok e piny Kongo, kare tiendeni jo-Kongo duto nikode? Ooyo, mano pach jarachar, mane oloso tuoni. Kadi poni tuoni nowuok Afrika kare ere kaka jorachere emane okuongo omako kendo otemo ndulo jo-Amerka ka gima otieko. 

Kik waluoruru tho nimar en chakruok mar giko kendo en migawo mogik mar ngimawa, ber kelo nyak mar olemo e piny, ka isebedo gi kido maber to onge gima iluoro kata tho ojuki, ka in ja maundu to iluoro sand mar del ma ibiro yudo ka koro del pogore gi tipo (chuny maler), ok en gima inyalo pim e yo ma yot ma dhano winji mak mana e chunywa to onyuolwa kode ema omiyo ka ng'ato otimo gimoro marach to ineno ka obedogi mirima, kata pi wange chwer. Ywago joma otho to ok rach ka waparogo timbe mane gisebedo ka gitimo; mabeyo gi maricho duto.

Jok gi marichowa en eyo maber mar kwayo ngwono, jokristo to dhi e od lemo eka gi goyo chonggi mondo Nyasaye owenegi maricho duto ma gisetimo. Mano to hero ng'ato. Anto aneno ni ka isejok gi marichoni kendo ineno rachgi to ikwengori chuth kendo ikwayo nyawadu nguono mano eka inyalo bedo gi kwe e chunyi, kata idhi mana e od lemo di par to ka pok ikwayo nyawadu nguono to chal ka nono. Din to tinde chal nanga ma ji rwako ka ojogi to iwilo ngima to en mana achiel chande ok wil nyaka chieng.

Nying' Obong'o Nyakalaga mondo oyud duong' ndalo duto. Much Nyakoyi mondo otelnwa, teko Adikinyi mondo oreswa e masiche gi tembe manyalo miyo wagore e obadho mar timbe mibadhi.

NGECHE LUO

Daher mar twak kod ogandawa duto kuom ngeche Luo, kata kamano gi ng'eny sidang’ maok nyal wachi tieki; ikri mar somo koda; weche olosi, ochan kendo opuodhi gi od romo mar joluo duto e piny ngima miluongo ni; JALUO dot KOM koriwore gi wuon Abila Moluor Ker Ngire Ajos Wuod Atiga Ny’Ochola (J. Ogello Okullo).

1.     ACHAM AYIENG' NE ONEGO SUNA

Bed kod paro mar loyo wach kapok odhi mabor, kik ichal jakong'o ma wachoni acham athonago. Suna bende ne ochamo achama remo ma obare ndasi ma kaka ochak ng'wech ne otame, kendo koro inyalo mana nege raoyi nono.

2.     ACHANG' CHACHA NGETA MOPADOR

Kaka ung'eyo ngeta uduto en gima opadore matin to oting'o kodhi e iye.Mae puonjowa kuom oganda maok yie weche anyuola, ma kata iloso gima ber ma nade to en nyaka otuch gi mare moro.

3.     ACHI NGURE GOD KABONDO

Ne ogandawa modak egwenge ma chalo kaka Kano kod Nyakach unyalo pimo pogruok manie kind gwengego kod Kabondo kaluwore gi gode mantie kochakore Nyabondo ei Nyakach. Ka dich moro matek omaki ma kaka itimri onge to ichalo mana gi ng'ama idho got ma nyaka winj mana rem e nguche.

4.     ADE TIENDA TO AWE NG'UTA

             Kaka wang'eyo waduto ni masira en gima ok wanyal geng'o kata ng'eyo cheing' ma obiroe, oganda mang'eny ohero ywak ne jowetegi ma moko. Ethuolo mar masira, ng'ato paro mana ni en kende ema en kod chandruokDeyo tielo to iweyo ng'ut en mana kaka ng'ato nyalo yudo yo mar masirano ma bende ok yot ngang’. loyo                                                                                                                                                          

5.     Agulu mirito ok yieny

             Kane pod wan rawere matindo to inyalo paro ka i dok dala mondo iyud

gago mar odiechieng'  to dakuon ok yieny mapiyo kaka idwaro, to iparo

               mana ni gimoro rach. Ngeroni puonjowa kaka gima ogen ok timre piyo kaka     idwaro. Kendo opuonjowa ni mondo wabed kod ngima mobolore, kod yie motegno.

6.     Anyam nyar Othoche, chiemo loyone nindo, onind bedo to ochiem

               Ngeroni puonjowa kuom ng'at ma jawuoro ma gire ok lwar, kendo

               oherore owuon maok onyal kata mana nindo koparoni ng'ato biro tieko

               gigene. Moloyo jawuoch chiemo, ma kata oyieng' ma nade to pod omedo

               ameda ma kata nindo ema tere bedo.

7.     Aringo misalo kichuo piere piny

               Kuom ogandawa en mor maduong' ka wendo obiro e ot, kata kamano nitie

               welo moko ma chal kod abayo nyar Nyandwak mak chuo piergi piny, ka

               obiro wendi. Ngeroni puonjowa ni kain wendo to nyaka item bulo ngor to

               nikech chik jaluo ni wendo nyaka ng'ul olawo e ot, tiendeni nyaka obilie

               gimoro matin kapok owuok. Kik wiyi wil gi abayo nyar

               nyandwat mane odhi mochweyo luchru moduoge mana kaen kitundu.

               Omiyo bed kod chuny mobolore.

8.     Asot gwend Muga

               Nitie oganda ma moko ma ohero mana suoto umgi e weche jowetegi,

               kendo ka owinjo wach to okasore ka dho koo mang'ue. Bet asot en tich

               matek kaka ung'eyo, mae puonjowa mondo kik wabed gi dhok mabith.

9.     Atonga mayot ema iyombo go koth

               Kik iketri e rang'iny ma malo maok inyal betie. Ka ichiemo to kik iged

               othonje ma ohing'o dhogi to nikech kado biro mana pukore oko ma njawi

               kayiem nono.

10.                Kipuonji liech onyono

               Kipuonji en ng'at ma wiye tek ma kata jodongo tem wuoyo godo to ok

               winj wach. Omiyo chieng’ moro achiel ne owuok mi odhi ogedo mana e

               kor liech. Kaka ung'eyo ni liech ong'iyo gi yore mapile, kipuonji ne olal

               miru echuny odiwuor kane liech omonje e ligala. Omiyo kik ibed ng'at

               mak chik ite eweche ma iwachone

11.                Aluru oidho yath

               En puonj kuom ogandawa ma onyuol e mier ma omewo, kuom mano

               nyithindgi ok ne chandruok kaka nyathi jachan ma gwonyore gi sare.

               iyudo ka nyakewo moro obiro odak  kanergi ma omewo kato oketore

               e ngima ma malo mit ochako chayo jowetene ma moko, to kadipo ni chieng'

               moro diriembe mit ochako yudo chandruok, joma ne onyiero kendo

               ochayo ka to koro winjo maber. Mano e tiend ngeroni, kaka ung'eyo ni 

               winj aluru ok oidh yath, odak mana ei lum maka diponi oidho yath to

               nyaka ogore piny.

12.                Angera e awanya

               Jawanya ok dimb wach pile, ka oromo kodi to nyaka otem geyo tiend

               gimoro ma nyalo miyo kik ipar wach moro kuome. To en ng'at mohero

               lung'o wach. Omiyo kik ipar ni gimoro amora ma ng'ato ogolo edhoge

               kaka angera en mana mar kayiem nono.

               13. Awendo ok we yiege

               Nyathi kawo mana kit wuon, mier mang'eny ie luo uneno ka iwacho mana

               ni jokang'ane to Ruoth ne ogwedho, in mane ok en hapi to inyalo temo to

               ok ichopie rang'iny ma malono. Kido wuok e anyuola. Kaka awendo kata

               iket mana gi gwen e dala to ka osetoko mi nyithindo owuok e goro to kata

               iol mana kuoyo e itgi to nyaka chieng' moro gi dogi e bungu.

14.                Awinjo winja loyo ng'ama oaye

               Weche mi fwambo koni gi kocha landore maloyo adier, wach awinjo

               landore mapiyo kendo oganda mang'eny ohero weche ma chalo kamano.    Jokuoth ema ohero wach awinjo. Kapok iyie kuom wechegi to tem ane iyud adiera kuma oaye.

15.                Awinjo awinja kaka gweno winjo aora

               Kaka ung'eyo ni gwen ok ter modho aora omiyo en wach malich ka diponi

               gweno oyud ka odhi modho e aora. Ngeroni puonjowa kuom ng'at ma ok

               ong'eyo wach moro ma wachore kuom ndalo mang'eny kata kuom gimoro

               ma ok oyang'ore godo maler to ogombo ng'eyo kuom ndalo go duto. Kata

               ndalo mane kech mar KILO kata GOROGORO ochamo ji, kipenjo ng'ato ni

               to ne uchamo ang'o to odwoki mana ni wan chiemo tinde wa winjo awinja

               kaka gweno winjo aora mano nyiso ni en gima tinde yudo tek sidang'.

16.                Bed mos pod ok ineno kang'eyi

               En puonj kuom rawere ma tindo, neno ng'ech tiende ni bedo gi nyodo            

               (yudo nyathi ma mari) jodongo wacho ne rawere ni kik inyier puth mit

               kichieng' inyuol lwang'ni. Kuom oganda malungo “pelele kimur” to

               wachoni bang' math oyugno gimoro amora nyalo wuokie, ber kata rach.

               Omiyo bed motang' gi gima pok ineno.

17.               Beduru motang' hundhwe ni machiegi

               Hundhwe en winyo maporo weche, omiyo ka piny chiegni ruu to uwinjo ka

               ochako wer mano nyisore ni osudo machiegni mar poro wach. Kuom

               ngima wa mapile hundhwe gin joma fwambo weche. Omiyo gimoro

               amora ma iwacho nyaka itang' to nikech onyalo luori in iwuon mi ochwe

               ondhogi.

18.  Ber wuotho gi jating' kom kata jakol kudho

               Jodongo ne wacho ni ber ka ng'ato dhi wuoth to ogwelie jowetene moko

               ariyo to nikech weche moko nyalo maki to kaka itimri kendi ong'e, ma e

               tiend ngeroni. Kendo opuonjowa ni ong'e ngama nyalo loyo gik moko

               duto kende owuon. Nyaka ibedie gi ng'ato ma nyalo konyi ng'ado reiko ka

               wach moro ojuki.

19. Bie ojiemo ne ng'wen (oyala)

               Ka ng'wen pok ochako wuok e burgi to bie ema telo kendo goyo ajawa

               malich ma tamre gi nono, kaaye bang'e to ng'wen wuok. Mae puonjowa ni

               ng'at machiegni kodi ema dhogi, mi dumbi e mach. Bang'e to opanjo gi

               chien mana kaka bie bende ka ng'wen osemoko e atunga to gi chako

               ng'wel kendo gidok e bur.

20.                Bingo ( dhingo ) iro to ok e tedo

               Inyalo kendo dhako maber sidang' nono, ma oganda duto puoyo kaka

               ikendo nyar ber to kare ikendo mbara riany maok chuo piere piny.

               Yawuowi masani bende mana kamano, kodhi e keny to odimbore kendo

               inyalo puoye kaka ng'at malong'o sidang' to kare kido to opando. Omiyo

               kik ine ler agulu gi oko kapok ineno iye.

21.               Budho olak mokayo e sino

               Ka gimoro mane ok ipar ni nyalo timore otimore to iwinjo mana ka

               iwachoni okalo sino (tong’), kaka ung'eyo uduto ni sino en giko puodho      kama pur ogikie. Ka ja chan oyudo pesa mi oloso gimoro maber  mit wiye chako jany mi ochak goyo ne owetene ma moko siboyi kaka en tinde ok en kaka  uparono. Oganda mane ong'eye chon ka pod ogwonyore gi sare to wacho mana ni budho olak mokayo e sino tiende ni ber okelo rach, mi achaya odanjie.

22.               Bur ochiek dwaro twinyo (bicho)

               Wach ma osebedo ka ipando ndalo mang'eny koro nyaka gol oko e lela,

               bur en gima lit ahinya to ka ochiek to nyaka bare mi biye nyaka nyaiye

               wuogi eka inyalo yudo yweyo. Wach bende ka oromo kor ji to nyaka

               many tiende kuma owuokie, mi yud kaka inyalo lose.

23.               Chik chik nyadiend Opila

               Kaka ung'eyo ni  nyadiel ohero mbesore aseche ma oyieng’ e kaka jomoko

               bende ohero milore kata rumo wach maok ong'eyo tiende. Mani puonjowa

               ni kik walokre Nyarusa diend Otiu, bed ng'ama odimbore ma nono tiend

 wach.

24.            Chiero mithiedho ema gawi

               Chiero en tuo wang' to ok ober ka omako ng'ato to nikech tong wang'i otho

               dibo (rachar) maka diponi inyalo thiedhe to en wach maber ahinya.

               Ngeroni puonjowa ni timni maber ema nyalo ndhogi to nikech ka ikonyo

               ng'ato to olokore kod mi ochwe ondhogi kod jowasigu, kadipo ni ithiedho

               chiero to ochako omaki in iwuon to ng'at mithiedho to koro neno maler.

               Onego watang' seche duto ma watimo gimoro ne ng'ato machielo to

               nikech dhano wadu e jachiendi.

25.               Chien kiyany

               Ne oganda mag joluo modak e pinje maoko kaka Amerika, Ulaya ( Frans,

               Onjiro, Urusi...), pinje jorabuore (India, Uturuki, Israel...) gi temo lal oko

               Ma kata dala kaluo kuma ne onyuole rwenye ka iromo kode to owachoni

               an ne adar chuth ma wach ma kono to awinjo mana kaka gweno winjo

               aora, dak iparie ni chien kuno to ema ne idong'e kendo jonyuol bende pod

               ngima. Kata dholuo bende tinde ok owachi. Ka koro wach moro ditimre

               mi koro ochop ni nyaka idog mana kaluo koro to ibiro timo nang'o?

               Nyithindwa kik wiyi wil gi kuma ne oikie biechi.

26.               Chuowo chieth gi riwi (kudho)

               Jomoko ohero keto korgi, kata e gima oyombe gi bor, Omiyo kik ibed

               ng'at ma ohero ng’adore e gima oyombe gi bor. Ng'ato ka ng'ato gi pokne.

               Kaka ung'eyo ni minyaga en gima ng’we to ere kaka inyalo chouwe gi

               kudho? Dong’e tikne biro thing’i e seche ma otero umi nmachiegni.

27.               Chweya Rarek ja Kochia

               Kochia en gweng’ moro ei Homa Bay, en ngech jago moro mane ratego nyowuoyo omiyo nonyalo chiko ni gibiro puroni puodho, kar rombgi gin ji aboro, kendo ka iseloso chiemo to ipoka en mana ng'ato achiel ema obiro kendo obiro temo mondo onyagrego motieki. Onyalo madho nyuka ji aboro motiek pep! Mochak omed gi chiemo bende e wiye. Mano emane omiyo iwachoni ochamo chweya rarek, maonge gikone.

28.               Dhako marach ja mocho tung'

               Mani puonjowa kuom dhako ma kite rach en ka odhi mocho to ok obed

               machiegni nikech duonde ong'awo, kata angera kod mon wetene bende

               okia. Ere gima omiyo omocho tung'? Mondo oyudo thuolo mayot mar

               ng'wel mapiyo. Kaka ung'eyo ni gweng'e mokiewo gi nembe kaka Wich

               Lum, Misori, Kasgung'a, Asembo, Sori kod ma moko ji pod moyo rech e

               dho nam, koro dhako molokore gele kod jowetene en ok omoch diere to

               nikech dipo ka otuomo tiend nyawadgi to kaka odwoki tame.

29.               Dhano ema ne oiki to owe biero

               Nyithindo moko ok odewo jonyuol kata kony moro amora ong'e ma gi

               chiwo. Koro miyo kata wuoro ywago mana kaka ne oiko ber to rach ema

               odong'. Biero en ofuku ma nyathi bede kapok onyuole. Berni ema nomi

               idag aming'a.

30.               Dhok e tung' dhano

               Kaka rwath chuowo liel kod tung'e e kaka dhano tiyo kod dhoge kuom

               poro weche, ja mil wach chalo rwath ma tung'e ojany kendo gwetho ka

               oneno kama idwaro porie dwasi. En puonj kuom rito dhok to nikech gima

               iwacho ema nong'adni godo bura.

31.               De nyuok

               Kuom ng'at ma ngoro pile inyiso mana ni mondo ode nyuok, tiende ni

               mondo obed kod chir, Ne ng'at ma ong'e kod chuny mar geno; pile imedo

               jiwe mondo otim kinda kuom gima otimo. Tiende ni ong'e gima biro

               mayot, nyaka iti matek.

32.               Dher ariemba inyiedho to ing'iyo rangach

               Ng'ato ber gi gire, omiyo dhiang' ma ok mari inyalo om e saa asaya, mi

               chak bayi, mae puonjowa ni kik ibed ma mor  gi muandu maok mari.

               Bedgi mari kata tin.

33.               Dhiang' otho od gi odhera

               Ng'at ma ose bedo kod chandruok higni mang’eny ka oyudo gimoro

               dichiel to omako gi lwete ariyo. Ochalo mana gi ng'at modhero maka

               dhiang' otho odgi to ochamo mi onindie, ka oparoni ok nochak oyud

               kendo. En ngero migoyo ne ng'at ma osebedo ka ni  kod chandruok, maka

               oyudo gimoro to ochunje mana ka ja maino (kiyaka).

34.               Dhako en chok odiere

               Dhako e chuny dala, misumba ji ok thor dhi e dalane, to nikech ot ma

               dhako ong'e chal kod gunda mane ji ose darie. Kaka chok odiere bende

               eman kod ndhadho, e kaka dhako bende chal ratuon mar dala.

35.               Dhuku dhuku dhoth rombo

               Ng'at ma ohero nuoyo weche chal mana kod dhoth nyarombo. Kendo kata

               ne owacho wach mamit ma nade to koro oboth both, kaka ung'eyo ni

               nyarombo dhoth kuom thuolo mabor ahinya. Wach ber ma bedo gi

               gikone.

36.               Dhiri dhiri Nyono chi Odeny

               Chi Odeny ne obaro ji ndasi mana gi nyono ma dhiri dhiri, kaka ung'eyo

               ni miel bende nyaka loki, to ka osiko mana kaka ne ochake to kata mitne

               bende koro ong'e, kendo koro oboth both. Gimoro ber gi gikone. Bende

               eka onyalo moro wang' oganda.

  k

37.               Ero isoko Nyajwaya gi asere

               Nyajwaya en le ma ka okawo aputh njiri to kata mana asere ema ibaye

               godo to ok yude, moloyo ka ong'eyo ni ilawe. Kik ipimri kod gima

               oyombi gi bor.

38.               Ero jachien soko gambi

               En puonj kuom joma wigi tek, kaka Kipuonji mane okwer ni mondo kik

               dhi gedi e kor Liech to otamore winjo wach, kik imonj sibuor kama oninde

               kiparo ni in kod tong' ibiro nege.

39.               Ero jachien kwayi remo

               Kik itug kod ngimani to nikech ka pachi oparo gimoro ma nyalo miyi

               masira to in iwuon ema ibiro bedo e chandruok, kik gombo mi ichumbri e

               mach kayiem nono. En puonj kuom oganda ma ohero ng'ang e ranginy

               ma malo moyombo gi, ni ng'ane mane otimo cha to loya gi ang'o.

               40. Ero tinde ileny, mit kachieng' moro ituo

               Ong'e gima siko gimoro amoro ni gi gikone, ka iyieng’ kawuono to parie

               Ma kiny bende, to nikech samoro kiny ni deny. Kain kod mwandu to

               mondo itang' ahinya to nikech mag pinyni rumo. Ong'e gima ong'irore ma

               ok no rum epinyni.

               41. Ero itwito awanya

               Jomoko ngero ji kuom gimoro ma odwaro ni mondo omiye, Ei angera

               gombo nyaka bedie. Moloyo eyor kisera yawuowi ok chom nyiri tir, gi

               temo loso eyoe angera. Twito chalo kaka doyo tiend wach.

               42. Ero isuoto umi

               Donjruok e weche maok ing'eyo korgi nyalo miyo irom gi mak olwer.

               Kaka umi kaok ikungo to chieng’ moro ibiro ng’weyo nyaka gik ma ng’we

               misuto.

               43. Ero ibet e wach gi law Ogara

               Nitie jomoko maka mbaka owuok to en ema odwaroni mondo owinje,

               ogoye tulo ma kata joma odong’ ok winj dwondgi, olokore ming'eyo chi

               Muksero kata Nyakara K’Otiu mane okarore e wach mi ne okelone tho

               kayiem. Mani puonjowa ni mondo ibed ng'at moboch kendo miyo

               jowetene ma moko thuolo e mbaka.

               44. Gala gala ruadh Muma

               Kaka ung'eyo ni japith chako ruedhi nying' kaluwore gi kitgi. Ka kiti ronje

               to iyudo mana nying' marach e gweng’. Kaka nyathi ma lwete bith iluong'o

               ni Achich to nikech kama okale to nyaka wach wuogie.

               45. Geno gen Rowa

               Rito gimoro chweya mak timre, kata irit ma nade.                                                       

               46. Geno lep Nyakeno

               E ndalo machon lep ne en mar jodong'o, to Nyakeno ne onego le mi

               ochamo lep duto kende. Jodong'o ne orito piny modagi ruu, mi ne odoko

               ngero (chal kod ngero ma malono).

               47. Goda apayo to aidho

               Jachan ong'iyo gi chandruok, omiyo jodong'o machon no wachoni nyuogo

               makayi ema igwonyo. Chandruok na an ema ang'eyo kaka anyalo loyo,

               kaka got bende ng'at maidhe ema ong'eyo pekne.

               48. Gondra dend rapur

               Chon ne ichomo rapur (kwer) gi pien mondo kik ong'ikni, to moloyo

               kwer nyaluo miluong'oni ochowo. Ne iluore e kor rapur nyaka omake

               motegno. Ngeroni itiyo godo kuom ng'at man kod wach matek ma kaka

               inyalo losi ong'e. Weche masira oluore koni gi kocha mana kaka del

               ogondore kuom rapur.

               49. Goyo obindi

               Ka ng'ato ojali kod ojala (beti) ma mingli, to ong'e remo mowuok; mano

               iwachoni ogoyi obindi. Ngeroni puonjowa kuom oganda maka ji ni e bura

               to wechegi ok gi gol oko tiendeni gi goyo jobura obindi mi bura rum ka ji

               ok ochopo e winjruok.

               50. Goyo agoro

               Ka owadu oyudo chandruok, kar gone mos to in igiyone mana siboyi, ni

               ero oromogo en ema nyocha odwaro kende. Nyocha olokore aketo kore

               dak onyalo. Tiende ni imor kod masira ma nyawadu oyudo to dak iparie

               ni kawuono mare to kiny to mari.

               51. Goyo gi guok

               En ngero migoyo ka ng'ato onindo ni nyawadgi e dir neng'o, ka ja amadia

               moro owuondi mi olal kod mwanduni tiendeni ogoyi gi guok. Kaka okil

               kata obila ma Kenya goyo ji mang'eny gi guok, ni kaok igolo gimoro to

               weche gi igwenyo agwenya.

               52. Gweno uch gi ombich nyawadgi

               Ung'eyo ni ka oneg gweno to nyawadgi odich kod ombich kendo orikni

               godo ahinya. To ok ong'eyo ni en bende odiechieng'e chiegni. Mani

               puonjowa ni ka idak e od kiyo to kik idir kite kochomo kor ot, mano dimi

               inind koyo ka isetoyo kich odi iwuon. Chal kod jakuo ma goyo jakuo

               wadgi, koparo ni mare ok nong'ere. Ichalo ng'ama kunyo bure owuon.

               53. Ich lach nonego Okal Tako

               Gimoro ka gimoro nigi gikone, Okal ne ochamo mothoye to nikech ne

               wuoro mang'oga omake mi ne ochiemo ma iye obarore. Gombo mang'eny

               ok ber bedgi mari kata tin.

              54. Ichwe ka ng'ama chiemo gi muofu

               E thuolo ma ja ohala oyudo pesa mang'eny kuom uso gigene e neng'o

               Ma malo tiende ni jo ng'iewo to ywak kendo winjo matek ahinya. Mani

               timore e ndalo mar kech, weg dukni winjo maber ahinya to nikech koda

               oketo bei malo to ji biro ng'iepo.

En puonj kuom joma paro mana ma korka kore owuon to ok mar nyawadgi ma chandore. Mana kaka ng'at ma chiemo gi muofu bende chiemo mang'eny ka en kod adiera ni muofu ok nene. Dak opar ni muofu bende winjo kech mana kaka owinjo. En puonj mondo kik inind e dir neng'o ka diponi in e okang' ma malo. Kaka sani kech nego jo Turkana to jotelo mapogo chiemo to lokore amadia. Mano bende doko tim?

               55. Ikak ka jadiewo

               Diep en tuo marach ahinya, kata mudho olil to jadiewo nyaka muomre

               oko mi odhi ool minyaga oko. Kata ondiegi ruto to ok odewo ngang’. En

               puonj ni donjruok e gimoro ahinya nyalo kelo chandruok.

               56. Ilal ka wuon Akwenda mane ogo dero ne bend ahula

               Kaka ung'eyo ni bang' kayo cham to oganda mang'eny ohero dhi funo

               (huno) bando kata bel. Wuon Akwenda ne oneno ni okwong' olos kama

               obiro ketoe chamb ahula kapok obedo gi adiera nito bende obiro yudo

               gimoro koso. En puonj ni kik iket geno e gima pok ineno gi wang'i kata

               mapok imako e lweti. Kik igen gima luchi ok ochotie, onyalo bayi ka

               wuon Akwenda.

               57. Imako mandi opong'o lweti

               En ngero ma inyiso rawere matindo maparo ni gise bedo joma dongo ka

               oneno ni orabora kendo wuoyi oserome. Bedo ng'ama ng'ongo ok en gima

               in ema inyalo wacho, luor kod dembruok ema biro miyo duong’ mari

               nonenre. Ngeroni puonjowa ni rawere kik tim achaya ne joma dong'o, ka

               gi paroni gisepong’. En ngero mar ayany.

               58. Irikni ka ajuoga ma oneno mand rombo

               Oganda mang'eny jorikni ka owinjo ni nitiere mich ma ibiro chiw ne ng'at

               ma obedo jatich maber, to pile ok giti kod adiera en mana nikech mich

               mane osingi. Ajuoga ohero medo weche ka oneno ni dala ma odhiye

               thiethno nigi mwandu mathoth.

               59. Itimori ondiagla

               En ngero ma igoyo ne ng'at ma timbene ong'ielo ng'ielo. Kendo ohero

               timbe mag anjawo.

               60. Igori e pier mong'am

               Ka iyudo gir nono maok luchi ochotie to nyalo miyi masira to nikech ok

               inyal rito, kendo gibiro mana lal nono. Dhano ohero laro gik mochiw nono

               to bang'e gichako gi tugo godo. Kata jakuo kawo thuolo mar dhi kwalo

               mwandu e bengi, hape nie kind Asumbi gi Akuru, inyalo make kata

               onyalo tony. Goruok e pier mong'am tiende ni yudo gimoro e yo mayot,

kata kamano onyalo miyi masira. Ngeroni itiyogo kaka ayany ne joma muomore gi weche e gima okia tiende manyalo ketogi e masira kayiem.

               61. Ikarori ka ogwal

               En ayany ne joma ohero kiyaka, ma gimoro ka gimoro ka oneno to

               ochunje, mana kaka ogwal bende ok inyal pogo, nito koro obet koso

               ochung'.

               62. Ipedho (teng'o) Aming' ni ogawo

               Tiende ni ichwako richo main ema mach biro wang'i. Pile aming' ok cham

               kendo gi tindo tindo to ka in kar teng'o oyala kata ogawo to aming' ema

               iteng'o, chalo ng'ama kar doyo bel to doyo mana oluga.

               63. Ithanyri ka yap ng'at achiel

               Ong'e ng'ama nyalo loyo yore ge duto kende. Kata obedoni otiyo matek

               machal nade. Yawo an kama ituomo e pi, to ng'at achiel ok dwaro yawo

               matut to nikech otiyo kod pi matin. Riwruok ema kelo dongruok ne

               oganda

               64. In e ludh widhi?

               En angera ne joma paroni gin ema giber/ohergi maloyo joma moko.

               Widhi en kaka ludh mise mar ot. Mise en ang'o? Ludhe mi kwong'o

               chung'i ka ichako ger ot, kaka ung'eyo ni nyaka gibed yiende motegno

               ahinya eka ot bende nyalo bedo motegno.

               65. Iming' ka mane ok oninde swindhe

               Oganda mang’eny osebedo ka penjore nito ng'at ma ndiko ngechegi en

               ng'at ma nade, kata ere gima omiyo okethonwa seche kod weche jodong'o

               moti. Mago e oganda ma waluong'o ni joma ming' ka mane ok oninde

               swindhe, nikech okia chike kod ngeche Luo machon. Swindhe en ang'o? En

               od dayo moti kama ne rawere puonjore chike Luo machon. Mano e mane

               chalo kaka sikul mar nyithindo matindo mapok oromo dhiye sikund

               rieko.

               66. Ipodho liswa or mbuluswa

               Mani en ng'at ma ok ong'eyo pogo kind ber to gi rach, kendo ong'e gima

               onyalo timo mi chom yo, yorege obam ochomo ronje, olokore obaro nyar

               Wasare mane obaro gi thum odhigo e simba. Kaka ung'eyo ni oche gin

               joma omi luor magundho kod jokaoche, to or mbuluswa to ne timbege

               obayo anyong' mi ne odoko ngero nyaka sani. En puonj mondo

               ng'ato ka ng'ato olos nying'e, nikech nying' e dhano.

               67. Iori ka dho ko mokuok ( mang'we )

               Mani en kuom joma ohero owuora to kata gima ong'eyo to ong'e. En puonj

               ni kik ilokri Dhere nyakoke, mane dhoge oweyo mabith mana mar puoyo

               timbene to mar nyawadgi to kata ber to ok chalne gimoro. Rit dhogi dipo

               ka oteri e mach, mi owang' dendi duto.

               68. In bende ka wang'i okolo kudho

               Ithuon ka agwata to luor bende iong'e godo, en kuom joma ok dew

               jowetegi, kendo achaya ema ohindo turi, en puonj mondo iluor joweteni

               kendo kik ibed kod chuny mar akwede. E piny ma wantie ni ok sikie, 

               kawuono inind diere kiny inind tung'.

               69. Inind diere, inind tung'

               Ong'e gima ong'irore e wang' pinyni maok no rum. Gimoro ka gimoro nigi

               ndalone. Pime mana gi ndalo mane pod wa lawo nindo e swindhe, ne

               iyaro par thagalany to yawuowi ne temo laro kar nindo, nikech luoro nika

               inindo machiegni gi dhoot to ondiegi dipo ka ochami kendo nika inindo

               diere to bet iyudo liet nikech oganda ma moko ogeng'o bathi koni gi koni.

               Koro ne luwore gi kaka iriyori mi iyudo kar nindo to ok inyal yudo kama

               chalre pile. Ngima bende chal mana kamano odiechieng' ka odiechieng'

               nigi mage. In ma imor kawuono to makiny to bende ing'eyo?

               70. Inirom gi mak olwer

               Kuom gimoro amora ma itimo marach onego ilok pachi, dipo ka

               ichumbori e mach kayiem. Bed ng'at ma winjo puonj kuom ogandane.

               Romo gi mak olwer en ang'o? Tiendi ni yudo masira ma ong'e kaka

               ikonyri.

               71. Ing'adori ka oyiech dak

               Mani en ranyisi kuom oganda ma ng'adore e okang' moyombe gi bor.

               Mana kaka oyiech dak bende temo mondo owuog oko mar dak (agulu) to

               ok onyal nikech dak oyombe gi bor. Kendo kor dak bende poth ma koke

               ok nyal mako. Mana kaka aket kore ma hindore e gima ok onyal chopie.

               To bende inyalo yudo gima idwaro to kaka irite tami. Oyiech dak bende

               nyalo wuok oko mar dak to kato wuon ot nege, moloyo ne osik ei dak,

               dikoro odak aming'a.

               72. Iwuoyo ka ng'ama ogo lwedo eiye

               Wuoyo mang'eny kendo loso maber kuom gimoro nyalo miyo ji bed gi to

               kuom wecheni ma iwacho.

               73. Iwuor kokusi

               En anyany kuom jawuoro, ma gire ok lwar piny.

               74. Ich ok luoki

               Pile wayiero gik ma wachamo, to ich to ok yier chiemo, tekni ise muonye,

               to obiro mana kane. Mano nyalo bedo ngero kuom ng'at ma ohero welo,

               kendo ok oyiero nito in ng'at ma nade? En ni cham gima ihero nikech ich

               ok lil.

               75. Ibor kachieth okinyi

               En ayany ne ng'at ma rabora, to moloyo ka ibor kendo inyap. Kaka ung'eyo

               ni gokinyi nyaka ng'ato gol minyaga oko korka onyalo winjo maber;

               ojabedo maduong' to nikech otieno mangima ne ok ogolo minyaga oko.

               To moloyo ung'eyo ni chieth ok otegno ma onyalo chung tir, koro sama

               isegole to ofuonyore, mano nyiso nyawo, mar ng'atno maok nyal chung'

               tir.

               76. Igedori ka jatoko

               Chon ne minewa tedo e kendo ma okuny e dier ot, kendo ne gitoko ka

               gibedo e kom nyaluo, kata e orindi moro matin. Omiyo ne giketo agulu e

               kind tiendegi. Ne en tich matek ma ng'ato nyaka gedre korka yudo thuolo

               mar toko eyo mayot, to chik jaluo dhako ok onego bedi kogedore. En

               ngero ni ka iong'e kod yo machielo mar timo gimoro to nyaka iti mana gi

               yo mantieno, mana kaka jatoko bende ok nyal toko chung'o nyaka to obed

               mana e orindi (ten).

               77. Ifwayo wach ka jang'ol ring'o

               Jang'ol ring'o pile odich ma kata gima iwachone ok owinji, kendo oduoko

               weche mopogore gi gima openje. En puonj ni mondo kik itim gik

               mopogore opogore e saa achiel wiyi nyalo wil mi gimoro kethre.

               78. Imino wach ka puth/ka uno(ngori)

               Igoyo ngeroni kuom ng'at maok chom weche tir osiko mana ka oping'o

               wach. Pile iwacho ni puth tekone nie dhoge to nikech onyalo wacho gima

               ok onyal timo en owuon. Uno(ngori) bende ung'eyo kaka ominore maka

               idwaro gonye to nyaka ikaw mana thuolo malong'o.

               79. Irungori ka chwech poya

               Agulu ma ochwe maber ema ji ohero kendo ka otere e chiro to ji laro alara,

               to jachwech poya pile ok ong'eyo loso agulu maber; samoro iyudo ka

               ochweyo agulu mothung' gi malo mano chalo kaka ng'at ma ochwere

               ma gala gala. En kaka ayany.

               80. Itar ka min ajow biye

               Ja jow biye pile chiewo gokinyi fuyu fuyu piny ka mwanda pok olayo,

               mondo oyud ka biye omoko. Nikech ka orito mi chieng’ owuok to biye

               biro dok e bur. Mani nyiso ni e thuolo ma iromo kode yudo kapok

               oluokore kata wang'e pok olawo. En ayany ne ng'at ma ok ohero luokore.

               81. Iyot ka nyange

               En ngero migoyo ne ng'at ma tiyo piyo piyo. Kaka ung'eyo ni nyange yot

               kendo ka odire to okawo aputh njiri, maka ochomo aora to onyalo kata

               mana lal.

               82. Jaber jaula

               Pile ji ohero nyuomo mon mabeyo kuom neno, kendo ka ng'ato onyombo

               to iwinjo ka jowetene penjore nito ineno chiegeno chal nade! Bende

               ober....? Mak mana wigi wil ni ber ok bed nono, en gi nyaiye, omiyo kik

               ipuo gimoro gi okone kapok ineno iye. Kaka joluo gin jopur, inyalo yudo

               ni ka inyuomo dhako ma jaber, to onyap ma kata rapur ok onyal ting'o

               kodhigo e puodho nikech lowo biro lile, mano to koro ere berne? Kata

               inyalo nyuomo jaber ma iro juog wang'.  Omiyo ngeroni puonjowa ni ber

               en kido.

               83. Jabudho e duonde ariyo jabed jamiriambo

               Mani chal gi jadoho, makia rito dala ma tero weche koni gi kocha, omiyo

               mon bedo kod achaya ekindgi giwegi. Opuonjowa ni ok inyal tiyo ne

               ruodhi ariyo eyo machalre, ibiro hero moro to ichayo machielo, mana kaka

               mon bende ok inyal hero duto.

               84. Jachan gwonyore gi pado

               Bedo jachan chalni in misumba jamwandu to nikech ibiro tiyone nyaka

               Chieng’. Kendo osiepe bende iong'e godo kidwaro loso kod jamwandu to

               iwinjo mana ka owachoni pok ichopo e okang' kata rang’iny mar wuoyo

               kode. Gwonyruok gi pado en ang'o? En ni pile jachan imiyo mana gik ma

               jamwandu ojok godo, kendo owachoni kar wito gini to miuru jakwath

               moro modhierni, mani e pado. Pado en ng'injo madong' ka agulu otore.

               Ochal ka nono kendo iwite oko.

               85. Jachan nyombo gi wang'e

               Pile ka keny ochopo to yawuowi ikore ma joma ong'e kod lep kisera to

               nyaka kwa jowetegi man godo.Wuon keny bende temo ikore chon mondo

               olos nying'e. Kendo nyiroye mag keny bende nyaka ik chon. To kadiponi

               jachan ema dwaro nyombo, to ong'e kaka onyalo yudo gigo duto kata

               osiepe bende oong'e godo madi tere wuoth. Miyo en milumb keny otieko

               mana gi wang'e to nikech nyako ma onyalo yudo bende ong'e.  Mae chalo

               gi keny mane otera Alego Karuoth, maka ne wadonjo e dala to jodongo

               sigore asiga nito orwa no to erego? (kendo ne gi penjo gi dho Alego:" ila

               wuowu no en nga Owuoko, koso Omondu, koso en mbu Abdala?")

               tiendeni bende en ng'at man gi mwandu; en ja boma, koso japur, koso en ja

               dala? Hawi maber ne wadiyore gi gimoro matin omiyo keny ne odhi

               maber kaka ne wachano. Ngeroni nyisowani jachan pile bedo kod gombo

               to kaka otim ema otame, chunye to gombo to kaka otimre ong'e omiyo

               otieko gombo gi wang'e.

               86. Jachien otho e ite

               En ngero ne ng'at maok chik ite e puonj ma imiye, omiyo oyudo

               chandruok ma rabet ka polo, mana kaka kipuonji ne oyudo, kane otamore

               winjo wach jodong'o. Liech ne oruche mi olal miru. Bed ng'at maluwo

               chike mane kwerewa owenwa mondo obed kaka ogayi.

               87. Jachwech chiemo e tago

               En puonj kuom jo mwandu ma gigegi ok lwar piny ma kata otonglo ema

               ikwaye to ok omiyi. Jachwech agulu bende pod dwaro mana yudo

               omuom kuom chweyo agulni mang'eny omiyo oneno ni ka oloso tawo

               moro matin to biro ngadone wi nengo, omiyo okawo mana tago ema

               otoke. Magi e jok ma waluong'o ni ngudi mak gire ton. Koro to ere berne

               ka ok inyal neno ber mwanduni in iwuon kapod ingima?

               88. Jachien obayo mire gi kwesi

               Ka ng'ato okelo ne nyawadgi moro hawi marach kata otimone gimoro

               maok ochomo kare to igoyo ngero machal gi ma. Mire gin winy moko

               madak e dho aore kuonde ma otimo siany, omiyo ka ochopo seche mag

               odhiambo to gi chokore, to kadiponi ne ng'ato nitie machiegni to obayo

               kede moro ei siany kamane mire obuoroe to gi wanyore pep. Mano nyiso

               ni ber olal to rach (masira) odonje. Kuom jodong'o kwesi ne en gima oluor

               ahinya, to koro kwesini ema ja ajiendeke moro obayo godo winyo! Mire

               otony kwesi to olal.

               89. Jagam dhoge ariyo

               Jagam pile temo puoyo koni gi koni, olokore nyakonkon pand Kisii. To

               nikech ka diponi  oseyo konchiel to keny obare omiyo nyaka olos nying'

               weg keny duto machalre. Pand Kisii ipiago koni gi koni omiyo ka imake

               marach to ong'adi. Kik iwach wach moro marach kuom ng'ato samoro in

               ema onyalo ndhogi.

               90. Ja kisuma ok or e dero

               Gombo kod denyo mar yudo cham nyalo miyo jakisuma ting' dero

               mangima dhigo to nikech oneno ka gigo ng'eny motamo wang'e, to en to

               oong'e kata gi mifuth bel ma onyalo dondo. Ngeroni miyo aparo ndalo

               machon kane pod an rawera matin, Nyamin mamana moro ne otedo

               Karachuonyo (Kobala) to kane ochopo ndalo ma kech chamoji to ne obiro

               kisuma thurwa Kasipul kendo mamana ne nyise ni mondo odonj mana e

               dero kende, chieng' moro achiel ne osuso oduma maromo ogunia achiel

               kod rabuon bende ne ose iko kod gik mamoko. To e ndalogo ne ong'e

               mitokni madhi yo Kobala-Nyakwere, ni mar ndara ne pok olosi. Koro

               nechune ni nyaka owuoth gi tiende ka oluwo yo mochomo Sino Kagola

               nyaka Mawego mi ochop mwalo dho nam. Ne chune ni nyaka okowre gi

               jo ohand bala mane wuotho kod punde, to jogi bende ne ting'o misigo

               mapek, koro mamani kaka timre ong'e, omiyo ne owuotho to obuoro e

               gweng’ ka gweng’ nyaka chieng’ochopi. Mani ne timore nikech midenyo

               mane omake kendo ne owene thuolo mondo oting' kaka odwaro. Kain

               kod mwandu to kik iwe minyonge kama othanyore, jakisuma dipo ka

               oting'o gigi duto. Gombo nyalo kelo tho.

               91. Jatelo ogongo ogwari

               Mani en ngero migoyo ne jotelo mag gwenge kata mag pinje, Ka gimoro

               timore marach to jatelo ema iseyo kuom timbene maok ochomo yo kod

               jolupne. Ogongo en kudho moro madongo e kor pap to ka ji odhi kwath to

               ng'at motelo ema nyaka ochuow. To ka ose chuowe kamano to jomane

               luwe kande bende koro obayo yo ma kata kaka gitim ong'e. Kata jatelo

               makawo masoya ok  nyal tiyo oganda e yo ma kare, omiyo jolupne bende

               chal mana kode

               92. Jasem piere onondo

               Tiendeni jasem en kata kom odong’ thuolo moro matin to oriyore nyaka

               Wang’ obedi. Jasem temo gwang'ore e weche mag oganda ma moko, kendo

               en ng'at ma dhoge mit ne wach. Kendo ober e loko weche ahinya.

               93. Jawuoro opiko dhok chon mar kirage

               Tim ma ng'ato otimo nyaka bedgi wachne moro mopondo, omiyo kik iyie

               gi wach kata tim ma ng'ato otimo mapiyo, par diriyo gima omiyo otimo

               gino. Jawuoro ka odhi kwath to piko dhok chon kech oparoni chiemo biro

               rumone.

               94. Jowi mager ema ichuogo piene

               Ng'at man kod paro maber ema pile iyie gi wachne ka ochok buch

               galamoro. To e piny ma sani to ja pesa ema ji yie gi pache to nikech ka ok

               uyie gi wachne to obiro ng'wel gi mwandune duto mi owewu gi pier

               yath.

               95. Kuomi nomok e rot

               En puonj ne joma ohero temo gik ma jowadgi oluoro timo. Tiendeni

               ikawo ngimani itugo go to mit ka piny no dong’ kodi. Kuom en gima oti

               eng'e rwath to e ngeroni to ochalo kaka timbe dhano, timni emano tweyi

               kendo emano wari e richoni duto misetimo. Kaka rwath mopong’ ka dhi

               kalo e rot matin to nyaka otang' nikech kuome nyalo moko. In bende ma

               idhi temo gima otamo joweteni timo mit ki rom gi mak olwer.

               96. Kuot ogwal ok mon ruath modho

               Ogwal ohero kuot ka oneno ka dhok dhi modho, to mano ok mon rwedhi

               modho. Tiendeni jomoko ohero gwangore e weche ma ok ginyal loyo,

               mana kaka apuoyo nyalo siemo liech kendo oriyore kowachone ni ngang'

               ok inyal nyano gitiendegi madong'o go, to kaka ung'eyo ni apuoyo to ok

               nyal pim gi liech.

               97. Kik ilaw winy ariyo

               Ondiegi ne yore ariyo otamo luwo mi ng'ute ne obam nyaka chil

               kawuono. Akerekeke mag yore wito oganda mang’eny moloyo ka idhi

               wendo kamoro. Ngeroni puonjowa ni mondo wabed gi paro achiel kuom

               gik ma wadwaro timo.

               98. Kogno achiel ok neg nyuogo

               Tiende ni ong'e ng'ama nyalo loyo yore ne duto kende. Riwruok e teko.

               99. Kobayi e kidongo

               Ka gimoro obayi ma ok ineno to itemo mondo inon tiende matut, kata ka

               idwaro gimoro to nyaka luchi chodie. E sikund rieko ka diponi ilewo

               juma achiel, chieng’ ma idok to nyaka item matek isom gigo duto ma

               joweteni osomo ka iong'e nono to ok inyal yudo dongruok e yor rieko.

               100. Kik ipakri ka pok ing'eyo gima biro

               Gweno bende inyalo kwano nyithinde kapok owuok e goro? Omiyo kik

               iwuorri kayiem to ok ing'eyo gima kiny. Pile jotelo ohero bedo e kombe

               ma nyime to kidhedhe, kata oyoro tho to bedo chien margi. Koro ka

               ihangori mi iyudo kar bet nyime to bang'e migosi moro marajore maloyi

               odonjo mit imayi kom, dong'e iniyud ka kombe duto opong’? Omiyo kik

               iketri e rang'iny ma malo kapok oketi kod oganda.

               101. Kik iwuo kuma gweno ok kognie

               Gweno pile kok kar kogwen kata osirawende, weg ot ema ong'eyo gima

               timore e odno gotieno, wendo modonjo ok nyal thego dhap joka ng'ato.

               Kama ili ema igwonyo kik ine ni ng'ato puro gi punda mit idhi imako

               magwar mondo ipur godo nikech en nyamin punda.

               102. Koth mochwe ochok

               Mag piny ineno kalo, Kowuono orumo kiny waluonge ni nyoro. Koth

               mochok ok wach wachne, mabiro ema ji wachoni wang’ nobed malich.

               Gima pok ine ema igombo to mokadho odhi chuth. Mani puonjowa kaka

               wich ja wil piyo.

               103. Kinda ne omiyo opuk oyombo apuoyo

               Apuoyo en le ma jakasore ahinya , parie chieng’ mane obage thum ne joka

               le duto, dhoge ema opiago to teko to ong'e. Ne ochopo chieng’ piem ekind

               opuk kod apuoyo, kasruok ne omiyo kudho ochuoye mi opuk kaka jal ma

               lidho ne obiro mos mi okale kapod obet e tipo mar yiem. Ngeroni

               puonjowa ni kinda e ng’wech.

               104. Koth biro ma ong'er ema dere

               Ong'er kaka le modak e bungu oong'e kod ot ma odakie omiyo ka koth

               biro to luoro make nito wang’ nobuog kure. Pile ka chandruok omakowa

               to wabedo machiegni ahinya gi tho kendo ng'ato neno mana ni ber otho

               ohayie chandruok mar pinyni. To mar polo bende ing'eyo? Samoro olichie

               maloyo mar pinyni. Ng'eroni puonjowa ni mondo wabed gi chuny

               motegno kendo mar loyo tembe mabironwa e ngimawa ma pile. Wiyi wil

               ni  thagruok kod masira bende nyalo kelo hawi.

               105. Kar chuny jatuo

               Ndalo mane an rawera matin kane ochopo ni mamana otedo alot to

               Chieng’no adolora mana e pien kendo awachoni iya muora, kaka chon

               yedhe ne ok nyiewo yot kendo osiptende bende ne nitie mabor kod mier

               ma ji odakie, mamana ne biro mos kendo hoya gi duol mapiny ni " idwaro

               chamo ang'o?" Gimoro amora ne inyalo miya to nikech atuo. Pile iparoni

               ka omi jatuo gima okwayo to dipo ka ochango, nikech ng'eny jotuo ok

               ohero chiemo.

106. Kama iluokorie ok ituoye

Gimoro amora ma ng'ato timo nyaka bedgi gikone kata obedoni ober kata                   orach. Gimoro ka gimoro nyaka bed gi lokruok eka onyalo bedo kod dongruok. Kaka ung'eyoni nyang’ ohero yueyo e ding' aora kata e dho wath kama ji luokore. Kadiponi iseluokori to kik ibudhie dho wath nyang’ nyalo lal kodi nono. Ngeroni puonjowa ni mondo wabed kod paro mar bedo motang' kuom gik ma watimo kendo mar loko chenro to nikech inyalo yudo resruok, moloyo ka isiko kod chenro ma pile.

107. Kama ili ema igwonyo

Nitie gik mang'eny e ngima dhano ma ok wanyal loyo duto. Omiyo gima chiegni kodi kendo chando chunyi ema nyaka item loyo.

108. Kik iluw jaluoro nyaka ei ode

Tem mondo ibedgi giko kuom chenro mar gik ma itimo, kata obedoni moko nyalo bedo mayot timo, nyaka itang' nikech yotne nyalo kelo pek bang'e. Mana kaka luwo jaluoro nyaka ei ode nyalo miyo irom gi mak olwer. Nikech ok ing'eyo kaka oritore ei ode. Mana kaka ung'eyoni got ler kani mabor.

109. Kik isiem chiero man e wang' owadu to iweyo man e wang'i

Ong'e ng'at man kare kuom gik moko duto ma otimo, omiyo kuong' inonri e chunyi kapok ing'ado ne owadu bura.

110. Kik ipakri gi mwandu owadu

Gima luchi ochotie ema inyalo rito, mwandu owadu kata bed mang’eny ma nade to ok inyal rito to nikech ochal gima iyudo nono. Kendo ochal dher ariemba.

111. Kik itera ka nyandi guogi

En ngero ne joma ohero weche mag miriambo kod yore ma chumbo jowetegi e mach. Ka nyandi guogi chal kaka piny moro mabor ma chopie ok yot, koro miriambo nyalo teri mabor.

112. Kudni achiel ema towo ring'o

Kata obedoni in ng'ama ber ma nade; wach achiel nyalo ketho berni mi oganda wigi wil gi ber duto ma isetimo. Omiyo sunga kik donj e chunyi mi wiyi wil ni rach achiel nyalo miyo ber duto lal nono mi oganda kuod wiyi kayiem. Kata e kanyakla mar anyuola ka ji duto beyo to ng’ato achiel timbege ok ochomo yo to onyalo miyo oganda ma moko bedgi paro marach kuom gi duto.

113. Kik iyany nyang' ka pod in ei pi

Kaka  ase nyisou ni kama iluokori ok ituoye, e thuolo ma pod iluokori kik item ka iyanyo nyang’ dipo ka ongaki nono. Tiend ngeroni en ni ka itimo gimoro to kik ibed ma mor kapok itieke, owuora nyalo miyo rach wuogie tim maberno.

114. Kinda kiteng'a ne omiyo opuk ogwaro nyar min kiroro

Kata obedoni kinda ber kamano to ng'ato nyaka bed kod giko kuom chenro mare, nimar inyalo rito mi iromgi mak olwer.

115. Liech ikuodho ka oloko ng'eye

Ung'eyo kaka liech en le ma rang'ong'o, omiyo ka idwaro monje to ok chome tir, le matindo badhore abadha. E piny ma wadakieni bende nitie jotelo madong'o; kuom mano ka wach moro otimore to ok chome tir, to nikech ji oluoro chome wang' gi wang', ni dipo ka ipuko mogo kata oteng' lweti mogo, tiendeni oriembi kama nyocha idonde.

116. Loch noloyo Ngadi

Ong'e ng'at man kod gik moko duto, mana kaka Ngadi mane ruoth bende ne gimoro matin otamo mi odhi okwayo mana jadhier moro mane ji ochayo. Ngeroni ipimo mana gi ngech ruoth mane odagi ni ong'e ng'ama nyalo loye e wang' pinyni, to chieng' moro achiel ne ng'ato oterone wach ni nitie ng'at ma oloye gi teko; to ne odagi mi okwedore didek. Kane ochopo kinde mane idwaro pimie tekone to ne gi kelone nyathi moro matin, to nyathini ne yak ma ok ling'.

Omiyo ne otemo oyo nyathini to ne ok odewo, omiyo ne okwaro wang'e to ne ochalo ka nono. Bang'e ne osudo machiegni kendo ogolo kondo

mane osidho e wiye mi ogoyo chong'e piny but nyathi mane ywakno, mi ne oling', bang'e ne jodong'o openje nito ruoth dong'e ne iwacho ni ong'e ng'ato ang'ata manie pinyka ma inyalo golone kondo? Dong'e kawuono iyudo ng'at ma oloyi, ma igone chong'i piny kendo igolo ne kondo...!

117. Masira kindaki

Ong'e ng'at ma ong'eyo gima kiny notimre, chenro mar ng'ima dhano ok nyal loki ngang', kik inyier ng'ato ka oyudo chandruok, to nikech mari nyalo bedo maduong' maloyo  mano. Mana kaka Abayo nyar Nyandwat ne okelo ne Okune wich kuot, mi oduoge mana ka en kitundu.

118. Motuo ne owuondo manumu

Ka iketo yien motuo kod manumu e pi to nyaka ine pogruok, manumu biro nimo to motuo to nyaka dong' kalewore malo. Mano e kaka dhano bende opogore kuom ng'ima mar pinyni, omiyo ka idwaro mako osiep kod ng'ato to nyaka ing'e ni en e migawo mane kuom dakne, nitie osiepe mag miriambo kod mobidhore, to fwenyo mabeyo ok yot chal mana kaka yien bende ok inyal wachoni mane mabiro nimo kata mane ma biro lewore kapok inyumogi e pi. Ngeroni puonjowa mondo wabed motang’ kuom osiepe mag miriambo.

119. Mitembe (Kitembe) ne otamo ruoth. (Loch noloyo Ngadi)

Kitembe en yath moro machal kod rabolo to kothe itweyo e nung'o kata e ng'ut nyithindo mondo oriemb yembe maricho madipo ka chando nyathi kod midekre, kane oyudo nyathi ruoth obedo matuo to nyaka ne omany koth kitembe, kuom hawi marach me ok onyal yude omiyo ne ochune mi odhi kuom jadhier moro mondo okonye kod koth kitembe.Ong'e ng'ama nyalo loyo dichne duto kende. Kata ibed mana ruodh piny ng'ima.

120. Majiwa wach kech

E piny luo kech osebedo ka chamo ji kuom ndalo mokadho, to e thuolo ma wach moro owuok ni kech odonjo e gweng’ moro to landore mana ka opil mach ma wang'o thuon bung'u maduong’, mana kaka sani kech kidho jo Turkana. Kata e redio weche mag maundu kod timbe mag miganga ema opong'o it ji pile kendo gi landore piyo ahinya.

121. Maber ber ema imadhe kwesi

Pile dhano ohero madho kwesi kata ndawa sama gibudho kata gi goyo mbaka to moloyo bang' tich kata saa math. Mano ne nyisoni ong'e gimoro matek ma onego tim sano, to ka wach moro owuok matek to jomane nigi oseke mag kong'o e lwetgi to nyaka ine ka gi yieng'o kendo gi ikore mar ng'ado rieko. Ethuolo ma wach oridore ma kaka inyalo kony ong'e to kata math rumo. Mano ema omiyo ne joluo owachoni sama masira omwomore to kata mana lweti mi ting'o godo kwesi ema ong'e. Tiendeni masira ka ochopo to kata tekri orumo.

122. Mos mokowni ok romi

Koth ma ogoyi ema ing'eyo chalne, omiyo ng'at ma ode chwer ema nyalo pimo ngech koth. Pile ka ogandawa modak e pinje maboyo kaka Amerika kod ulaya ka odhi dala to ji miyogi mos mathoth mondo gi kowne oganda ma odong' chien. To kata kamano ka onyisini osiepni moro mane usomo godo higni piero adek mokadho omosi to ok chalni ka adiera, kendo imedo gi kiawa, mak mana ka iromo kode wang' gi wang' to iyudo ka in kod mor mogundho. Tiend ngeroni en ni gima ineno gi wang'i ema inyalo pimo chalne.

123. Maliet ema kwe

Tiendeni onge gima siko e wang’ pinyni, gimoro ka gimoro nigi gikone omiyo kata obedo ni oliet machalo nade to nyaka okwe. Lokruok nyaka bedie kuom gik moko duto e wang’ pinyka; kata obed mana loch kata telo to ber gi giko.

124. Migosi malayo e dag ndawa

Ogandawa mang'eny ka oyudo loch to owuora kod timbegi bedo mag ong'ielo ng'ielo, kendo gi timo timbe moko ma mon ka jatelo timo, kuom ranyisi ka jaduong' gweng' kod ruoth nyalo haro nyathi ma ja higni apar to ka wuon nyathi dhi nono wachno to irwake e od ang'ech kendo ichwade kod olando ni wiye tek kendo ohango wach ne jatelo ma en e buoye. To mano bende doko tim? Ka ruoth ma onego rit jopiny ema olokore timo agwambo kod nyathi ma mbas nyakware! Ruodhni bende olokore kod mon ma oluongoni mond yawuote ema olago mano bende nyiso lony mar piny? Dong'e chieng' no yali ka yamo oloko?

Kaka ung'eyo ni dag ndawa iolo mana e chiedho mar dhiang' to ok mar dhano ngang'. Omiyo ka wang'i okolo kudho ma itimo timbe ma njore njore to bed ka ing'eyo ni piny oyie wang'e. Mit ki chieng’ moro gigo duto mitimo no timni bende.

Ngeroni puonjo ruodhi ni mondo gi bed ka gi tang' kuom timbe ma gitimo, kendo gi nonre echunygi nikech loch ok sikie chieng’ noyalgi ka yamo oloko.

125. Mwanda ok tony e horo ariyo

Chal kod ngero moro mane wase winjo ni apuoyo ok tony e horo ariyo. Tiendeni jakuo ndalone chwok. Chieng’ moro achiel nyaka omok e otegu.

126. Manga oromo gi magare e kor nam

Manga en got moro ei Kisii machiegni gi Kitutu Chache omiyo joma wuok machiegni gi Oyugis to olony kode. Joluo ne wachoni nitiere hoho moro e buo lowo ma owuok ei nam Lolwe to otuch ewi god Manga omiyo ka piny yieng'ni to jodong'o ne wachoni nam yueyo. Kendo nitie bugo moro matut ewi god Manga maka ibole gimoro to gino ikwanye mana e nam Lolwe. Ngeroni itiyogo ka gimoro otimore mane ji ok parni nyalo timore, mana kaka osiki ma obol e god Manga to owuok e nam Lolwe.

127. Nyako opong' kiliel wuon

Nitie gik moko ma kata nyathini oheri ma nade to ok nyal timoni. Kata obedo ni tiki ojambo ka bad konga to nyari ok nyal keto mirich e wiyi mit lieli. Tiende ni nyathini ok onego ne dugi ka osebedo maduong'.

To wach mawuoro ni e piny masani to wuoro gi miyo kanyakla kod nyithindgi dhi goyo abal kanyakla e kud luokruok ( swimming pool ), koro kadipo ni anung'o di lwarni piny to mano iwacho nang'o? Nyathini biro juko nigo koso obiro chung' kar tiende, to kaka ung'eyo ni wang' to ja nuoyo! Ngeroni puonjowa ni  wabed kod luor kuom nyithindo.

128. Nyathi otenga kicham alot

En ngero migoyo ne nyithindo ma odongo e dala ma muandu nitiere mang'eny, ma gimoro amora ma odwaro to oyudo. Mana kaka ung'eyo ni nyathi otenga pile ok cham alot; otenga en winyo ma ohero mako nyithind gwen ka gi kwayo oko e pap kama ler.

129. Ng'ama oloyi onyono kwesi meru

Kwesi en gima ne jodong'o ohero madho to kadiponi ng'ato onyone to mano nyiso mana kaka ochayi, moloyo ka koro ng'ato toyo kwesi meru to ineno. Chal kod obila ma kata omako meru to ok iping'i kiting'o dhogi to in bende idonjo e wach, sirikal kalo gi meru to ineno gima inyalo timo ema ong'e.

Chal mana gi gima chieng’ moro otimore na dala kaluo ka obila moro omako jodalawa duto nyaka minwa bende ong'wano, to ka apenjo to onyisa ni mondo awuo maber tiendeni agol gimoro matin, korka mondo owegi. Ne ochuna ni nyaka aluw bang' jogi kuom seche mang'eny ahinya nyaka ne agolo masoya korka ogonygi. Mano ne otimore nikech aong'e gi duol.

130. Nyiero machien mit moloyo motelo

Pile ji ohero nyiero kata pok gineno giko mar wach ma mitno. Kuom hawi marach ka nyiero okelo masira, koro jomane inyiero ema winjo maber omiyo kik inyier nyawadu sama en e chandruok, duk jawiro mit koduogni.

Ngeroni apimo gi wach moro mane otimore ekor gweng'wa higni piero ariyo moko mokadho; ne nitie jaduong' moro mane tiyo e boma ma Nairobi, to kane ochopo ni koro oweyo tich, to ne okwaye mondo oter ng'ato e loye. Kuom hawi marach ne oong'e kod nyathi ma wuowi to owadgi ne nitie kod rawere mathoth ahinya, kata kamano ne odagi tero wuod owadgi. Kendo ne otoyo lak kowachoni; “to nyithindo moran'gi ema iwachoni mondo ater obet e loya! Mano gima ok nyal timore”. Bang'e ne oketo jamwa moro mane ochule omuom mathoth.

Higni ne okadho bang'e pesa ne orumo, dhako ne oweye kendo  ochako tedore kende to yawuot owadgi mane owachoni oran kande ema koro ne osayo mondo omiye kata raum (baranget). Omiyo mor mane omor godo ne orumo, to owadgi ema koro winjo maber.

131. Nyathi mioro ema yieng'

Riwruok kod sinani ema nyalo miyo iyud gima idwaro. Pile nyithindo ma olokore mbara riany ok bed machiegni gi jodongo nimar wigi tek. Omiyo gweth imiyo mana nyathi ma jaote. Kata chiemo odong’ matin to nyathi ma jaote ema imanyo kuma nitie.

132. Ng'ama oyieng' rabuonde wang'

Kain kod muandu mang'eny to samoro wiyi nyalo wil ni ong'e joma chandore. Mana kaka ng'ama oyieng' wiye wil ma rabuon wang' nikech oparo ni ji duto ne osechiemo. To ka dipo ni kech kidhi to nyaka ibed machiegni gi dho kendo,  ng'ama oyieng' to loko ng'eye ne dho kendo nikech kata rabuon owang' to obiro tedo moro, to ja-kech to nyaka kung' matin ma entie godo esechego.

133. Nyathi moyieng' nyalo wang'o dero

Pile dhano paro mana gima kawuono moloyo ka weche beyo kendo giwinjo maber. Mana kaka nyathi bende ka osechiemo moyieng' to nyalo paro ni oyieng' nyaka chieng' ma koro ok oparni kiny bende nochak ochiem kendo.

Dero en kar kano cham omiyo ka iwang'e to tiende ni kech biro chamo jodalono kuom thuolo mabor. Ngeroni puonjowa mondo wabed motang' kuom gik ma watimo kendo wabed jokungo moloyo ka wabedo gi adiera ni ich bugo kiny bende ibiro mana dwaro chiemo.

134. Nyathi ma swekore (swedore) e ot kia gima timore oko

Loso kendo bedo kama joweteni chokore nyalo miyo iyud weche kod rieko manyien kendo ibed kod mijing'o kuom tichni mapile, moloyo kain kod osiepe ma tiyo matek. To ka ilokori "ja-dhako achiel nyiek dhako" to ibiro mana oyo mach but dhako chweya, mana kaka nyithindo ma itamo ni ok tuggi jowetegi ok ong'eyo gima timore oko mar odgi.

Ngreroni puonjowa ni dhano puonjore nyaka tho omiyo penjo to e ng'eyo. Ere kaka inyalo penjo kaok iwuoth gi joweteni?

135. Nyar rachiero ogoyo bul otucho

Joma fwambo weche mag miriambo gin joma ok ong'eyo adiera mantie kuom wachno. Mana kaka nyar rachiero bende goyo bul ma otuchi nikech ok one kata bul chiegni barore. Ja-miriambo bende paro mana ni gima owachono ni kare, kendo ok ong'eyo yo ma onyalo pimo godo wachno maler omiyo ooyo e ndere kata gima okia.

136. Nyawang'a ja-Karabondi

Ngeroni igoyo ne ng'at ma medo wach kendo dhoge ok ling' gi wach. Dhoge chalo opil mach ma wang'o piny ngima.

137. Ng'ama chiemo gi muofu mayiero kama chwe

Pile jotelo mag piny mayo joma odhier nikech gi ong'e duol mar penjo. Kik ima nyawadu matin ma en godo nikech in kod nyalo, mana kaka muofu bende iwene mana choke nimar ok one gima lweti otingo.

138. Nyabondo moher oyieyo kidek ng'ado

E piny masani ka ichiko iti e redio kata ka isomo oboke (gaset) moro amora to iwinjo mana ni joluo duto oriwo Amolo Tinga lwedo mondo okaw loch Kenya, to dak uparie ni puothi ma ipuro bende nyalo bayi maok ikayo chambe!

Bende uneno ka oyiech nyakosi moro lidho? Ngeroni puonjowa ni mondo watang' kuom wasigu e seche ma waloso chenro moro amora. To nikech ng'at ma uhero kendo udendono nitie jo-mibadhi ma ok oyie kode, kendo gidwaro mana keye mel.

139. Nyambura chunye ariyo

Nyambura en le maber ahinya kuom neno kendo kuom bedo godo ei ot to kendo en kod hera kuom dhano, mak mana ni ka chunye okethore to onyalo bari ndasi kod kecho kata gwari gi koke.

Ngeroni igoyo kuom joma kutkut, kendo gin joma wuondore e wang' oganda ni giber, to ka gimoro otimore e kindi kode to diwuore gima ne punda oneno e bur bala. Omiyo tang'uru gi joma kamago nikech inyalo moko e obadho (otegu) mikia kore.

140. Njuki ipoko to imuodo

Paro mar dhano en mana kaka in ema idwaro iwuon, to onyalo bedo gi berne kata rachne. Mana kaka Waindi nigi ngechgi moro ni "ong'e gima rach kata ber pachwa ema miyo obedo kaka en". Tiendeni paro nyalo ketho gima ber kata nyalo lose ma obed gima wang' gombo neno.

141. Ng'ini ng'ini sombo

Yot mondo oganda oyak gima ok luchgi ochotie mana kaka ng'ni ng'ini bende nyalo monji kendo keth gigeni mathoth gisombo mana matin tin nyaka rum.

142. Nyang' omi amiya

Ka iyudo chandruok moro matin kata maduong’ to kik iparni ng'ato ema omiyo gino otimore samoro in ema idwaro kendi, mana kaka ng'at ma ka oseluokore e dho wath to korka obuk tarore e wi lwanda, koro ka nyang' di maki to ng'ama ibiro ywagne? Kata ka idhi goyo simbi to ka olonyi nikech iong'e gima inyalo singo to kik iywagne nyawadu, in ema idwaro kendi

Ka dipo ni ne ok idhi but wath to nyang’ dine ok omaki, omiyo ngeroni puonjowa mondo wabed motang' kik wa ywagne jowetewa seche duto ka gimoro otimorenwa, en dwarowa wawegi.

143. Ng'wen ne ogalo dhako mane dhi por

Ka idwaro timo gimoro to chome mana tir gimoro nono nyalo sieko ma lal pachi mana kaka ng'wen bende ne ogalo dhako mane dhi por. Ng'wen gin kudni moko mafuyo gichalgi adero kata agoro ne joma odak egweng'e kaka; Kabondo, Kamangambo, Kanyamwa kod gweng'e man milambo to olony kodgi. Dipo ka gweng' ma iaye bende ise nenogi!

144. Nindo notero jater ka pok otero

Chon e piny luo kane wuon dala otho to imanyo ng'at ma nyalo tero dhako ma oweyo mondo otiek kweche mag dala, to ka dipo ni ng'atno ok otimo tije mar tero e seche ma idware to onyalo miyo dala bam.

Ngeroni puonjowa ni e pinyni ok ing'eyo gima nyalo timoreni, onge adiera ni gigo ma wadwaro timo biro bedo kaka wachano, chenro nyalo bare mana kaka agwata bende nyalo bayo dhogi ka idwaro kuoto nyuka mi opukre oko. Ka koro jater ema nindo otero but tich, ma ok otimo tije, mano doko tim!

145. Nyako ber gi kawang'e to piere to owang'!

Agulu ber gi oko to ok ing'eyo gima oting'o, el iye mondo eka ine berne. Nitie oganda moko ma ber kuom loso to kido mopando to lich ka kama oywech onywole. Kuom yawuotwa ma ohero sero nyako nikech ber mar neno, mani en puonj mondo kik iparni ber mar wang' ema miyo inyalo yudo dhako mondo ilos godo yor keny. Kido ema loso dak, to ok ber mar neno. Jaber jaula.

146. Nyiero migeng'o mit moloyo moyaw

Gik ma ok oyiene ji timo ema pile dhano temo mondo otim, mana kaka terrwok gi dhako man gi chwore kata dichwo man gi chiege, en gima rach to ema iyudo ka dhano ohero timo. Ja-thum moro yande oweroni: "atemo matin to mit ka chi akwala, atemo matin to mit ka chi atera, ayaye kong'o ni mit...".

Ngeroni puonjowa ni ber itim gimoro e lela moloyo apanda nikech pile gik ma igeng'o ka owuok to chal dho ko mang'we. Kidwaro nyiero to kik itho dich wuoye awuoya matek mondo orum. Tiendeni ong'e richo matin gi maduong'. Nikech pile jachien idho dhano mana e gik mogak, kendo ema neno maber ne wang'.

147. Nyathi ok ma ngeta ne

Ng'ato ka ng'ato nigi michne kata pokne ma ok onego tuone kata maye. Ka ineno nyathini odolo nyang'e tugo godo to kik imaye kendo iwit gino ka iparoni oketho seche. Ngeta en koth yien moro mopadore matin to pile nyithindo ja tugo kode.

Ngeroni puonjowa luor kuom oganda duto matindo gi madongo, nikech ng'ato ka ng'ato nigi pokne obedni otin kata oduong'.

148. Nyodo ne okonyo omboga

Tichni kata timni maber ema chieng' nogoli e masira kata e chandruok. Omboga kaka ung'eyo en alot ma jaluo ohero chamo ahinya, to en alot ma nyalo metni piyo piyo mi ite bed mang'eny bang'e to ogolo kodhi ite ing'wedo kapod oyom yom eka omit, e seche ma wuon puodho pod ogalore to oyudo ka koth omboga ema koro oloyo ite gi ng'eny omiyo koro ok onyal ng'wedo ite e yo mayot.

Nyithindi minyuolo ema chieng' moro nokonyi ka koro iseti to anyuola dwaro yako gigeni, kendo gin ema gibiro miyo kari dhi nyime nikech nyikwayi pod biro mana loso nyingi e ndalo mabiro. Ne joma ok onyuol to kargi lal nono, mana kaka omboga dine we golo kodhi to dine wuon puodho ojwero ite nyaka odong' chogo nono.

149. Nungo piny kirom

Ong'e ng'ama nyalo bedo gi gik moko duto, loch osiko mana kaka piny bende gikone ong'e ng'ama ong'eyo.

150. Ng'at man'go ja oyiem

Pile jomwandu ok odewo jowetegi. Chandruok mak owadu ok moni nindo. Kata ineno ka owadu ok nyal chulo ne nyithinde sikul fis ( pesa mar somo) to ok idew, iwacho mana ni to ng'ane gini to wigi nindo, dak oti matek kaka jowetene ma moko? Kare ok ing'eyoni hawi kirom. Sunga ema ihindo kar ratil, mag pinyni to rumo...!

151. Obaro nyar Wasare mane obaro gi thum odhiye simba (mane bar dhi e liend guok to we liend dhano)

Timruok ng’ama ong'eyo ahinya nyalo miyo itim gima gala gala, mana kaka nyar Wasare kar mondo openjo tiend wach to olokore ming'eyo mi ochomo mana simba, ngeroni nitiere tieng’ diriyo jomoko wachoni ne obaro odhi e liend guok to jomoko bende wachoni ne odhi e simba, to duto gin kod puonj achiel ni ber nono kendo yudo tiend wach moloyo rusruok e gima ikia kore.

152. Osuri oumo mang'eny

Mier ma wadakie nitie timbe mopogore opogore, to welo ok ong'eyo adiera mantie, mak mana jo-dala wegi. Mani nyisowani, juok ma iiro ka ng'ato ok inyal ng'eyo. Osuri en kede moro mane iketo e wi ot mondo obed kaka ranyisi e chik Luo kendo ne ok nyal um tado mi tur osuri ka wuon dala onge. Kaka osuri en e wi ot tir dine obedo gi wang'e to en ema onyalo nyiso adiera matimore e odno.

153. Ondeyo ng’ang’ to Onyango budho

E piny ma wadakieni nitiere oganda moko ma ohero chamo luch jowetegi to budho abudha, kata kamano nitie joma bende tiyo matek to ok ne ber tichgi nikech jochiemo ng'eny to jotich tin.

Onyango gin oganda ma tich teknegi, gin e oyundi ma ka inyisoni odhi kulo to oyudi ni tienda lit, oyudi ni bichiem oyundi ni sese se...  Ondeyo gin oganda ma tiyo matek. Koro penjri nito in kanye!

Ngeroni parona mana gimane otimore Asumbi Katholik Misen higni apar gi wiye moko mokadho, kuom pate (jodolo) moko ariyo; achiel ne en jasungu to machielo ne en jaluo, gimane otimore ema: Jaluo ne ok ohero tedo to jasungu to ne osiko mana ka loso gago pile ka pile. Chieng’ moro achiel ne jasungu onyiso jaluo ni mondo olos gago to osiko mana ni ool to ndawa ema ofuong'o ok odwar tich, ne ochopo kama koro nyawadgi ochako tedo to kobukore ni Ondeyo ng’ang’ to Onyango budho, bang'e chiemo ochiek kendo osudo e dho mesa kendo obeto kuon molung'o kado pep.

Kuom ndalo mogwaro ne osebedo ka otimore mana kamano, to jasungu ne pod kia tiend ngeroni, mit ne openjo jago moro mi olerone tiende, mit wuod Luo chieng’ machiel obukore mana ni Ondeyo ng'ang'..... to ka dhoge pok olwar to apat mane oyudo e lembe mi wang'e omil simonde-simonde mi wach orwenye, aaye kanyono ne ok ochako orumo wach kod jasungu kendo. Mani puonjowa ni kik icham luch joweteni kuom ndalo mang'eny to dhogi ema ipako kar wembe, mit ki chieng’ moro irom gi mak olwer; par gimane otimore Asumbi....!

154. Opuk ogo e pige

En ngero ma igoyo ka ng'ato osebedo ka ji ok nene ka gima onyalo timo gimoro maber kuom hawi ka  oyudo thuolo mar timo gima olonyie ahinya kendo otimo gi nyadhi kod sunga miwuoro, ma oganda duog hum nono. Mana kaka opuk bende inyalo neno ni oling' e ding' pi kendo oneno mool ahinya, to ka dipo ni inyume e pi ni mit kodek tho, to ok inichak inene kendo.

155. Osiepni en jasiki (jawasiki)

Mana kaka osiep wuodwa ma rahuma chande ne ondhoge, kar kelone nyamburko kaka ne gi winjore to okete mana e lwet jo miganga, mi ne gikawo chuny wuodwano mana ka tugo. Ngeroni puonjowa ni mondo watang' kod osiepe nimar ginyalo ndhogi apoya nono.

156. Osieko ni ngeny nyar kawuono

Oganda moko nitie ma kata kama ne ok ogwele to osieke asieka kendo ka oyudo ka ji kawo gago to en ok openji, odonjo adonja mana ka "ja kanyono guo Ang'ang'o" ma en ong'iyo gi ng’ato ang'ata moromo godo. Mano bende doko tim kama ok oluongie to ithurori athura kendo ionge kata gi wich kuot! Odiechieng’ ka odiechieng’ bende ruu mana gi mare...!

157. Odidi (odit) ilunyo kar tinne

Odidi en winyo ma tin ahinya, kendo ka jo-kwath ne omake to kata otin kamano to nyaka lunye alunya kata obedo ni ok oromo kata lemo achiel mar gweno. Kata gima dhano ok ne berne kik icha, chieng’ moro berne nonen; koda otin koda oduong’! Tiend ngeroni chal kod "tin tin ok en midekre" kik icha gimoro nikech otin nitie kama onyalo konyo bende. Moloyo jo-mwandu ja chayo gige jo-chan nito ng'ane gini gi bende nigi gik ma inyalo pim gi ma moko? Nikech en kod gik ma oparo ni dongo moloyo. Ng’wenyo kuon pogore jomoko waro war tado to jomoko waro war gama.... Ngeroni puonjowa bedo ma mor kod matin ma wan godo.

158. Osiep ma ngita gi del

Ngita en kit rudho del omiyo ok inyal pogori kode ka idhi luokori. Nitie osiepe moko ma ok nyal pogi, mana kaka nyako ma oketho wuoyini to in bende iketho nyakone ok inyal pogori godo ma kata obedo ni ose dhi ka tedo to ka dipo ni uromo to iwinjo mana ni to bende iparo ma nene? Miyo pogruok bedo matek ahinya nikech uchalo joma opon kanyakla.

159. Oyieyo mathoth ok kuny bur

Jopuonj ma ng'eny ne oketho Kabete, kane ochopo ni koro odwaro ger kar tiegruok moro ei Nyakach machiegni gi Nyabondo to puonj mang'eny ne odonjoe mi paro okethore, kuom mano ne ochak oger kar tiegruokni e boma ma Nairobi. Kadi ne jo ng'ad rieko gi tang' chon to dine gi loyo wachno, mi gi kwedo pach jopuonj go.

Kata tedo bende ka ji adek kata ang'wen omako dho kendo achiel to nyaka inge ni mit ka tedo nokethre nimar ng'ato ka ng'ato nigi pache. Omiyo direp nyamburko bedo mana ng'ato achiel to otingo dhano ma galamoro.

160. Ondiek ok nyier nono

Gimoro ok timre nono nyaka bed gi gima omiyo. Mana kaka otoyo bende ka iwinjo kawuoyo lak to ing'eyo ni yilo nege.

161. Ogwang' iwito gi lawe

Nyambura ka otho to kata piene ok gur, iwite awita kod piene. Onge kata ng'ato achiel ma nyalo wacho ni nitiere nyambura ma piene ber kata punda ma inyalo gur piene. Gima rach ijwango ajwanga nikech onge berne kata matin.

162. Ong'er ne odwaro ip mabor

Timbewa ema biro luwo bang'wa, gima ilamo emano miyi; ka timbeni beyo to mago emano luwi, kain ja mibadhi to mano emano luwi. Omiyo gimoro amora ma itimo e wang' pinyni to bed ka ing'eyo ni chieng’ giko to ibiro yudo pokni; kata ber kata rach.

163. Obudha ne ogalo Kanyikwaya

Kanyikwaya en gweng’ moro ei Gem, Siaya. Kane ochopo ni onego ji oikre mar dhi wuoth to kuom hawi marach ne pod giparo ni onego gitiek maling' ling' korka gi wuogi. Nobudhore ma wich owil gi chenro mar wuoth.

Mani chal kod pakruok mar wuodwa moro ma jo thum ma migosi ahinya miluongo ni Opiyo Jakabudho; opakore ni en Jakabudho mane obudho wuon miaha ma wuon miaha oduogo ochich ni to obudhore ma nade...Kaka ung'eyo ni miaha chon kane okel to kayuoche ne yuoro budho, kendo gi yudo thuolo mar loso kod yuorgi. To kata kamano ber budho mabedo gi gikone mondo wuon miaha bende oyudie thuolo mar bedo kode.

164. Otoyo maluor ema ruu

Ng'at ma oritore kendo nono weche kapok otimo ema dak among'a, to jarikni jamuod nyoyo gi kuoyo. Otoyo ma owuor ma mako jamni e kor gweng' ok dag aming'a, nikech chieng' moro piny no ruu ne oko mi oganda yuorne gi tonge, kendo keye mel, to nyawadgi mane odok e thim chon chande to otony.

165. Oher! Oher! nyar Mitambaa kidhi kucha ka nong'eyi

Jogo ma omako kombe madongo e migepni, kod kidienje mopogore opogore nyaka bedgi ng'eyo matut ni luor ema nyalo miyo tichgi odhi nyime, jatelo nyaka luor joma otelo nigi kor ka jogo bende nyalo luore.

Kata Amolo Tinga ma joluo puoyo mokalo ka dipo ni ok oluoro oganda to berne nyalo lal nono mi nyiero wuogie. Omiyo luorri iwuon mondo oganda oluori. En puonj ma ing'eng'o godo wang’ joma paroni gin ema nyaka lamgi korka dhano nyalo yudo konyruok.

166. Ondieg thuru chami weyi

Wat opogore gi osiep nikech chopo sama osiep orumo, wat to ok rum ma kata ike gi owadu ma ok umodhru pi to ka tho ochopo to inyalo dok chien mi iwachni ma en rembwa ok anyal wite oko, to osiep to ka orumo to oke chuth ka dher ariemba, ma wuon akawo.

167. Oketo kore chi Nyang’onye otuo

Mani en ayany ma iyanyo godo jogo ma joket korgi kata e gima gikia tiende kata wiye, nitie oganda moko ma ohero mana timo gimoro nikech oneno ka ng'ato timo. Ok en tim ma kare ka itimo gimoro nikech ineno ka Jaduong' Abila atimo kata nikech Mig. Odundo timo koro in bende nyaka itime atima. Ngeroni puonjowa bedo gi lony kuom gik ma wa wacho kata ma watimo.

168. Otonglo nonego Otondi nyar Seme

Gombo mwandu mar pinyni nyalo miyo ibed kod ndalo ma chwok e pinyka, mana kaka otonglo nonego Otondi. Bed ma mor gi matin ma Obong'o Nyakalaga opogoni. Pinyni ok sikie kata omiyi mana mwandu ma opong'o dero to chieng’ ma itho to duto ibiro weyo, koro ere dwaro gima ok inyal neno berne?

169.Oyieyo mothitho ema igonyo

Kaka ung'eyo e pinywa mar Kenya ji osebedo gi lweny kod sirikal nyakane wakaw loch e lwet wasungu nyaka sani pod wan mana gi lweny mar yudo adiera kod yangruok, moloyo wan joluo pok waneno ber mar yudo ohuru. Omiyo seche duto iwinjo ni jaluo ema omaki ka dipo ni weche mag loko sirikal owuok. E higa mar 1982 nene omak yawa madong'o kaka Ochuka kod lange mi olal miru.

Ngeroni puonjowa ni ka omaki mi orwaki e od ang'ech to ichal mana gi oyieyo ma otegu omako omiyo ywakni kod mar ogandani ema nyalo miyo iyud resruok mi gonyi. Nyocha uwinjo kendo usomo kaka ywak oganda nyocha omiyo ogony jaod bura ma Rangwe Mig. Ochuodho Shem..

Kata ka jo maundu omonji to nduru ma igoyo ema nyalo miyo ji yuor mapiyo piyo, mi iyud konyruok.

170. Ogwang' chamo to tho rome

Hawi biro bang' tich matek, mana kaka ogwang' bende ka dwaro mako gweno to nyaka oyor mana tho. Ng'ich mar tho wapimo mana gi chandruok ma iyudo ka imanyo gimoro; nyaka ibed gi kinda kod sinani, onge gima biro mayot.

171. Oru maloyo yie rombo gi thoth (ng'eny)

Onge ng'at ma nyalo kwano kata paro gigo duto mosetimore e ng'imane duto nikech piny koru to oru gi mare kiny bende machielo. Omiyo ipime mana gi yie rombo nikech ng'enyne kendo ok yot mondo ikwan yie rombo. Ngeroni puonjowa ni piny ochwere, kendo onge gikone. Kata gigo matimore ne dhano e wang’ pinyni; obed maber kata marach to ok mon piny ru.

172. Oroma ka puoth rangach

Puoth rangach ka oduma ochiekie to ok inyal tamo jo kwecho nikech inene gi wang’ duto kata jamni kowuok e dipo (kul) to ochomo mana puoth rangach, omiyo obedo matek rito. Ngeroni igoyone ng'at ma timbene ojogo ji, ma kata itimri nade to ok onyal konyo.

173. Osiep tho to wat to osiko

Owadu kata nyameru ok nyal witi ma kata obedoni ok umodhru pi, to chieng’ moro biro chopo okang' ma nyameru kata owadu ema konyi ka wasigu odinoni. Mana kaka ne asewacho e ngero moro ni  "ondieg thuru chami to weyi". Osiep mewo mana kaka chieng’ bende chako mos mos gokinyi to bedo ma mor mor kar sa onyango to ka piny chopo odhiambo to obedo mang'ich. Gimoro matin nyalo miyo osiep rum kata negruok nyalo wuokie. Mano ok onyiso ni wede to ok negre; ooyo, ngeroni nyiso wa ni yot mondo osiep orum to wat to osiko nikech ok nyal nyuoli diriyo ngang', osiep to inyalo loko miyud machielo

174. Oigla geto kabange

Ng'ato ka ng'ato temo mondo obedi e rang'iny ma malo obed e yor tich kata telo mar piny, ruodhi temo dwaro loch nikech gombo mar pinyni. Kata e sikul kuonde ma nyithindwa some gi temo somo matek mondo gi yud namba achiel. Oigla en agulu moro matin ma itede rech kata alode mopogore opogore, to kabange to en thuon dak maduong’; koro tin mar ohigla miyo ogombo bedo maduong’. Ngeroni puonjowa ni dwaro mar chuny dhano en ni mondo obed e rang'iny ma malo kaka nyalore.

175. Pora pora yuom katalang'

Ngeroni igoyo kuom jogo mohero poro kata timo gigo ma jowetegi timo, kaka katalang' kechogi yoka iwe, moro ka moro kecho mana machalre.

176. Rieko chando jomariek

Jogo maparo ni riek ema rieko chando, kaka oganda moko dwaro ni mondo opiem gi chwech Nyasaye, kendo gitemo kaka ginyalo. Gima ikia ok chand pachi (chunyi). Omiyo jogo maparoni ong'eyo ema rieko chando wigi.

177. Rasundu thone tek

Ng'ato nyalo bedo matuo ma chunye ema gudo to mano ok onyisoni obiro tho, jogo ma ji gombo ne gi tho ok tho piyo.

178. Ring'o olokore ler

Gino miparo ni yot nyalo lokore wach ma ratipo (maduong’).

179. Rapemo (Ruoth) nokecho ombwanda Wamlare

Gima ineno pile ok inyal ng'eyo berne, to ne ng'ato nono onyalo bedone manyasi. Chogo migweno iwito nyalo yieng'o guok, kik icha gimoro kata obedo ni ok ine berne kamano. Samoro gino migeno to nyalo bedo marach ne ng'ato. Ngeroni puonjowa ni ber gimoro opogore kuom ng'ato ka ng'ato.

180. Ratego omako dhiang' rachiero logo komiyo wang'e

Puothi ma ipuro ok inyal chamo chambe, nimar jotich tin to jochiemo ng'eny. Jo nyawo pile chamo luch jowetegi, mana kaka rachiero logo remo to ok one kaka nyawadgi luya chotne, ka dipo ni oweye godo to bende ok onyal kata mana duodo dheno.

Ka wang'iyo pinywa mar Kenya onge jogo mose chandore maloyo joluo e loch mar Kenyatta kod Moi ma koro otamore weyo loch sani. Kata obedo ni yawuot Luo moko oriwore kode to nyaka watang'uru, kik waduod dhiang' to rachiero logo remo komiyo wang'e.

181. Ru ruath e mewone

Jodong'o pile nyaka waluor nikech giseneno mang'eny kuom mano paro ma gin godo nyalo konyowa kuom ndalo mabiro. Ruath kaka medo dongo ekaka obedo machwe; pong' ruath e tekone. Pile ka iyiero ruoth to nyaka iwinj ka ji penjore nito jagono hike adi, ka otin to iwinjo mana ka oganda ng'ur kode ni dipo ka loch otame.

182. Sembe rombo ipimo gi nyawadgi

Gimoro ka gimoro ipimo mana gi nyawadgi, obed marach kata maber to nyaka pime mana gi ma nyocha osetimore. Gima rach, rachne neno nikech ber ma ji oseneno kuom ndalo mokadho, to ber bende ineno mana nikech rach ma ji oseneno. Ka onge gima ipimo godo gimoro to onge kaka inyalo wachoni orach kata ober. Sembe im ipimo mana gi nyawadgi nikech achiel nyalo bedoni duong’ maloyo machielo.

183. Sinani e lweny

Kinda e ng’wech, onge gima biro mayot, nyaka iket chunyi kuom gima itimo.

184. Sunduswaye

En ayany ma iyanyo godo jogo mohero timo timbe maok ochopo kare.

185. Thuol odonjo e koo

Ka thuol odonjo e koo to nyaka par mana paro maber ma inyalo gole godo maok koo otore kendo thuol bende ok okayo jagolne. Paroni itiyo godo ka ng'ato ong'adne bura to burano nyalo hinyo achiel kuomgi kata gin giduto. omiyo imanyo paro ma nyalo konyo loyo wachno maok okelo pek moro amora.

186. Thuond gwen ariyo ok ted e agulu achiel

Ji ariyo man kod rieko maromre ok nyal ket e tich achiel. Mana kaka Ker Moi wiye nowil ni e piny ma ngima Kenya kende e piny man kod ministers ariyo e kom achiel, mano en mana kaka itedo thuond gwen ariyo e agulu achiel, onge paro moro maber ma ginyalo golo to nikech ng'ato ka ng'ato paro mana ni en ema ong'eyo moloyo nyawadgi.

187. Tiriri ywak nyatawo

Nyatawo en winyo ma gotieno eka oneno to ywakne pile oyware, ma ok rum piyo. Itiyo kod ngeroni ka gimoro timore ma onge gikone, kaka loch ang'enge mosiko mane jo-kaburu otiyo godo jo Afrika ma milambo.

188. Thin thin ok midekre

Kik icha ng'ato/gimoro ni ineno ni otin kata ni onyap dipo ka berne kata tekone obuogi ma iyud wich kuot kayiem. Apuoyo tin to goyo rude...!

189. Timni e nyingi

Gima itimo ema biro loso nyingi ka timni rach to nyingi ema kethore. Tim ema miyo ng'ato nying'.

190. Tin ok en fuwo

Bedo ng'at matin ok en fuwo nimar nyathi bende nyalo puonjo wuon, kata bedo jatelo ok ochuno ni nyaka yier mana jaduong’ mang'ongo, ka dipo ni nitie rawera matimne ni kare kendo oromo tayo jodongo to bende inyalo mana miye ombulu, kuom ranyisi; Orengo nodhi e od bura maduong’ mokwongo kaen gi higni manok ahinya, kendo en emane obedo kaka ng'at ma hike tin ahinya e od bura. To mano ne ok omone bedo jatelo. Kata obedo ni bang' ndalo manok nogoyo kuot piny ne nyamreche nikech tich ang'enge mane idwaro tiye godo.

Mar ariyo an kane achako puonjo joluo ngeche to oganda mang'eny ne ochako ng'ur ka gipenjore nito mano to oa gi kanye, en jaduong’ mane maok wang'eyono? An awuon ok ang'ongo ruok en mana chir kod ngwono. Sani koro ji somo wechegi nyaka jodongo ma mbas wuora kendo gipuoyo. Omiyo tin tin ok en midekre. Odidi ilunyo mana kar tinne, apuoyo bende nyalo puonjo liech.

 191. Tuk dumbe dumbe mit ne nyithindo to en ywak maduong' ne joka    ogwal  

 Ka nyithindo tugo e yao (dago) en mor maduong' ne gin giwegi, ogwal to ywagore ma ode tiende to owe ng'ute, kaka otimre onge! Nimar mor mar jaluo e mbuyi mar jaluo dot kom ok en mor ne jamwa ma ok nyal some kata jaluo molala ma dhogi orwenyo wacho mana ni mago to ketho seche, koro an awuon ere kaka anyalo kawo thuolo mara mar ndiko to ng'ato wachoni tugo! en mana kaka nyathi ma tugo dumbe dumbe to ogwal wachoni mano masira ma ratipo. Chalo ng'at ma ogedo e kor liech to ka liech ochopo to muko odno koparo ni mano en mana bungu moro ema odino kore, kendo ochako manyien, nyithindo bende leng'ore mana e od ogwal kata sama ogwal dwaro yueyo mos...!

Ngeroni puonjowa ni wang’ neno mopogore, paro bende paro mopogore kuom ng'ato ka ng'ato, mor mar dhano ka timo nyasi maduong’ en yang'o dhiang' kata im to en ywak maduong’ ne joka le nimar gin ema inegogi.

192. Wang' mikudho ema gawi (chiero ma ithiedho ema gawi)

 Konyo ji ber ahinya, mak mana ng'ano ma ikonyo ema ndhogi, mana kaka Mig.Tom Mboya nokonyo Okuche, bang'e to gi chiele gi lisasi kayiem nono, wuod Seda bende mana kamano, Mig.Oginga kane ose konyo Kenyatta to bang'e olokore kode tung' mosuo. Ka igolo ne ng'ato gimoro e wang'e to wang'no ema obiro gawi godo.

 Kata sani Raila Amollo temo konyo jo-Kanu matek matamre gi  nono, kuom hawi marach ginyalo turo oseke kato giwachoni math orumo...! mana ka gisewuok e ngegu. Omiyo joluo nyaka tang' gi onjelo nimar rieko mane gitiyo godo Lwanda Magere pok wich owil godo. Kata e mier kuonde ma wadakie donge ineno ka nyathi obalo kod jonyuol bang' ketho pesa mang'eny e yor tiegruok. Kendo koro owachoni en ok onyal konyo jodongo gin bende ginyalo mana manyo margi giwegi. Kane onge jonyuol bende ok nonyal chopo e okang' ma koro entie sani.

196. Winyo bende uyo to ka aye to piyo

Gimoro ka gimoro bedo gi gikone, onge gima siko.

197. Winyo ka winyo ni gi ywakne

Ng'ato ka ng'ato ni gi pokne, omiyo kata ng'ato lawre kodi ma nade to ok onyal mayi michni. Mana kaka winy odak e bunge to ywakgi pogore opogore, moro ka moro ywago mana ywakne owuon.

198. Yie ok neg ji duto

Masira mar tho nyalo juko ji mathoth, to nyaka ng'ato achiel tony. Ngwono mar Nyasaye onge ng'at ma nyalo fwenyo.

199. Yie gore piny ka chigni gowo

Nitie yie tieng' ariyo "Yie" ma kwang' e nam kod "Yie" mar chuny/pach dhano, yie ma kwang' e nam nyalo gore piny e dho wath ka chiegni gowo ma neg oganda buora. Chuny dhano bende nyalo jok ma gima nyocha ose geno timo bare, Keny bende nyalo kethore e odiechieng’ ma wuon kisera ochano, ka nyako oloko pache. Dhako ma yach bende nyathi nyalo tho e iye ka odong' juma achiel kata ndalo ariyo.

 Kik ibed ma mor gi keyo mapok ichopo nikech kwer nyalo tur ma puodho nind gi buya. Ber mondo wabed gi yie motegni kuom gimoro amora ma watimo nyaka giko. Kik chunywa jogi....

200. Oyundi ni dhi kulo,

Oyundi ni tienda lit.                            

Oyundi ni dhi puodho,                            

Oyundi ni tienda lit.                            

Oyundi ni dhi rego,                            

Oyundi ni tienda lit.                             

Oyundi ni dhi tedi,                            

Oyundi ni tienda lit.                            

Oyundi ni bi chiem,                            

Oyundi ni sese se..........

Thu tinda adong’ arom gi bap joka nera.                             

(PINY OSIKO TO OK SIKIE.....)

NYIKWA RAMOGI MANO EMA KELOWA E GIKO ABICH

NGECHE; MED SOMO KODWA...... 

DAHER WINJO PACHI IN BENDE.........!

 "winyo bende uyo ka aye to piyo....."

NYASAYE

Kane wasungu pok obiro e piny Luo ne wan gi yie kuom jachwech kendo wuon chik ma en Nyasaye Nyakalaga. Kochakore higa 1882 wasungu nochopo Mumias kendo ne gikelo din'gi, mano nomiyo joratenge wigi owil gi kit dakgi, nimar jarachar nokelo gik mathoth mane wanyalo konyorego, kaka; lewni, masinde mag rego, sikunde, osiptende kod ma moko. Kendo ne gi temo lando wach Nyasaye ka giwacho ni nyaka iyud batiso e nying' Yesu Kristo eka ng’ato nyalo donjo e piny polo. Mano ok adiera ngang' polo en mar ng'ato ang'ata mane ochwe gi teko Obong'o Nyakalaga koda in ja Kristo, Islam, kata joka-Rabudi to waduto wabiro tho kendo timbewa  ema biro miyo wanayud ngima mochwere e piny Ruoth Nyasaye. Nyasaye odak e chuny kendo en kodwa ndalo duto.

Wasungu odonjo Kisumu higa 1896 kane ochopo higa 1899 lweny moro nochakore e kind jorachere gi joluo ei Uyoma kendo Bwana Obilo nonego jowa mathoth ahinya mano wiwa kik wil godo. Loch nanga nogero Karungu higa 1903, Kisii 1907. Karachuonyo, Mumbo gi Kabondo nopog owuok e distrikt ma Kisumo kendo obedo e bwo Kisii distrikt higa 1908.

Jo-Misen (missionary) nodonjo Kaimosi higa 1902, Maseno higa 1906, Gendia higa 1906. Mano e kaka jorachere nochako donjo e piny Luo.

Joluo e piny mangima ni gi geno matut ahinya kuom jachwech oganda duto kendo gi dende gi nyinge mopogore opogore; ji thoro luonge ni; Nyakalaga, joluo newacho ni Nyasaye en chuny nono oonge ringruok kendo olak e ringre dhano. Mano nyisore maler ni entie e chunywa. Kuom mano nyaka warit chunywa ka watimo gigo mowinjore eseche duto ma pod wan kod ngima mane wuon chwech omiyowa nono. To mano ok omono timbe maundu betie nimar chuny dhano nitie gi gombo mopogore opogore, gombo nyalo miyo wiyi owil gi Nyasach kwere mi rwak jachien e chunyi.

Jomoko dendo Nyasaye ni Were; tiende ni wuon ng'uono kendo wadende adenda gi wende mamit ka wapake nikech tich ng'uono ma osemiyowa e ngimawa kaka nyithinde. Wuon Kwere tiendeni Nyasach Kwerewa kendo mago wanyalo neno e ranyisi mane osetimo kotayo kwerewa nyaka ochopo kama sani wadake ei Kenya gi Tanzania, kendo unyalo paro kaka nogolo Oyango, Mosi kod Ongiri e lwet jowagunda mane dwaro negogi e od twech ma Kismayu. Nobiro e kido mar Nyakoyi motayo yawuotwagi nyaka ochopo e piny Luo. Noreso dhako ma jang'wono mane orwako Adikinyi e dala jo-Kiseru mane nitie e dho-wadh Simbi Nyaima, joma moko to norumo pep. Nokonyo joluo loyo lwenje mathoth kane wasigu monjogi.

Waluonge ni Ohinga Lwanda Ratego, tiende ni (odinonwa) ogeng'onwa wasigu kaka ohinga mar dala geng'o jomaundu (wasigu) manyalo monjowa. Nyasaye ma jachiwo tiende ni omiyowa gigo duto ma wakwaye gi chuny mang’won.

Joluo dendo Nyasaye gi nyinge mopogore opogore machalo kaka; Obong'o, Ngire, Nyadenda, Ogonya, Wang'e ogoyo thole, Laktach lak teche, Ohinga, Lwanda, Wuon ji, Wuon Kwere, Ja mirima, Jang'wono, Jahera, Nyakalaga, Janeno, Wuon ogendini, Wuon lowo, Hono, Ratego, Jalweny, Polo, Piny kinyal, Wuon oru, Ruodh Ruodhi Wang' chieng' kod ma moko. Ji thoro lemo seche mag okinyi kod odhiambo ka chieng' dhi podho.

Ere kaka joluo ong'eyoni Nyasaye nitie? Dwoko yot ahinya, wayude kuom ngero ni; "Dhako moro nomako ich, to chieng' nyuolne nyodo nochande; to kochandore jakuo moro nobedo e pier ot kowinjo gik matimore e ot. Kane dhakono ogoyo nyathi piny eka nowinjo ka Nyasaye wacho niya; 'Nyathini koro onyuole, onego waik thone bende. Ang'o ma nonege kose dongo? Jowi nori e piny to ka ji yuoro mar nege eka jowi nonege ei piny, mano biro timore ka osebedo wuoyi mopong'. Kendo jakuogno noa kanyo kendo olando wach ni owinjo ka Nyasaye wuoyo. Kare ng'ato konyuol, to chieng' thone bende osechan".

Joluo lamo wang' chieng' nikech lichne kod tekone. Ka jaduong' pacho ochiewo gokinyi to ong'ulo olawo kowacho ni,"Thu…! Iwuogna maber mondo ringra okwe; yamo makudho marach awinj awinja."

Ka chieng' dhi podho bende joduong' ng'ulo olawo kowacho ni, "Thu…! Ipodhna maber mondo ayud gweth."

Jodongo moko oseporo ni samoro  ka chieng' lworo dok wang' chieng' gotieno ka moro onyalo fwenyore ne jomoko; obedo e ranyisi mar mach ma ng'ang'ni ka maj magenga makakni, ok yot mondo ofwenyre ne dhano adhana, to ka hapi ber onenoreni to mano iyudo hawi mar mwandu.

Gima kamano kotimoreni to nyaka iluong' jodalani mondo gimaki, kendo itang'o ne chieng' lweti mondo obolie pith, hawi. Kamano obolo owuoch jamni gi dhok, kendo owuoch dhano, kendo obolo kothe duto mag cham. Kamano iyudo pith mar jamni; dhok, diek, rombe, nyithindo kod cham. Kata kamano jogo momaki ok nyal neno chieng'no nimar ok en gima neno yot ne ng'ato ang'ata. Mano e ngero mane joluo goyo ni weuru wuod ng'ane ochandre achanda chieng' moro norom g'Omoro. Mago e yore ma miyo joluo wacho ni Nyasaye nitie kendo en ja chiwo.

 Ka ng'ato oyudo gweth kata mich moro apoya nono to iwinjo ka ji wacho ni, chieng' opichone, tiendeni chieng' oyangorene. Joluo lamo gode madongo, yath ma jodongo thoro budho e tiende kata mane okunyie jaduong' samoro gilamo thuol maduong' kaka thuond Omieri ma yande ofwenyore ei Nyakach, kata kamano serikal notemo kaka ginyalo mondo gi kaw thuondni giter e od kano gik mane oti godo chon (museum), bang' ndalo manok notho. Joluo lamo jomotho mondo olos pacho. Ng'eny misango mag joluo nitimo gi kong'o kendo jodongo ne chokore ka gi loso math maduong' ahinya

Ka dwe opor to jaduong' mokwongo nene ng'ule kowacho ni; "Thu…! Aneni maber mondo ayud ogogo moro." Yawuoyi to ng'ule kawacho ni; "Thu…! Aneni maber mondo apor gi nyako moro." Nyako to ng'ule kawacho ni; "Thu…! Aneni maber mondo onyuoma." Dhako to ng'ule kawacho ni; "Thu…! Aneni maber kiny nayieng'." Ng'ato ka ng'ato temo mondo Nyasaye orese kuom dwarone ka oneno dwe manyien kotuch e wi got.

Ngero moro nyisowa kaka dwe nokowo dhok nikech oneno ji tho malit to kendo gi chweyo chuth ma ok giduogi omiyo nowacho niya; " Kelnauru bor maler ahinya eka unutho kendo unuchier bang' ndalo adek kendo unuchal koda."

Oganda nochokore kendo oloso tal mabor kendo negimiyo ong'ongruok bor mondo oter e polo, ong'ongruok, nodwanyo bor e buru. Ka dwe noneno bor mochido kamano  nowacho ni; " Adagi borni usetimo marach, ok utimo kaka asewachonu. Koro ubiro tho kendo ok unuduogi kaka an." Mano e kaka dwe nochieno ong'ongruok , mondo oyware piny. Joneno moko wacho ni ei dwe nitie gode gi nembe madongo.

Joluo nigi yie ni polo en piny moro machielo ma ji odake mana kaka pinyka, sulwe gin kende moko ma omokie mach mitedoe chiemo. Mago duto gin paro ma jodongo oseporo kuom kit dak kod yie mar joluo. Kata kamano ji ok lam sulwe ngang'.

Joluo wacho ni sulwe gin kendo mag tedo momoke mach e polo kendo sulwe moko ji porogo higa.

Kit sulwe:

YUGNI: gin sulwe machuo, gibedo adek, gine sulwe matindo kendo giriedo  moluwore, yugni ma mon bedo auchiel kendo giluwore kanyakla.

RATEGO: onyiso ka piny dwaro ru kogwen.

OLUORO BUDHO: owuok ka ji budho kendo opodho chon ka ji pod budho. Sulwe samoro pudhore kendo inyalo neno ka orianjore koringo matek ahinya, ji bayo kuma odhiye gi mach, to ka mach onge gi ng'ule ni, "Thu…! Kirageni…."

NYAMETHO: en gi iwe, kobiro to jodongo wacho ni mano dero mabiro wuok e piny. Ka sulwe mathoth oriedo kendo oloso kor e kor polo to ji wacho ni mano kor ma mony biro luwo kendo peyogo dhok ka ji kedo, samoro gi poro chiek piny. Mago duto nyisowa kaka sulwe en ranyisi maduong' ahinya ne ogandawa kuom yie marwa kane pok jorachere okelo din ma sani oganda lamo. Ka wadwaro luwo yie mar kwerewa gi chunywa duto to ok onego wa we chikwa machon kaka kwere nosingonwa.

Ka chieng' kata dwe ogero pacho, mano nyisoni jaduong' moro biro tho kata ruoth moro maduong'. To ka chieng' oromo, kata ogwenyore gi dwe (kata dwe ogwenyore gi chieng') mano nyisoni gimoro biro timore e piny, kendo jodongo ne chokore kendo loso piny ka gichiwo misango ne Nyasaye.

Dwe nyiso joluo ranyisi mathoth ahinya, e ndalo mag lweny ne gitemo nono kaka dwe poro ne gi. Kaluwore gi mago ne ginyalo ng'eyo ka wasigu onurogi kata yore ma ginyalo tiyogo mondo gi yud resruok.

Nitie ngero moro mawuoyo kuom miaha kod wuon Chik (NYASAYE); owacho kama; "Wuon chik nowachone miaha mane okwongo biro e piny niya, 'Dhi mondo itong' lowo dichiel gi kwer, eka iwe kwer kanyo, bang'e lowo nopurre kende.' To miaha ne ok owinjo duolno, nodhi opuro apura. Kamano wuon chik (Nyasaye) nowachone,'Idagi winjo wachna; inipur nyaka kuok wuogi eka ini yud chiemo.' Mano e kuong' mane Nyasaye okuong'o godo dhano man e pinyka.ni nyaka wati matek eka wanyalo chiemo." Onge hawi ma inyalo yudo ka ok itiyo ma ichodo luya. Mano ema omiyo ka ng'ato puro to oywak niya, "Thu…! Miaha… nijiemo, di ti ji ok pur."

Ka ng'ato ogir to owachoni, "Nyasaye wuora ikonya ka ng'ato wacha marach." Jaluo ka juogi omako to ok chaye ngang' nikech mano en chano mar Nyasaye, irwakone pien diel ma dibo kendo igone ajawa eka odhum.

DINDE JORATENGE

Kar chakruok donjo jo-rachere e piny Luo lwenje nogore kendo jodongwa mathoth mane onegi. Din jo-rachere nokonyo ji mathoth yudo tiegruok kata kamano nobedo kaka yo mar thiro yie marwa kaka jo-ratenge. Kaka ngero moro igoyo ni chuma idolo ka liet omiyo jogo mane ossepuonji e sikunde mag jo-rachere moloyo mag Misen (mission) ne wigi owil gi kit dak mar kwere kendo giyie gi rieko jarachar. Kata kamano somo bende nokelo dongruok mathoth ahinya e pinywa kik wang’i mana rachne kende.

Din mane okuongo en NOMIYA LUO CHURCH mane ochakgi Mig. John Owalo (niluonge e gwenge mang’eny ni Din joka Owalo) mane japuonj e sikund CMS kendo Jomo Kenyatta en achiel kuom jogo mane opuonjo. Owalo noweyo din jo-Ingresa (CMS) kendo nodonjo e kanyakla mar jo-Islam, mano noyudo ka en omwasi (misumba) mar tich ot e boma ma Mombasa. Nobedo ja-Islam kuom thuolo mogwarore bang’e noyudo fweny ni onego ochak din joratenge. Motelo ne mano nochako obedo ja-katholik kuom thuolo ma chwok

Higa 1907 nowacho ayanga kaka ne Nyasaye ose birone e fweny mondo ochak din. E fwenyno noneno kitere e polo gi much Nyasaye kendo onyise ni mondo oduog opuonj din ne joratenge kendo nochako dinno ni NOMIYA LUO CHURCH .

Nochako dinno Asembo bang’e to nolandore ei Nyanza mangima. Nomedo kwedo wach kuom mer, madho ndawa, kwesi,  kod mielo thum nyaluo kaka Nyatiti, Orutu, Onanda, Ohangla kod ma moko. Mago nokwero nikech thoth ji ne thoro timo timbe anjawo ka giromo kuonde math gi miel. Mak manani gigo duto to ok rach en mana kaka ng’ato okawogi. Kane Loch Nanga owinjo ni Owalo osechako din joratenge to noluonge e Baraza mondo oler tiend wach dinno malong’o. Noduokogi niya; “weyauru mondo aland din ne joratenge, an ok ayal ne jo-rachere ngang’”.

Higa 1927 jo-Maragol bende nochako din machielo, noluonge ni DINI YA ROHO. Yawuoyi ariyo mane ochako dini ya Roho  ne gin; Mig. Jakobo Buluku gi Mig. Daniel Sande mane oyudo koro weyo din mar America Friends Africans Mision, Kaimosi. Buluku gi Sande notemo yalo weche mag akwede mondo oketh dinde mane okelgi jo-wagunda. Nimar puonjgi ne opogore gi kit dak jo-ratenge kendo ne ok gihero dongruok gi lony marwa kaka weg piny. Kendo ne gitemo loko kit dak jo-ratenge githuon, nano bende ber adier? Koso Nyasach jo-rachereno kia adiera mar kit chwech jo-ratenge? Kane jo-Amerka owinjo wachno ne gi bedo gi ich wang’. Kata kamano ne ok gimono yawuotwa ariyogi dhi nyime gi lando wach din jo-ratenge DINI YA ROHO.

Higa 1940 jabiskop (bishop) Lukas Nuhu nobedo jatend dini ya Roho e gwenge mopogore opogore. Nogero kanisni e gwenge mopogore opogore, bang’e nobedo jachung’ e kanisa ma Nairobi. Nochako otiyo kanyakla gi din mar East African Independence African Churches (AIC).

Din ma bende koro humbe landore ahinya ei Luo en Legio Maria Mane ochakgi Mig. Messia Ondeto wuod Obimo ma ja Kadibo ei Kano but Awasi, Mesia Ondeto en kaka ranyisi mar jawar e kit jo-ratenge, mana kaka jo-rachere bende nokawo wuod Israel mondo obed kaka Messia margi. Gigo mane wuod Obimo otimo pod ji paro nyaka sani. En bende noyudo fweny mondo ochak kanyakla mar din jo-ratenge. Dinni nowuok e bad din mar Katholik nimar kit lembgi dwachalore matin. Kata kamano Legio nochak achien bang’ dinde ma aselose malo kanyo.

Mig. Alfayo Odongo (Ja-Kawango) nochako din machielo madwa chalgi dini ya Roho, noyudo e thuolono ja-diakon Owen mar CMS oyiere mondo otem nono weche kuom dinde ma koro jo-ratenge ne thoro chako. Noyudo fweny e dini ya Roho mane owachone ni, ` En thuolo ma koro jo-ratenge ikore mar bedo gi loch margi, onego dinde bende obed gi mise mar jo-ratenge giwegi Nomedo yalo wach maler kaka Mathayo matakatifu nondiko niya“Beduru motang’ mondo kik ng’ato wuondu, nikech ji mang’eny nobi gi nyinga, kawacho ni AN E MESSIA MI GINI MI JI MATHOTH LAL.......!

Kata kamano dinde duto ma ase kwano malo kanyo ne gitenore e kit dinde jo-rachere kata obedo ni koro negi temo yalo adieri mar jaratenge kendo kwedo jo-wagunda kuom timbe maricho mane gi tiyogo

Odongo gi jolupne noyudo sand gi kum matek e lwet loch wasungu nikech jarachar ok oyie loch nyaka nene. To kata jo-ratenge wetegi bende nochandogi kuom akwede e kindgi giwegi.

Higa 1934 Odongo gi lange nodhi lemo Musanda (masani iluongoni Kakamega), kanyo emane fweny obirone; `duol nowachone ni gigo duto mantie e pinyni gin mag Ruoth Nyasaye, omiyo jotichne nyalo mana kawogi, gi kanyono jolup Odongo nochako kawo mwandu ji githuon nimar Nyasaye ema chiwo gigo duto. Wachno nokelo sigu e kind Odongo gi jo-Musanda kendo yawuoyi notuk modhi kar lemo mane oyudo gichokore gotieno kendo obelo odno mach, ne gi chako lemo gi duol ma malo ka gi kwayo Nyasaye mondo oresgi kuom masich mach ma koro jo-piny nosebelo e odno. Jomoko matin noringo to thothgi nodagi wuok.

Kuom mano Odongo gi lange notho e masirano. Mano ne ok okelo giko mar din Odongo, jogo mane oringo nochako lando wach Nyasaye e gwenge duto mane okiewo gi Nyanza nyaka Rift Valley. Din Roho pod dhi nyime ei Nyanza nyaka chil kawuono. E thuoloni to kar rombgi ok nyal kwan kwanre. Mana ma nyalo paro gin kaka; ROHO SULWE, ROHO ISRAEL, ROHO NINEVE, ROHO MUSALABA, ROHO FWENY KOD MA MOKO.

Jotelo mane otayo din Roho bang’ masich mach mane otimore Musanda gin kaka; Barnaba Walhoho, Isaya Goro gi Zephania Abungu (mane oyudo osetiyo tich ruoth e ndalo mokadho).

African Israel Church nochaki higa 1942 e gweng’ mar Nyang’or lokesen, ei distrikt ma Kisumo. Nochake e bwo Mig. Kivuli, nokwongo oluonge ni Israel Uhuru Church, kata kamano nying’no ne ok omoro jo-Ingresa mane oyudo tiyo jowa gi tich ang’enge. Koro nolok nyinge ni African Israel Church. Kivuli ne nitie e achiel gi Sande kod Buluku kata kamano esechegi to koro noyudo osepogore kodgi.

Mig. Elija Masinde nochako DINI YA MUSAMBWA, dinni puonjne ne bet dwa pogore gi dinde mokwongo go nimar en mare ne en mar siasa maliw kaka inyalo thul jo-libamba mane obiro yako pinywa gi tich ang’enge.

Kane ochopo ndalo mane jo-rachere ofwenyo kit mula (gold) Kakamega ne gi keto jo-piny gi tich ogirimiti ni nyaka to gi ti maonge chudo. Masinde nokwedo wachno ayanga kendo nomiyo jo-rachere osin kode ahinya. Negi kwedo Masinde gi lange duto, kochakore e thuolono nobedo jasik Piny Owacho. Chieng’ moro achiel noorne ogulmama mondo omake to notamore kendo nomedo yalo koting’o muma kendo okwedo loch jo-rachere ayanga gi tich ang’enge mane gi tiyo godo jo-ratenge.

Mogik to ne gi make kendo gitere e od Ang’ech mar joma wigi ombachni (Mathare Mental Clinic), mano ne ok omono Masinde yalo kendo kwedo loch ang’enge mar jo-rachere. Kane oyudo owuok e kar twech noyudo fweny kendo nodhi oidho got Elgon (Masawa); duol nowachone ni; “Jarachar osenjawo loch gi lony jo-Afrika.” Kendo oganda mathoth noweyo dindegi kendo oriwore gi Masinde kuom siro adieri mar joratenge.

Puonj Masinde ne ok berne Piny Owacho kata matin, omiyo chieng’ moro achiel nokawo wuoth kanyakla gi lange moketho Baraza mane P.C. oloso, mano nomiyo sirikal ong’ado ni nyaka tweye kendo, notemo pondo e buo liend oyala kama noyudo osepidhie rabuon. Kata kamano sirikal noyawo mach (bunde) e kind oganda mane ochokore Malakisi monego ji apar g’achiel.

Masinde noneno ni koro nyaka owuogi oko, nomake kendo otere e od twech Marsabit gi Mandera, kuno noyudo sand malich ahinya kata chiemo ne ok miye malong’o. Mano ne ok omono dini ya Msambwa dhi nyime kendo landore e gwenge ma moko kaka; hosi mar lwaho (rift valley) kod tunge Kenya ma moko nyaka Uganda gi Tanzania.

Jolup Masinde nobedo jolweny mager kendo sirikal noluorogi. Masinde notho e lwet loch ang’enge mar jo-wagunda kapok otieko twech mare. En ranyisi maduong’ ahinya kuom tich mane otiyo mondo wayud loch mar jo-ratenge.

Higa 1959 e gweng’ mar Hosi mar Lwaho (rift Valley) Mig. Joshua arap Chuma nochako din machalgi mane oyudo osechaki gi Buluku kod Sande. Kenya madiere (Central) bende nochako din machielo e bwo Mig. Bildad Kaggia mane oyudo oduogo koa e lwenje mane osetimore loka Ulaya, Asia madiere, Ingresa gi pinje ma moko.Mano oyudo lweny mar ariyo mar piny ngima koro oserumo (second world war).

E thuoloni noyudo jo-ratenge oseneno akwede mane nitie e kindgi gi askeche mane gi tiyo godo kanyakla e lwenjego. Mig. Kaggia nopuonjo weche kuom weyo dinde jo-rachere kendo luwo kit dinde jo-ratenge. Puonjgo ne ok omoro sirikal ngang’. Pach Kaggia ne en mar keto oganda duto mar jo-ratenge e din achiel, kendo nokwedo wach mar yalo kendo luwo dinde jo-wagunda kaka CMS kod ma moko. Nochako dinno ni DINI YA KAGGIA. Nolandore nyaka ei Wakamba kata joluo mane oyudo tiyo e kambe mag tuoro Man Kandara bende nobedo jo kanyono mar din Kaggia. Nomedo landore nyaka Nyanza. Puonjne ne chalo kama:

1.     chako din jo-Afrika,

2.     weyo dinde jo-wagunda chuth,

3.     loko puonj mar din, mondo odonj e kit dak gi timbe jo-ratenge:

·        yudo batiso manyien gi nying’ jo-ratenge gi wegi, weyo nyinge jo-wagunda chuth,

·        nyasi mar kisera (wedding) nyaka tim e kit dak jo-Afrika kendo rwako lepwa ma nyiso kit ngimawa.

Kuom mano dinde jo-wagunda duto koro nodong’ nono, nikech jo-Afrika nofwenyo adieri mar bedo e din jo-ratenge (DINI YA KAGGIA). Ne gitemo riwo dinde gi e yor kwe kendo jomoko nodok e dinde jo-wagunda to thoth jowa mane oseng’eyo adieri to nodagi chuth. Bura mar riwo dinde noketi Ndugamano ei Muranga. Kane winjruok otamore chopo e wang’e to jo-rachere noneno ni dini ya Kaggia biro loyogi omiyo negi temo kwayo piny owacho mondo oketh dini ya Kaggia. Gi kanyono nomak Kaggia kendo okete e od twech, to lange ma moko ne omedo lando adieri mar dini ya Kaggia.

Jowetena moher mago to gi ma moko mane otimore e kaka dinde masani opong’o Kenya nochakore. Nyaka aa chakruok jo-Afrika nong’eyo Nyasaye moloyo joluo neluonge ni; Nyasaye Nyakalaga, tiendeni mantie kuonde duto, kamoro amora. Gimane omiyo jowa oweyo kit yie marwa en mana rieko kod oledhi mane jo-wagunda odonjo godo e pinywa. Ne gitimore joma beyo kendo ma ng’uon putu, kendo manyalo kelo dongruok ne jo-piny bang’ mano ne gikawo jo-ratenge kaka wasumbini ma nyalo tiyone gi.

Mar ariyo nyasi mane gitimo godo misa ne mit kendo nomoro ogandawa mathoth, moloyo kit nyasi mar misa e din joka’Opere (katholik). Mar adek mwandu kod kit dak manyien mane gikelo kaka tiyo gi masinde, rwako lewni gi kit loso mula gi minyonge ma neng’ogi tek. Mago duto noloko pachwa kendo owilo wi jowa ma waweyo kit dak marwa chutho. Wiwa nowil gi kit Nyasach kwere mane ok odewo mwandu kata chan mar ng’ato. Dinde jo-rachere chal kaka kambi ma nga’to oyawo kendo ondiko ji matiye kendo chamo masara. Jodolo masani ichulo kuom tichgi kendo gi dak achana moloyo kata mana wan ma wachulo sadaka (chiwo).

Timbegi ema sani omuomo wang’: Ng’ato otimore jayalo kendo oweyo nyombo mondo otine Nyasaye gi chuny maler kendo moyangore, to kar timo mano to obukore gi nyithind wegi modhi somo wach din ema oloko monde, mano sakrilego ma kata Nyasachgino bende osekwedogi ayanga. E pinje Ulaya gi Amerka pate mag joka’Opere olokore gi nyithindo ma yawuoyi gi nyiri ema gi nindo godo kar nyuomo mondegi. Kato jotendgi miluongo ni jo-biskop to kar kwedo weche marichogo to temo umo kendo kar riembo padrino  to iloke odhi lando wach din kama chielo ma ji pok ong’eyo timbege ma richogo. Patego akwedogi e nying’ Nyasach kwere ma wacho adieri kendo ohero timbe ma kare. Adikinyi minwa ma jang’wono mondo odonj e chunygi mondo gilok pachgi kendo gi yud ng’eyo adiera gi timbe ma kare.

Kaka ne waseyudo loch kendo riembo jo-wagunda gi timbegi onego koro sani wanon matut kaka din jarateng’ nyalo gerore mondo obed ranyisi ni wan bende waluwo kit dinde mane kwerewa oweyonwa. Din jarateng’ gi tiende en din ma ok lamie mwandu, akwede, sigu, loch, chodo nyithind wegi matindo kod chike jo-rachere gi jo-rabuore kaka osebedo ei buge mane jo-wagunda ondiko ni nyaka to walam mana Nyasachgi. Nyasaye madieri en wuon Oganda duto kendo ok oyiero kido kata nond ng’ato. Odak e chunywa kendo en kodwa ndalo duto. Ruoth mondo opaki ndalo duto. Adikinyi minwa, nyarnam mondo omiwa ler mar loyo wasigu kendo ng’eyo adiera, Nyasach Podho mondo oyaw wang’wa kendo waluw yor adiera.

Wuon Abila, Joluo dot Kom

JALUO GI CHIKEGI

Luo kitgi gi timbegi en buk moting’o chike Luo gi kit dakgi mane kwere owenwa mondo obednwa kaka mise mar ngimawa e ndalo ma biro, kata obedoni moko sani ok wanyal rito sani nikech lokruok e kit (dak) ngima dhano, touche osemedore e piny miyo terruok ok nyal tim e yore mane itime chon, dinde osemedore gi puonj mag kit dak jorachere (kata obedo kamano mano pod ok nyal monowa rito chike mane kwerewa owenwa mondo obed kaka mise mar ngimawa e pinyka); puonj manyien osemiyo joluo oweyo kit dakgi kendo  gi luwo kit dak jo-kristo, mano ok rach mak mana ni chikewa makelo dongruok ok wanyal weyo, kik wabed misumba jorachere nikech wach din kata pesa.

Injili mar jo-kristo ok rach mak mana ni ok en kit dak ngima jarateng’ gi tiende. Gima ber moloyo ni (wanyalo somo kendo wacho dhok mopogore opogore kaka; dho-wareno, wafaranza, onjiro, warabu k.m.m.) jo-misen okelo sikunde, osiptende kod masinde ma nyalo miyo tich bed mayot.

BENDE  JADUONG’ NYALO NINDO OD WUODE?

Duoko: Ooyo...! en kwero mondo jaduong’ onind e od wuode kata obedo  ni kar nindo otamore ma nade, mano en dhoch ma loko tek kendo nyalo kelo tho e dala. Kendo odno nyaka muki kaen e boma to wuoyino nyaka dar e odno, mak mana ni manyasi to nyaka gimadhi mar loso dala.

WACH KUOM TERO DHAKO

Ka wuon pacho otho, chiege (monde) nyaka ter kaluwore gi chik Luo machon. Mokwongo dhako moduong’ kwongo loso kong’o matin; ema jodongo yaloe tero mon. E kong’o matinno dhako ka dhako huloe dichwo modwaro owuon. To dhako maduong’ e ma hulo ni jodongo nying’ dichwo, gi dhako mobiro kawo: ok nyal tiel dhako e dichwo moro, mak mana moyiero owuon. Kendo chwo mabiro tero mon’go oluongi e burano; to ka wach oserumo maber to giolo moke e pi. Kong’ otia ema kiny chwo mologo e udi ma onindo ni kiny joter ninde gi mon.

Okinyi jachwo osuri chwowo osuri kendo mon gawore gi ochoge; bul yuak, sigalagala gore e dala. Kendo chieng’no giolo kong’ mbare e pi mano e kong’ kal ma chwo biro keto; chwo mobiro tero mon. Kuom hawi marach ka dhako moro chwore ok nyal riworego, wach kiny ihulo oko kendo madho kong’o obare, kong’o riyo mak omadhi. To ka wach obedo maber ma poni oyie riwore gi dhakono to kiny imadho kong’ono. Chieng’no gilielo mon; nyamrechegi lielogi. Chieng’no giloko chiende, giweyo kode; koro gitweyo chien obore matar mar togo nikech giweyo kode. Osechodi kode tiende ni chwo oriwore kodgi.

Gima omiyo mano nyaka timre en ni nyaka many ng’at ma nyalo dong’ e lo wuon pacho. Yuore moro ema nyaka tere mak manani mano timore ka jakowiny moro oselage. Tich leko yande itimo gi jo- libamba, ja-mwa kata ng’at ma onge gi joge, misumba, nikech en tich ma nyalo ketho kar ng’ato.

Bang’ mano eka dhako manyo yuore moro ma kite ber ma nyalo dak kode. Nyaka obed ng’at mapok otimo tim moro marach kaka; nek, maundu, kata juok.

Bende ochuno ni dhako nyaka ter? Eh..! kata Ooyo...! ndalo machon nochuno ni dhako nyaka ter mondo korka oyawne jodala duto kaka yawuoyi kod jogo duto ma nyocha kwech liel otweyo. E ngima masani to koro weche obiro matek nikech tuoche omedore ma koro omiyo wachni tek ahinya. Mak mana nika ochuno ahinya ni nyaka ter dhako to en herone owuon mondo otim kaka odwaro, kaluwore gi chike Luo Machon. Ka dichwo pok oriwore gi dhako ma chuore otho to nyaka gi dhi e pim (pimo remo) kendo gichak gi rit bang’ dweche adek gi dhi e pim mar ariyo mondo gi bed gi adieri kuom kit ngimagi giwegi. Ethuolono ok onego giriwere maong’e mapira (condom). Ka mano oserumo to ginyalo loso kit dakgi giwegi. Kuom hawi ma rach ka ng’ato oyudore ni nigi tuo moro marach; kaka, ayaki to nyaka wachno kethi gi jodong’o.Ka giduto oyudore ni gin gi tuo to ginyalo dak kanyakla mak manani nyaka gidhi gine laktar mondo omigi yor dak kod tuo mar ayaki, kendo gi med tiyogi mapira. Nono to masira odonjo e dalano.

NYINGE JOLUO

Jaduong’ Abila, JOLUO dot KOM

Copyright ã 09.09.1999 (J. Ogello Okullo)

Jagoro kendo jarit od Twak; Mikayi Adhiambo Nyar Kochogo
Copyright © 2004 by [Joluo dot Kom]. All rights reserved.
Revised: 12 Aug 2004 00:32:36 +0200 .